ଭୁବନେଶ୍ୱର,(ଓଟି): ରାଜ୍ୟର ଆଦିବାସୀ ବହୁଳ ୯ଟି ଜିଲା ପାଇଁ ସ୍ୱତନ୍ତ୍ର ଆଦିବାସୀ ବିକାଶ ପରିଷଦ ଗଠନ କରିବାକୁ ରାଜ୍ୟ କ୍ୟାବିନେଟ୍ ନିଷ୍ପତ୍ତି ନେଇଛନ୍ତି । ପ୍ରଥମଥର ପାଇଁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କ୍ୟାବିନେଟ୍ ନିଷ୍ପତ୍ତି ସଂପର୍କରେ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଏହା ଏକ ଐତିହାସିକ ନିଷ୍ପତ୍ତି । ପୂର୍ବରୁ ଇଚ୍ଛାଧୀନ କୋଟାରେ ଏକାଧିକ ପ୍ଳଟ୍ ଓ ଫ୍ଲାଟ୍ ନେଇଥିବା ବ୍ୟକ୍ତିଙ୍କଠାରୁ ଏହାକୁ ଫେରାଇ ଆଣିବା ପାଇଁ କ୍ୟାବିନେଟ୍ ନେଇଥିବା ନିଷ୍ପତ୍ତିକୁ ଦୁଇଜଣ ମନ୍ତ୍ରୀ ଗଣମାଧ୍ୟମ ଆଗରେ ଏହା ଏକ ଐତିହାସିକ ନିଷ୍ପତ୍ତି ବୋଲି ଦର୍ଶାଇଥିଲେ । ସୁତରାଂ ସ୍ୱତନ୍ତ୍ର ଆଦିବାସୀ ବିକାଶ ପରିଷଦ ଗଠନ ନିଷ୍ପତ୍ତି ନବୀନ ସରକାରଙ୍କର ଦ୍ୱିତୀୟ ଐତିହାସିକ ନିଷ୍ପତ୍ତି ବୋଲି ଗ୍ରହଣ କରିବାକୁ ପଡ଼ିବ । ନବୀନ ସରକାରକୁ ୧୭ବର୍ଷ ପୂରି ୧୮ ବର୍ଷ ଚାଲୁଛି । ସରକାରଙ୍କର ଏକ ବିଭାଗ ଅଛି ଯାହାକୁ କୁହାଯାଏ ଆଦିବାସୀ କଲ୍ୟାଣ ବିଭାଗ । ଏବେ ରମେଶ ମାଝୀ ଏହି ବିଭାଗର କ୍ୟାବିନେଟ୍ ମନ୍ତ୍ରୀ ଅଛନ୍ତି ।
ଆଦିବାସୀ ବହୁଳ ଅଞ୍ଚଳରେ କେନ୍ଦ୍ର ସରକାରଙ୍କ ଆଇନ୍ ଅନୁସାରେ ସମନ୍ୱିତ ଆଦିବାସୀ ବିକାଶ ପ୍ରାଧିକରଣ ବା ଆଇଟିଡିଏ କାର୍ଯ୍ୟ କରୁଛି । ବରିଷ୍ଠ ଅଧିକାରୀ ଆଇଟିଡିଏ ଦାୟିତ୍ୱ ବୁଝୁଛନ୍ତି । ଅନେକ ଜିଲ୍ଲାରେ ଲୁପ୍ତ ହୋଇ ଯାଉଥିବା ଆଦିମ ଆଦିବାସୀଙ୍କ ପାଇଁ ମାଇକ୍ରୋ ପ୍ରକଳ୍ପ ମଧ୍ୟ ଚାଲୁଛି। ପ୍ରତି ଜିଲାର ଜିଲା ପରିଷଦରେ ଆଦିବାସୀ ପ୍ରତିନିଧିତ୍ୱ ରହିଛି । ଏପରିକି ଅନେକ ଆଦିବାସୀ ବହୁଳ ଜିଲାରେ ଆଦିବାସୀ ମହିଳା କିମ୍ୱା ପୁରୁଷ ଜିଲା ପରିଷଦ ଅଧ୍ୟକ୍ଷ ଦାୟିତ୍ୱ ତୁଲାଉଛନ୍ତି । ସରକାର ଜିଲା ଯୋଜନା ବୋର୍ଡ ଗଠନ କରିଛନ୍ତି । ଶାସକ ଦଳର ବିଧାୟକମାନେ ଏହିସବୁ ଜିଲ୍ଲା ଯୋଜନା ବୋର୍ଡ ଅଧ୍ୟକ୍ଷ ଦାୟିତ୍ୱରେ ଅଛନ୍ତି । ଏହି ଯୋଜନା ବୋର୍ଡର କାର୍ଯ୍ୟ ଓ ଉଦ୍ଦେଶ୍ୟ ହେଲା ପ୍ରଶାସନିକ ନିଷ୍ପତ୍ତି ରୂପାୟନ ଏବଂ କାର୍ଯ୍ୟକାରୀ କରିବାରେ ବିଶେଷ ଭୂମିକା ଗ୍ରହଣ କରିବେ । ସେମାନଙ୍କ ପରିସରରେ ଆଦିବାସୀ ଅଞ୍ଚଳ ମଧ୍ୟ ଆସୁଛି । ଅର୍ଥାତ୍ ଆଦିବାସୀମାନଙ୍କ ବିକାଶ ଦିଗରେ ସ୍ୱତନ୍ତ୍ର ଯୋଜନା ପ୍ରଣୟନ କ୍ଷମତା ଜିଲା ଯୋଜନା ବୋର୍ଡର ରହିଛି ।
