ଭୁବନେଶ୍ୱର(ଓଡ଼ିଶା ୱେୟାର): ବରଗଡ଼ ଜିଲ୍ଲାରେ ବସୁଧା ଯୋଜନାରେ ୨ଟି ମେଗା ପାଇପ ଜଳଯୋଗାଣ ପ୍ରକଳ୍ପର ଟେଣ୍ଡରକୁ ରାଜ୍ୟ କ୍ୟାବିନେଟ ମଞ୍ଜୁରୀ ପ୍ରଦାନ କରିଛନ୍ତି । ୭୨୪.୦୬କୋଟି ଟଙ୍କା ବ୍ୟୟରେ ଏହି ଦୁଇ ମେଗା ପ୍ରକଳ୍ପରେ ୭ଟି ବ୍ଲକର ୭.୩୭ଲକ୍ଷ ଲୋକ ଉପକୃତ ହେବେ ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଭିଡିଓ କନଫରେନ୍ସିଂ ମାଧ୍ୟମରେ ଆୟୋଜିତ କ୍ୟାବିନେଟ ବୈଠକରେ ବରଗଡ଼ ଜିଲ୍ଲାରେ କାର୍ଯ୍ୟକାରୀ ହେବାକୁ ଥିବା ଦୁଇଟି ମେଗା ପାଇପ୍ ପାନୀୟ ଜଳ ପ୍ରକଳ୍ପର ଟେଣ୍ଡରକୁ ମଞ୍ଜୁରୀ ମିଳିଛି । ସର୍ବନିମ୍ନ ଟେଣ୍ଡର ଦର ୨୧୫.୩୧ଲକ୍ଷ ଟଙ୍କାରେ ମେସର୍ସ କେଇସି-କାଭେରୀ(ଯୌଥ ଉଦ୍ୟୋଗ) ୱାରଙ୍ଗଲକୁ ବରଗଡ଼ ଜିଲ୍ଲାର ୨ଟି ବ୍ଲକ ଅଧୀନରେ ଥିବା ୪୩ଟି ପଂଚାୟତର ୧୬୬ଟି ଗାଁକୁ ପାନୀୟ ଜଳ ଯୋଗାଣ ପ୍ରକଳ୍ପ କରିବାକୁ ଅନୁମତି ଦିଆଯାଇଛି । ଏଥିରେ ବରପାଲି ବ୍ଲକରେ ଥିବା ୨୨ଟି ପଂଚାୟତର ୧.୦୧ଲକ୍ଷ ଓ ଭେଡେନ ବ୍ଲକର ୧.୨୭ଲକ୍ଷ ଲୋକଙ୍କୁ ପାନୀୟ ଜଳ ଯୋଗାଣ କରାଯାଇପାରିବ ।
ସେହିପରି ମେସର୍ସ ଏଲଆଣ୍ଡଟି, ଚେନ୍ନାଇକୁ ୫୦୮.୭୫କୋଟି ଟଙ୍କାର ସର୍ବନିମ୍ନ ଟେଣ୍ଡର ମେଗା ପାନୀୟ ଜଳ ପ୍ରକଳ୍ପ ନିମନ୍ତେ ଅନୁମତି ମିଳିଛି । ବରଗଡ଼ର ୫ଟି ବ୍ଲକର ୯୫ଟି ପଂଚାୟତର ପ୍ରାୟ ୫.୦୮ଲକ୍ଷ ଲୋକଙ୍କୁ ପାନୀୟ ଜଳ ଯୋଗାଣ କରିବାରେ ଏହି ପ୍ରକଳ୍ପ ସକ୍ଷମ ହେବ । ଏଥିରେ ଅତାବିରା ବ୍ଲକର ୧.୩୯ଲକ୍ଷ, ବରପାଲି ବ୍ଲକର ୫୭୬୬,ବିଜେପୁର ବ୍ଲକର ୧.୦୬ଲକ୍ଷ, ଗାଇସିଲେଟ୍ ବ୍ଲକର ୯୨.୯୭୬ଜଣ ଓ ବରଗଡ଼ ବ୍ଲକର ୧.୬୩ଲକ୍ଷ ଲୋକଙ୍କୁ ପାନୀୟ ଜଳ ସୁବିଧା ମିଳିବ । ଏହି ପ୍ରକଳ୍ପକୁ ସମ୍ପୃକ୍ତ ଠିକା ସଂସ୍ଥା ୨୪ମାସ ମଧ୍ୟରେ ଶେଷ କରିବାକୁ ଲକ୍ଷ୍ୟଧାର୍ଯ୍ୟ ହୋଇଛି ।
