ଭୁବନେଶ୍ୱର: ଭୁବନେଶ୍ୱରସ୍ଥିତ ବିଜୁ ପଟ୍ଟନାୟକ ଆନ୍ତର୍ଜାତିକ ବିମାନ ବନ୍ଦରରୁ ସ୍ୱଳ୍ପଦରରେ ମାଲେସିଆର କ୍ୱାଲାଲମ୍ପୁରକୁ ବିମାନ ଉଡ଼ାଣ କରିବା ପରେ ଏୟାର ଏସିଆ ଖୁବଶୀଘ୍ର ଭୁବନେଶ୍ୱରରୁ କଲମ୍ବୋକୁ ବିମାନ ଚଳାଇବାକୁ ଯୋଜନା କରିଛି ।
ରାଜ୍ୟ ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଅଶୋକ ଚନ୍ଦ୍ର ପଣ୍ଡା ଏ ସମ୍ପର୍କରେ ସୂଚନା ଦେଇ କହିଛନ୍ତି ଯେ ଏୟାର ଏସିଆ ଏବେ ଭୁବନେଶ୍ୱରରୁ ଶ୍ରୀଲଙ୍କାର କଲମ୍ବୋ୍କୁ ବିମାନ ଚଳାଚଳ କରିବା ପାଇଁ ରାଜ୍ୟ ସରକାରଙ୍କ ଅନୁମତି ଲୋଡ଼ିଛି । ଏୟାର ଏସିଆ ଏବେ ଏକମାତ୍ର ବିମାନ ଉଡ଼ାଣକାରୀ କମ୍ପାନୀ ଭାବେ ଭୁବନେଶ୍ୱରରୁ ବ୍ୟାଙ୍କ୍କକୁ ବିମାନ ଚଳାଚଳ କରୁଛି । କ୍ୱାଲାଲମ୍ପୁରକୁ ଉଡ଼ାଣ ପାଇଁ ମଧ୍ୟ ରାଜ୍ୟ ସରକାର ସବ୍ସିଡି ପ୍ରଦାନ କରୁଛନ୍ତି । ରାଜ୍ୟକୁ ବିଦେଶୀ ପର୍ଯ୍ୟଟକଙ୍କ ଆଗମନ ବୃଦ୍ଧି ପାଇଁ ଓଡ଼ିଶା ସରକାର ସବ୍ସିଡି ଦେଉଥିବାବେଳେ ଦୁବାଇ ଓ ପୁଣେକୁ ଭୁବନେଶ୍ୱରରୁ ସିଧାସଳଖ ବିମାନ ଚଳାଚଳ ପାଇଁ ବିମାନ କମ୍ପାନୀକୁ ଆକର୍ଷିତ କରିବା ଉପରେ ଏବେ ବିଚାରବିମର୍ଶ ଚାଲିଥିବା ଜଣାପଡ଼ିଛି ।
