ରାଜା ଚକ୍ର ଗିରଫ, କ୍ରାଇମବ୍ରାଂଚ ଦେଲା କଳାଚିଠାର ଲମ୍ବା ତାଲିକା

ଭୁବନେଶ୍ୱର(ଓଡ଼ିଶା ୱେୟାର): ବିଜେଡି ନେତା ସୌମ୍ୟଶଙ୍କର ଚକ୍ର ଓରଫ ରାଜା ଚକ୍ରଙ୍କୁ କ୍ରାଇମବ୍ରାଂଚର ଅର୍ଥନୀତିକ ଅପରାଧ ଶାଖା ଗିରଫ କରିଛି । ହାଇକୋର୍ଟ ଗତକାଲି ତାଙ୍କର ଗିରଫଦାରୀ ଉପରୁ ଅନ୍ତରୀଣ ସୁରକ୍ଷା ହଟାଇ ଦେବା ପରେ ସେ ଗିରଫ ହେବା ସ୍ପଷ୍ଟ ହୋଇଯାଇଥିଲା । ରାଜା ଚକ୍ରଙ୍କୁ ଗିରଫ ପରେ ତାଙ୍କର ଗଡ଼ଫାଦର ତଥା ବିଜେଡିର ବଡ଼ପଣ୍ଡାମାନଙ୍କ ଅଡ଼ୁଆ ବଢ଼ିବାରେ ଲାଗିଛି । କ୍ରାଇମବ୍ରାଂଚ ପକ୍ଷରୁ ମଧ୍ୟ ଏକ ସାମ୍ବାଦିକ ସମ୍ମିଳନୀରେ ରାଜା ଚକ୍ରଙ୍କ କଳା ସାମ୍ରାଜ୍ୟର ଲମ୍ବା ତାଲିକା ଦିଆଯାଇଛି ।

ସୂଚନା ଅନୁସାରେ ବିଜେଡି ନେତା ରାଜା ଚକ୍ରଙ୍କୁ ଗିରଫ ପରେ କୋର୍ଟ ଚାଲାଣ କରିବା ପୂର୍ବରୁ ଅର୍ଥନୀତିକ ଅପରାଧ ଶାଖା(ଇଓଡବ୍ଲ୍ୟୁ) ତାଙ୍କୁ ନିଜ କାର୍ଯ୍ୟାଳୟକୁ ନେଇଥିଲା । ସେଠାରୁ କୋର୍ଟକୁ ଚାଲାଣ ପାଇଁ ନେଇଛି । ଗିରଫ ପରେ ରାଜା ଗଣମାଧ୍ୟମକୁ ପ୍ରତିକ୍ରିୟାରେ କହିଛନ୍ତି ଯେ ନ୍ୟାୟପାଳିକା ଉପରେ ତାଙ୍କର ଭରସା ଅଛି । ଇଓଡବ୍ଲ୍ୟୁ ଏବେ ତାଙ୍କୁ ଜାମିନରେ ଆଣି ଅଧିକ ଜେରା କରିବା ସହ ତାଙ୍କର ବ୍ୟବସାୟିକ ସାମ୍ରାଜ୍ୟର ଗୁମର ଖୋଲିବାକୁ ପ୍ରୟାସ କରିବ ବୋଲି ଜଣାପଡ଼ିଛି ।

