ଭୁବନେଶ୍ୱର(ଓଡ଼ିଶା ୱେୟାର): ତ୍ରୟୋଦଶ ଶତାବ୍ଦୀର ଐତିହାସିକ ବାରବାଟୀ ଦୁର୍ଗ ଓ ଏହାର ପାରିପାଶ୍ୱିର୍କ ସ୍ଥାନର ସଂରକ୍ଷଣ ଏବଂ ବିକାଶ ନିମନ୍ତେ ପଂଚଦଶ ଅର୍ଥ କମିଶନଙ୍କ ସୁପାରିସରେ କେନ୍ଦ୍ର ସରକାର ୧୫୦କୋଟି ଟଙ୍କା ଅନୁଦାନ ଯୋଗାଇ ଦେବେ । ଐତିହାସିକ ବାରବାଟୀ ଦୁର୍ଗର ସଂରକ୍ଷଣ ନିମନ୍ତେ ଅନୁଦାନ ଦେବାକୁ ପଂଚଦଶ ଅର୍ଥ କମିଶନଙ୍କ ପାଖରେ ରାଜ୍ୟ ସରକାର ଦାବି କରିଥିଲେ ।
କେନ୍ଦ୍ର ଅର୍ଥ ମନ୍ତ୍ରଣାଳୟ ପକ୍ଷରୁ ଜାରି ରିପୋର୍ଟରେ ପଂଚଦଶ ଅର୍ଥ କମିଶନ ବାରବାଟୀ ଦୁର୍ଗର ସଂରକ୍ଷଣ ଓ ବିକାଶ ନିମନ୍ତେ ୧୫୦କୋଟି ଟଙ୍କା ଦେବାକୁ ସୁପାରିସ୍ କରିଛନ୍ତି । କଟକ ସହରର ଏହି ଐତିହାସିକ ଦୁର୍ଗ, ଏହାର ଗେଟ୍ ଓ ରାଜଭବନର ସଂରକ୍ଷଣ ଓ ବିକାଶ ସମେତ ପୁରୁଣା ଗଡ଼ଖାଇରେ ବୋଟିଂ ସୁବିଧା ସହ ସେଠାରେ ଏକ ଉଚ୍ଚମାନର ପାର୍କ ସ୍ଥାପନ କରି ଏହାକୁ ବିଶ୍ୱସ୍ତରୀୟ ପର୍ଯ୍ୟଟନସ୍ଥଳୀ କରିବା ନିମନ୍ତେ ରାଜ୍ୟ ସରକାର ଯୋଜନା ପ୍ରସ୍ତୁତ କରିଛନ୍ତି । ଏହାସହିତ କଟକ ସହରର ଦେବୀ ମା’ ଚଣ୍ଡୀଙ୍କ ମନ୍ଦିରର ମଧ୍ୟ ବିକାଶ କାର୍ଯ୍ୟ ଏଥିରେ ସାମିଲ ରହିଛି । ପଂଚଦଶ ଅର୍ଥ କମିଶନ ଏହି ଦୁର୍ଗ ଓ ଏହା ସହ ଜଡ଼ିତ ସ୍ଥାନଗୁଡ଼ିକର ସଂରକ୍ଷଣ ଓ ବିକାଶ ନିମନ୍ତେ ୧୫୦କୋଟି ଟଙ୍କା ଦେବାକୁ ସୁପାରିସ୍ କରିଥିବାରୁ ଦୀର୍ଘଦିନ ଧରି ସଂରକ୍ଷଣ ଅଭାବରୁ ପଡ଼ି ରହିଥିବା ବାରବାଟୀ ଦୁର୍ଗ ପୁଣିଥରେ ତା’ର ପୂର୍ବ ଗୌରବ ଫେରିପାଇବ ବୋଲି ଆଶା କରାଯାଉଛି ।
