ଭୁବନେଶ୍ୱର : ବିଜେଡି କାଉନସିଲ ଲକ୍ଷ୍ମୀଦତ ପ୍ରଧାନ ହତ୍ୟା ମାମଲାରେ ବିଜେପି ମୁଖପାତ୍ର ଗୋଲକ ମହାପାତ୍ରଙ୍କୁ ଆଜି ଛତ୍ରପୁର ପୁଲିସ୍ ଜେରା କରିଛି । ରାଜ୍ୟ ବିଜେପିର ବରିଷ୍ଠ ନେତାମାନଙ୍କ ଏକ ୪୦ଜଣିଆ ଟିମ୍ ସହ ଗୋଲକ ଆଜି ଛତ୍ରପୁରରେ ପହଂଚିବା ପରେ ସେଠାରୁ ଏକ ବିଶାଳ ଶୋଭାଯାତ୍ରାରେ ଛତ୍ରପୁର ଥାନାକୁ ଯାଇଥିଲେ । ଦିନ ପ୍ରାୟ ସାଢ଼େ ୧ଟା ସମୟରେ ସେ ଥାନାରେ ପ୍ରବେଶ କରିଥିଲେ । ଥାନା ଭିତରେ ସେ ୪୫ମିନିଟ୍ ରହିଥିଲେ ମଧ୍ୟ ପୁଲିସ୍ ତାଙ୍କୁ ୧୦ରୁ ୧୫ମିନିଟ୍ ଜେରା କରିଥିବା ସ୍ଥାନୀୟ ଅତିରିକ୍ତ ଏସ୍ପି ରମେଶ ସେଠୀ ସୂଚନା ଦେଇଛନ୍ତି । ଲକ୍ଷ୍ମୀଦତ ହତ୍ୟା ମାମଲାର ମୁଖ୍ୟ ଅଭିଯୁକ୍ତ କୃଷ୍ଣ ନାୟକଙ୍କ ସହ ସମ୍ପୃକ୍ତି ଅଭିଯୋଗରେ ଗୋଲକଙ୍କୁ ଆଇପିସି-୧୬୧ରେ ବୟାନ ରେକର୍ଡ କରାଇବା ପାଇଁ ହାଜର ହେବାକୁ ପୁଲିସ୍ ନୋଟିସ୍ ଜାରି କରିଥିଲା । ତେବେ ଥାନାରୁ ବାହାରିବା ପରେ ଗୋଲକ କହିଚନ୍ତି ଯେ ଆଜି ଜେରା ଶେଷ ହୋଇଛି । ପୁଲିସ୍ ଯାହା ପଚାରିଲା ତା’ର ଉପଯୁକ୍ତ ଉତର ରଖିଛି । ଭବିଷ୍ୟତରେ ଯଦି ପୁଲିସ୍ ଡାକେ ସିଏ ଆସିବେ ଓ ତଦନ୍ତରେ ସହଯୋଗ କରିବେ । କିନ୍ତୁ ଅତିରିକ୍ତ ଏସ୍ପି ଶ୍ରୀ ସେଠୀ କହିଛନ୍ତି ଯେ ଜେରା ଆଜି ମଧ୍ୟ ହେବ । ଶ୍ରୀ ମହାପାତ୍ର ମଧ୍ୟାହ୍ନ ଭୋଜନରେ ଯିବା ପାଇଁ ୨ଘଂଟା ସମୟ ଦେବାକୁ ନିଜ ଓକିଲ ମାଧ୍ୟମରେ ପୁଲିସଠାରୁ ଲିଖିତ ଅନୁମତି ଲୋଡ଼ି ବାହାରକୁ ଯାଇଛନ୍ତି । ତାଙ୍କ ଫେରିବାକୁ ଅପେକ୍ଷା କରାଯାଇଛି । ଅନ୍ୟପକ୍ଷରେ ବିଜେଡି ଆଜି ଏକ ସାମ୍ବାଦିକ ସମ୍ମିଳନୀ କରି କହିଛି ଯେ, ଗୋଲକ ମହାପାତ୍ର ଦୋଷୀ ବୋଲି ବିଜେଡି କହିନାହିଁ । ଯିଏ ଦୋଷୀ ସିଏ ନିଶ୍ଚିତ ଦଣ୍ଡ ପାଇବ । ବିଜେପି ଏବେ ଭୟଭୀତ ହୋଇପଡ଼ିଛି । ଗୋଲକ ଶୋଭାଯାତ୍ରାରେ ଥାନାକୁ ଯିବା ଘଟଣାକୁ ବିଜେଡି ନିନ୍ଦା କରିବା ସହ ତଦନ୍ତ ପ୍ରକ୍ରିୟାକୁ ପ୍ରଭାବିତ ପାଇଁ ବିଜେପି ଉଦ୍ୟମ କରୁଛି ବୋଲି ଦଳର ମୁଖପାତ୍ର ଦେବାଶିଷ ସାମନ୍ତରାୟ କହିଛନ୍ତି ।