ଏପଟେ ରାଜାଙ୍କ କଳା ସାମ୍ରାଜ୍ୟର ତାଲିକା ଦେଇ କ୍ରାଇମବ୍ରାଂଚ ଡିଜି ବିନୟତୋଷ ମିଶ୍ର ଆଜି ଏକ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ୨୦୧୭-୧୮ରୁ ୨୦୨୪ ମାର୍ଚ୍ଚ ମସିହା ମଧ୍ୟରେ ରାଜାଙ୍କ ହାକିମାତିରେ ଚାଲୁଥିବା ଶୁଆକାଟିସ୍ଥିତ ଗନ୍ଧମାର୍ଦ୍ଧନ ଲୋଡ଼ିଂ ଏଜେନ୍ସୀ ଆଣ୍ଡ ଟ୍ରାନ୍ସପୋର୍ଟିଂ କେଅପରେଟିଭ ସୋସାଇଟି ମୋଟ ୧୮୫ କୋଟି ଟଙ୍କା ଆୟ କରିଛି । ରାଜା ନିଜର ରାଜନୀତିକ ଦବଦବା ଦେଖାଇ ଏହି ସୋସାଇଟିକୁ ନିଜର ଉପାର୍ଜନର ମାଧ୍ୟମ କରିଥିଲେ । ଏହି ସୋସାଇଟିର ଅଡିଟ୍ ୨୦୧୨-୧୩ରୁ ହୋଇନାହିଁ । ରାଜା ଚକ୍ର ନିଜେ କାଗଜକଲମରେ ଏହି ସୋସାଇଟିର ସଦସ୍ୟ ନଥିଲେ ମଧ୍ୟ ସେ ନିଜର ଖାସ୍ ଅନୁଗତ ସଦାଶିବ ସାମଲ,ସୁଧାଂଶୁ ଶେଖର ନାଏକ ଓ ସମୀର ଜେନାଙ୍କ ମାଧ୍ୟମରେ ଏହାର ସବୁକିଛି ନିୟନ୍ତ୍ରଣ କରୁଥିଲେ । ରାଜା ଶଙ୍କର ମିନେରାଲ, ଶଙ୍କର ଟ୍ରାନ୍ସପୋର୍ଟ, ଶଙ୍କର ରୋଡୱେଜ୍ ଓ ଶଙ୍କର ପ୍ରୋଜେକ୍ଟ ଭଳି କମ୍ପାନୀ ଗଢ଼ି ନିଜର ବ୍ୟବସାୟିକ ସାମ୍ରାଜ୍ୟର ବିସ୍ତାର କରିଥିଲା । ରାଜାଙ୍କର ବିଭିନ୍ନ ଆକାଉଣ୍ଟକୁ ସିଜ୍ କରାଯିବା ସହ ପ୍ରାୟ ୨୫ଲକ୍ଷ ଟଙ୍କା ବ୍ୟାଙ୍କ ବାଲାନ୍ସକୁ ଫ୍ରିଜ୍ କରିଦିଆଯାଇଛି ।

କ୍ରାଇମବ୍ରାଂଚ ଡିଜି ଶ୍ରୀ ମିଶ୍ର ଆଉ କ’ଣ କହିଲେ

ରାଜାଙ୍କୁ ଗିରଫ ପରେ ଗଡ଼ଫାଦରମାନଙ୍କ ସମସ୍ୟା ବଢ଼ିବାରେ ଲାଗିଛି ।ରାଜା ଚକ୍ରଙ୍କୁ ଜେରା ପରେ କେନ୍ଦୁଝର ଜିଲ୍ଲାରେ ଖଣି କାରବାରରେ ହୋଇଥିବା ବ୍ୟାପକ ଅନିୟମିତତାର ପର୍ଦ୍ଦାଫାସ ହେବାର ସମ୍ଭାବନା ରହିଛି । କେନ୍ଦୁଝରର ବିଜେଡି ନେତା ତଥା ଘସିପୁରା ବିଧାୟକ ବଦ୍ରିନାରାୟଣ ପାତ୍ର ମଧ୍ୟ ଆଜି ରାଜାଙ୍କ ଗିରଫ ପରେ ତାଙ୍କ ଇସାରାରେ କାର୍ଯ୍ୟ କରୁଥିବା ତତକାଳୀନ ଜିଲ୍ଲାପାଳ ଓ ପୁଲିସ ଏସପିଙ୍କୁ ତଦନ୍ତ ପରିସରକୁ ନେବାକୁ ଦାବି କରିଛନ୍ତି । ବିଜେଡି ନେତା ରାଜା ଚକ୍ରଙ୍କ ବିରୁଦ୍ଧରେ ଇଓଡବ୍ଲ୍ୟୁରେ ଆଇପିସିର ଧାରା-୪୦୬,୪୦୯,୪୨୦,୪୬୭,୪୬୮,୪୭୧,୧୨୦-ଖରେ ମାମଲା ରୁଜୁ ହୋଇଛି । ଏହାସହିତ କେନ୍ଦୁଝର ଜିଲ୍ଲାର ବିଭିନ୍ନ ଥାନାରେ ମୋଟ ୧୩ଟି କେସ୍ ମଧ୍ୟ ରହିଛି ।