ଭୁବନେଶ୍ୱର : ସୂଚନା ଅଧିକାର ଆଇନ ବଳରେ ତଥ୍ୟ ଦେବାରେ ଅବହେଳା କରିଥିବା ଯୋଗୁ ୧୪୪ଜଣ ଅଫିସର୍ଙ୍କୁ ଅର୍ଥ ଦଣ୍ଡରେ ଦଣ୍ଡିତ କରାଯାଇଛି । ସେମାନଙ୍କଠୁ ପ୍ରାୟ ୨୨ଲକ୍ଷ ଟଙ୍କାରୁ ଊଦ୍ଧ୍ୱର୍ ଜୋରିମାନା ଆଦାୟ ହୋଇଛି ବୋଲି ସୂଚନା ଓ ଲୋକସମ୍ପର୍କ ମନ୍ତ୍ରୀ ପ୍ରତାପ ଜେନା କହିଛନ୍ତି ।
ବିଧାନସଭାରେ କଂଗ୍ରେସ ବିଧାୟକ ଚନ୍ଦ୍ରଶେଖର ମାଝୀଙ୍କ ଏକ ଲିଖିତ ପ୍ରଶ୍ନର ଉତ୍ତର ଦେଇ ଶ୍ରୀ ଜେନା କହିଛନ୍ତି ଯେ ରାଜ୍ୟ ସୂଚନା ଆୟୋଗଙ୍କ ପାଖରେ ଚଳିତବର୍ଷ ଫେବୃୟାରୀ ଶେଷସୁଦ୍ଧା ୯୦୫୭ଟି ଦ୍ୱିତୀୟ ଅପିଲ୍ ଓ ୧୬୧୨ଟି ଅଭିଯୋଗ ବିଚାରାଧୀନ ରହିଛି । ୨୦୧୫ ମସିହାରୁ ୨୦୧୮ ଫେବୃୟାରୀ ଶେଷ ସୁଦ୍ଧା ମୋଟ ୪୮୮୬ଟି ଦ୍ୱିତୀୟ ଅପିଲ୍ ଓ ୫୨୬ଟି ଅଭିଯୋଗ ମାମଲାର ଶୁଣାଣି କରାଯାଇ ଚୂଡ଼ାନ୍ତ ରାୟ ପ୍ରକାଶ ପାଇଛି । ସେହିଭଳି ଫଇସଲା ହୋଇଥିବା ଅଭିଯୋଗ ମାମଲା ମଧ୍ୟରୁ ୨୦୧୫ରେ ୧୬ଟି, ୨୦୧୬ରେ ୧୩୬ଟି, ୨୦୧୭ରେ ୨୭୬ଟି ଓ ୨୦୧୮ ଦୁଇ ମାସ ମଧ୍ୟରେ ୪୫ଟିର ଫଇସଲା ହୋଇଛି । ସୂଚନା ପ୍ରଦାନରେ ଅବହେଳା ଯୋଗୁ ୧୦୪ଟି ବିଭିନ୍ନ କାର୍ଯ୍ୟାଳୟର ୧୪୪ଜଣ ଅଫିସର୍ଙ୍କୁ ଅର୍ଥ ଦଣ୍ଡ ଦେବାକୁ ପଡ଼ିଛି । ସେମାନଙ୍କଠାରୁ ୨୨ଲକ୍ଷ ୨୩ହଜାର ୯୯୯ଟଙ୍କା ଆଦାୟ ହୋଇଥିବାବେଳେ ଆୟୋଗଙ୍କ ରାୟ ବିରୋଧରେ ୧୮ଜଣ ଓଡ଼ିଶା ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି । ଏହି ସମସ୍ତ ଅଫିସର୍ କୋର୍ଟରୁ ମଧ୍ୟବର୍ତ୍ତୀକାଳୀନ ରହିତାଦେଶ ପାଇଥିବା ଶ୍ରୀ ଜେନା ଦର୍ଶାଇଛନ୍ତି ।
