ଭୁବନେଶ୍ୱର: ବରିଷ୍ଠ ଓଏଏସ ଅଫିସରସ୍ତରରେ ପୂର୍ବରୁ ହୋଇଥିବା ବଦଳିକୁ ଆଜି ବାତିଲ କରାଯାଇଛି ।
ରାଜ୍ୟ ସାଧାରଣ ପ୍ରଶାସନ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁସାରେ ଇସ୍ପାତ ଓ ଖଣି ବିଭାଗର ଅତିରିକ୍ତ ସଚିବ ଶୁଭକାନ୍ତ ମିଶ୍ରଙ୍କୁ ଗୃହ ବିଭାଗର ଅତିରିକ୍ତ ସଚିବ ଭାବେ ବଦଳି କରାଯାଇଥିବାବେଳେ ଓଡ଼ିଶା ରାଜ୍ୟ ନିର୍ବାଚନ କମିଶନଙ୍କ ସଚିବ ରାଜ୍ୟ ରବିନ୍ଦ୍ର ନାଥ ସାହୁଙ୍କୁ ବୟନିକା ପରିଚାଳନା ନିର୍ଦ୍ଦେଶକ ଭାବେ ଅବସ୍ଥାପିତ କରାଯାଇଛି । ଶ୍ରୀ ସାହୁ ପଞ୍ଚାୟତିରାଜ ବିଭାଗର ଅତିରିକ୍ତ ସଚିବ ଭାବେ ବଦଳି ହୋଇଥିଲା କିନ୍ତୁ ସେ ସେଠାରେ ଯୋଗ ଦେଇନପାରି ସାଧାରଣ ପ୍ରଶାସନ ବିଭାଗରେ ଯୋଗ ଦେଇଥିଲେ । ଓଡ଼ିଶା ରାଜ୍ୟ ହାଉସିଂ ବୋର୍ଡ ଓଏସ୍ଡି ଶ୍ରୀଧର ନାୟକଙ୍କୁ ଗ୍ରାମ୍ୟ ଉନ୍ନୟନ ବିଭାଗର ଯୁଗ୍ମ ସଚିବ ଭାବେ ବଦଳି କରାଯାଇଛି । ତାଙ୍କୁ ପୂର୍ବରୁ ଯାଜପୁର ଜିଲ୍ଲା ଖଣିଜ ପାଣ୍ଠିର ସିଇଓ ଭାବେ ବଦଳି କରାଯାଇଥିଲା,ଯାହା ଆଜି ବାତିଲ ହୋଇଛି । ସେହିପରି ଇସ୍ପାତ ଓ ଖଣି ବିଭାଗର ସ୍ୱତନ୍ତ୍ର ସଚିବ ବଟକୃଷ୍ଣ ଦେହୁରୀଙ୍କ ପୂର୍ବ ବଦଳିକୁ ବାତିଲ କରାଯାଇ ତାଙ୍କୁ ସେଠାରେ କାର୍ଯ୍ୟ ଜାରି ରଖିବାକୁ ଅନୁମତି ଦିଆଯାଇଛି । ଶ୍ରୀ ଦେହୁରୀଙ୍କୁ ପୂର୍ବରୁ ଗୃହ ବିଭାଗର ସ୍ୱତନ୍ତ୍ର ସଚିବ ଭାବେ ବଦଳି କରାଯାଇଥିଲା । ସେହିପରି ଟେକ୍ସଟାଇଲ୍ ନିର୍ଦ୍ଦେଶକ ସୁଶାନ୍ତ କୁମାର ବାରିକଙ୍କ ପୂର୍ବ ବଦଳିକୁ ବାତିଲ କରାଯାଇ ତାଙ୍କୁ ସେଠାରେ କାର୍ଯ୍ୟଜାରି ରଖିବାକୁ କୁହାଯାଇଛି । ପୂର୍ବରୁ ତାଙ୍କର ସାମାଜିକ ସୁରକ୍ଷା ଓ ଭିନ୍ନକ୍ଷମ ସଶକ୍ତିକରଣ ନିର୍ଦ୍ଦେଶକ ଭାବେ ବଦଳି ହୋଇଥିଲା । ସେହିପରି ସ୍କୁଲ ଓ ଗଣଶିକ୍ଷା ବିଭାଗର ସ୍ୱତନ୍ତ୍ର ସଚିବ ବିଶ୍ୱନାଥ ପ୍ରଧାନଙ୍କୁ ଗୋପବନ୍ଧୁ ପ୍ରଶାସନିକ ଏକାଡେମୀର ଅତିରିକ୍ତ କମିଶନର ଭାବେ ବଦଳି କରାଯାଇଛି । ତାଙ୍କର ପୂର୍ବରୁ ଓବିସି ନିର୍ଦ୍ଦେଶକ ଭାବେ ବଦଳି ହୋଇଥିଲା, ଯାହାକୁ ଆଜି ବାତିଲ କରାଯାଇଛି । ସେହିପରି ରେଢ଼ାଖୋଲ ଉପଜିଲ୍ଲାପାଳ ପ୍ରସନ୍ନ କୁମାର ଦାସଙ୍କୁ ଢେଙ୍କାନାଳ ଡିୟୁଡିଏ ପ୍ରକଳ୍ପ ନିର୍ଦ୍ଦେଶକ ଭାବେ ବଦଳି କରାଯାଇଛି । ଭଞ୍ଜନଗର ବିଡିଓ ସୁବ୍ରତ କୁମାର ବେହେରାଙ୍କୁ ବୀରମହାରାଜପୁର ଉପଜିଲ୍ଲାପାଳ ଭାବେ ବଦଳି କରାଯାଇଛି । ପୂର୍ବରୁ ତାଙ୍କର ଜୟପୁର ଉପଜିଲ୍ଲାପାଳ ଭାବେ ବଦଳି ହୋଇଥିଲା, ଆଜି ଏହାକୁ ବାତିଲ କରାଯାଇଛି । ସେହିପରି ଢେଙ୍କାନାଳ ଡିୟୁଡିଏ ପ୍ରକଳ୍ପ ନିର୍ଦ୍ଦେଶକ ନିହାର ରଞ୍ଜନ ଦାସଙ୍କୁ ସମ୍ବଲପୁର ଡିୟୁଡିଏ ପ୍ରକଳ୍ପ ନିର୍ଦ୍ଦେଶକ ଭାବେ ବଦଳି କରାଯାଇଛି । ସେହିପରି ବିଜନ କୁମାର ଥମ୍ବଙ୍କ ପୂର୍ବ ବଦଳିକୁ ବାତିଲ କରାଯାଇ ତାଙ୍କୁ ବାରିପଦା ଆଇଟିଡିଏ ପ୍ରକଳ୍ପ ନିର୍ଦ୍ଦେଶକ, ସନ୍ତୋଷ କୁମାର ଦାଶଙ୍କ ପୂର୍ବ ବଦଳି ବାତିଲ କରାଯାଇ ଓଡ଼ିଶା ରାଜ୍ୟ ଯୋଗାଣ ନିଗମ ଜେନେରାଲ ମ୍ୟାନେଜର ଭାବେ କାର୍ଯ୍ୟ କରିବାକୁ ଅନୁମତି ଦିଆଯାଇଛି । ସେହିପରି ବିଶିକେଶନ ଦେହୁରୀଙ୍କୁ ରେଢାଖୋଲ ଉପଜିଲ୍ଲାପାଳ ଓ ଇଡ୍କୋ ଲ୍ୟାଣ୍ଡ ଅଫିସର୍ ବିଥିକା ସ୍ୱାଇଁଙ୍କୁ ମହିଳା ଓ ଶିଶୁବିକାଶ ବିଭାଗର ଉପସଚିବ ଭାବେ ବଦଳି କରାଯାଇଛି । ନବରଙ୍ଗପୁର ଡିଆରଡିଏ ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ ରତ୍ନାକର ସାହୁ ପୂର୍ବବଦଳିକୁ ବାତିଲ କରାଯାଇ ତାଙ୍କୁ ସେଠାରେ କାର୍ଯ୍ୟ କରିବାକୁ କୁହାଯାଇଛି ।
