ଭୁବନେଶ୍ୱର : ବିଜେଡିର ମହାନଦୀ ମହାସଂଗ୍ରାମକୁ ଆସନ୍ତାକାଲି ବିଜେଡି ସୁପ୍ରିମୋ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦ୍ଘାଟନ କରିବେ । ଏହି କାର୍ଯ୍ୟକ୍ରମ ୧୬ରୁ ଆରମ୍ଭ ହୋଇ ୩୧ତାରିଖ ପର୍ଯ୍ୟନ୍ତ ଚାଲିବ । ମହାନଦୀ ସଚେତନତା ଅଭିଯାନରେ ବିଜେଡି୧୫ଟି ଜିଲ୍ଲାର ମହାନଦୀର ଦୁଇ ପାଶ୍ୱର୍ରେ ଜନସଚେତନତା ର୍ୟାଲି କରିବ ।
ବିଜେଡି ଉପସଭାପତି ତଥା ରାଜ୍ୟସଭା ସାଂସଦ ପ୍ରସନ୍ନ ଆଚାର୍ଯ୍ୟ କହିଛନ୍ତି ଯେ, ଝାରସୁଗୁଡ଼ାର ଲଖନପୁର ବ୍ଲକର ସୁଖାଶୋଡ଼ାରେ ଏକ ସାଧାରଣ ସଭାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଉଦବୋଧନ ଦେବା ସହ ମହାନଦୀ ସଚେତନତା ଅଭିଯାନର ଶୁଭାରମ୍ଭ କରିବେ । ସୁଖାଶୋଡ଼ାର ମହାନଦୀ ଅପରପାଶ୍ୱର୍ରେ ଥିବା ବରଗଡ଼ ଜିଲ୍ଲାର ଆମ୍ବାଭୋନା ବ୍ଲକ୍ର ଚିଖିଲିଠାରେ ବି ଅନ୍ୟ ଏକ ସାଧାରଣ ସଭା ଉଦ୍ବୋଧନ ଦେବେ । ଏହି ଯାତ୍ରା ମହାନଦୀ ଅବବାହିକାର ୧୫ଟି ଜିଲ୍ଲାରେ ବିଜେଡି ପକ୍ଷରୁ ଶତାଧିକ ପଥପ୍ରାନ୍ତ ସଭା, ସାଂସ୍କୃତିକ କାର୍ଯ୍ୟକ୍ରମ ଓ ବିଭିନ୍ନ ମନ୍ଦିରରେ ଜଳଆଳତୀ ମାଧ୍ୟମରେ ସଚେତନତା ସୃଷ୍ଟି କରାଯିବ ବୋଲି କୁହାଯାଇଛି । ଓଡ଼ିଶାର ସ୍ୱାର୍ଥକୁ ଉପେକ୍ଷା କରି ଛତିଶଗଡ଼ ପୁଣି ଏକ ବ୍ୟାରେଜ୍ ପାଇଁ ଟେଣ୍ଡର ଡକାଇଥିବାବେଳେ କେନ୍ଦ୍ର ସରକାର ମଧ୍ୟ ଓଡ଼ିଶା ପ୍ରତି ଅବହେଳା ପ୍ରଦର୍ଶନ କରୁଛି । ତେଣୁ ମହାନଦୀ ସଚେତନତା ଯାତ୍ରାରେ ସବୁ ଦଳ ଓ ବୁଦ୍ଧିଜୀବୀଙ୍କୁ ସାମିଲ ହେବାକୁ ଦଳ ଆହ୍ୱାନ କରିଛି ।
