ଭୁବନେଶ୍ୱର(ଓଡ଼ିଶା ୱେୟାର): ରାଜ୍ୟରେ କ୍ଷମତାସୀନ ବିଜେଡି ନିଜର ଦଳୀୟ ବିଧାୟକ ଓ ବିଧାୟିକାମାନଙ୍କୁ ପକେଟ୍ ଖର୍ଚ୍ଚ ସହ ପାଟ୍ଟଶାଢ଼ୀ ଉପହାର ଦେଇଥିବା ଶୁଣିବାକୁ ମିଳିଛି । କରୋନା ମହାମାରୀ ଯୋଗୁ ସାଂସଦ ପାଣ୍ଠିକୁ ସମ୍ପୂର୍ଣ୍ଣ ନିରସ୍ତ୍ର ଓ ବିଧାୟକ ପାଣ୍ଠିକୁ କାଣ୍ଟଛାଣ୍ଟ୍ କରାଯାଇଥିବାରୁ ଦଳ ନିଜର ବିଧାୟକ ଓ ସାଂସଦମାନଙ୍କୁ ସହାୟତା କରିବାକୁ କୁଆଡ଼େ ଆଗେଇ ଆସିଛି । ବିଧାୟକ ଓ ସାଂସଦମାନଙ୍କୁ ଦୁଇଟି ବର୍ଗରେ ବିଭକ୍ତ କରି ଆର୍ଥିକ ସହାୟତା ଦେଇଥିବାବେଳେ ବିଧାୟିକା ଓ ମହିଳା ସାଂସଦମାନଙ୍କୁ ରାତ୍ରିଭୋଜନରେ ଆପାୟିତ କରି ପାଟଶାଢ଼ୀ ଓ ଆର୍ଥିକ ସହାୟତା ଦେଇଥିବା ଚର୍ଚ୍ଚା ।
ଶୁଣିବାକୁ ମିଳୁଛି, ବିଜେଡି ସଂଗଠନ ସମ୍ପାଦକ ପ୍ରଣବ ପ୍ରକାଶ ଦାସ କୁଆଡ଼େ ଗତ ସପ୍ତାହରେ ନିଜର ସରକାରୀ ବାସଭବନରେ ଦଳର ୧୨ଜଣ ବିଧାୟିକା ଓ ସମସ୍ତ ମହିଳା ସାଂସଦଙ୍କୁ ଡାକି ସେମାନଙ୍କର ଆପତ୍ତି-ଅଭିଯୋଗ ଶୁଣିବା ସହ ରାତ୍ରିଭୋଜନରେ ଆପ୍ୟାୟିତ କରିଥିଲେ । ଆଉ ଘରକୁ ଫେରିବା ସମୟରେ ଶାଢ଼ୀ ଓ ଏକ ପକେଟ୍ ଦେଇଥିବା ଜଣେ ମହିଳା ସାଂସଦ ନିଜ ନାମ ଗୁପ୍ତ ରଖିବା ସର୍ତ୍ତରେ ସୂଚନା ଦେଇଛନ୍ତି ।
ଚର୍ଚ୍ଚା ଅନୁସାରେ, ଦଳୀୟ ବିଧାୟକମାନଙ୍କୁ ୨ଟି ଗ୍ରୁପରେ ବିଭକ୍ତ କରି କୁଆଡ଼େ ୫ଲକ୍ଷ ଓ ୩ଲକ୍ଷ ଟଙ୍କା ଲେଖାଏଁ ପକେଟ୍ ଖର୍ଚ୍ଚ ପ୍ରଦାନ କରାଯାଇଛି । ସଂଗଠନ ସମ୍ପାଦକ ଶ୍ରୀ ଦାସଙ୍କୁ ଏବେ ସମସ୍ତ ଜିଲ୍ଲାର ବିଜେଡି ସଂଗଠନ କଥା ବୁଝିବା ପାଇଁ କୁଆଡ଼େ କୁହାଯାଇଛି । ଆଉ ବିଧାୟକମାନେ ଯେପରି ତାଙ୍କ କଥାରେ ରହିବେ ସେଥିପାଇଁ ଏଭଳି ପକେଟ୍ ଖର୍ଚ୍ଚ ବ୍ୟବସ୍ଥା ହୋଇଛି ବୋଲି ଦଳୀୟ ମହଲରେ ଚର୍ଚ୍ଚା ।
