ଭୁବନେଶ୍ୱର : ବିଜେପି ଓ କଂଗ୍ରେସଠାରୁ ସମଦ୍ୱରତ୍ୱ ରକ୍ଷା ପାଇଁ ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ବାରମ୍ବାର ଦୃଢୋକ୍ତିର ବିପରୀତରେ ଯାଇ ବରିଷ୍ଠ ମନ୍ତ୍ରୀ ତଥା ବିଜେଡି ଉପସଭାପତି ଡାକ୍ତର ଦାମୋଦର ରାଉତ ରାଜନୀତିକ ମେଂଟ ନିମନ୍ତେ ଆଜି କଂଗ୍ରେସକୁ ଖୋଲା ଅଫର୍ ଦେଇଛନ୍ତି । ତେବେ ଏଭଳି ଏକ ଗୁରୁତ୍ୱପୂର୍ଣ୍ଣ ଅଫର୍ କଦାପି ଦାମଙ୍କ ନିଜସ୍ୱ ମତାମତ ନୁହେଁ ଓ କାହା ଇଙ୍ଗିତରେ ଦାମ ଏଭଳି ବୟାନ ଦେଲେ ତାକୁ ନେଇ ପାୱାର କରିଡର୍ରେ ଚର୍ଚ୍ଚା ।
ଡାକ୍ତର ରାଉତ ଆଜି ନିଜଆଡ଼ୁ ଗଣମାଧ୍ୟମକୁ ପ୍ରତିକ୍ରିୟା ଦେଇ କହିଛନ୍ତି ଯେ, ବିଜେପି ଏକ ସାମ୍ପ୍ରଦାୟିକ ଶକ୍ତି । ନରେନ୍ଦ୍ର ମୋଦି ଓ ତାଙ୍କ ମନ୍ତ୍ରୀମାନେ ଦଳୀୟ ଓ ଆଂଚଳିକ ମନୋଭାବ ନେଇ କାର୍ଯ୍ୟ କରୁଛନ୍ତି । ତେଣୁ ସାମ୍ପ୍ରଦାୟିକ ଶକ୍ତିିିକୁ ରୋକିବାକୁ ହେଲେ ଅଣବିଜେପି ଦଳଗୁଡ଼ିକ ଏକଜୁଟ ହେବାର ଆବଶ୍ୟକତା ରହିଛି । ଦଳମତ ନିର୍ବିଶେଷରେ ସମସ୍ତେ ଅଣବିଜେପି ଶକ୍ତିକୁ ବିରୋଧ କରିବା ଜରୁରୀ ହୋଇପଡ଼ିଛି । କଂଗ୍ରେସ ଏକ ଧର୍ମନିରପେକ୍ଷ ଦଳ, ତା’ ସହ ମିଶି ନିର୍ବାଚନ ଲଢ଼ିବାରେ ବିଜେଡିର ଅସୁବିଧା ନାହିଁ । କଂଗ୍ରେସ ମଧ୍ୟ ଏହାକୁ ସ୍ୱାଗତ କରିବା ଉଚିତ୍ । ୧୪୭ ଆସନ ମଧ୍ୟରୁ କଂଗ୍ରେସର କେଉଁଠି ଜିତିବାର ସମ୍ଭାବନା ଅଛି, ତାକୁ ପ୍ରକାଶ କରୁ । ଆମେ ତାକୁ ସ୍ୱାଗତ କରିବୁ । ତେବେ ମେଂଟ ସମ୍ପର୍କରେ ଚୂଡ଼ାନ୍ତ ନିଷ୍ପତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନେବେ । ଦାମ କହିଛନ୍ତି ଯେ ଗୁଜରାଟରେ ବିଜେପିର ମୁକାବିଲା ପାଇଁ ସବୁ ଦଳ ଏକାଠି ହୋଇଛନ୍ତି । କିନ୍ତୁ ଏଠି ବିଜେଡି ଏକାକୀ ଯଥେଷ୍ଟ । ବିଜେପିର ମିଶନ ୧୨୦ କେବଳ ଦିବାସ୍ୱପ୍ନ । ୨୦୧୯ ନିର୍ବାଚନରେ ବିଜେଡି ପୁଣିଥରେ କ୍ଷମତାକୁ ଆସିବ । ତେବେ ବିଜେପିକୁ ବିରୋଧ କରିବାରେ ଯିଏ ସହଯୋଗ କରିବ ତାକୁ ବିଜେଡି ସ୍ୱାଗତ କରିବ । ସାରାଦେଶରେ ବାମପନ୍ଥୀ ଦଳଗୁଡ଼ିକର ପ୍ରାଧାନ୍ୟ ହ୍ରାସ ପାଇଲାଣି । କଂଗ୍ରେସ ଯଦି ସାମ୍ପ୍ରଦାୟିକତା ଦଳ(ବିଜେପି) ବିରୋଧରେ ଏକଜୁଟ ହେଇ ଲଢ଼ିବାକୁ ଆଗେଇ ଆସିବ, ଆମେ ସ୍ୱାଗତ କରିବୁ । ଅଣବିଜେପି ଦଳଗୁଡ଼ିକ ଏକ ହେବା ଦରକାର । ଆଦର୍ଶଗତ ଦୃଷ୍ଟିରୁ କଂଗ୍ରେସ ଆମର ଶତ୍ରୁ ନୁହେଁ । ରାଜନୀତିକ ମେଂଟ ପାଇଁ ବିଜେଡି ଓ କଂଗ୍ରେସ କଥାବାର୍ତା କରିବାରେ ଅସୁବିଧା ନାହିଁ । ବିଜେପି ଆମର ଆଦର୍ଶଗତ ଶତ୍ରୁ, କଂଗ୍ରେସ ନୁହେଁ । ତେଣୁ କଂଗ୍ରେସ କେଉଁ ଆସନରେ ଜିତିବାର ସମ୍ଭାବନା ଅଛି ତାହା ପ୍ରକାଶ କରୁ । ଏହି ପ୍ରସ୍ତାବକୁ ବିରୋଧୀ ଦଳ ସ୍ୱାଗତ କରିବା ଉଚିତ୍ । ଅନ୍ୟପକ୍ଷରେ ଡାକ୍ତର ରାଉତଙ୍କ ଏହି ଅଫର୍କୁ କଂଗ୍ରେସ ପକ୍ଷରୁ ସଙ୍ଗେସଙ୍ଗେ ପ୍ରତ୍ୟାଖ୍ୟାନ କରାଯାଇଛି । ରାଜ୍ୟ କଂଗ୍ରେସ ପକ୍ଷରୁ ମହମ୍ମଦ ମୋକିମ୍ ଏଭଳି ଅଫର୍କୁ ଖାରଜ କରିବା ସହ ଓଡ଼ିଶାରେ ବିଜେଡି ଦୁର୍ବଳ ହୋଇଥିବା ଦାମବାବୁ ସ୍ୱୀକାର କରୁଛନ୍ତି । କଂଗ୍ରେସ ଏବେ ବି ରାଜ୍ୟରେ ଏକାକୀ ସରକାର ଗଢ଼ିବାକୁ ସକ୍ଷମ ବୋଲି ସେ କହିଛନ୍ତି । ସେହିପରି ବିଜେଡି ସାଂସଦ କଳିକେଶ ସିଂହଦେଓ ମଧ୍ୟ ଏହି ପ୍ରସଙ୍ଗରେ ପ୍ରତିକ୍ରିୟା ଦେଇ କହିଛନ୍ତି ଯେ, ଉଭୟ କଂଗ୍ରେସ ଓ ବିଜେପିଠାରୁ ସମଦ୍ୱରତ୍ୱ ରକ୍ଷା କରିବାରେ ବିଜେଡି ବିଶ୍ୱାସ କରେ । ରାଜ୍ୟରେ କଂଗ୍ରେସ ସହ ମେଂଟର କିଛି ଆବଶ୍ୟକତା ନାହିିଁ । ବିଜେପି ଯେଉଁଠାରେ ଶକ୍ତ, ସେଠାରେ ମେଂଟର ଆବଶ୍ୟକତା ଥାଇପାରେ । ଓଡ଼ିଶାରେ ବିଜେଡି ଏକା ସରକାର ଗଢ଼ିବାରେ ସକ୍ଷମ ।
ତେଣୁ ଉଭୟ କଂଗ୍ରେସ ଓ ନିଜ ଦଳ ଭିତରେ ଏଭଳି ବିରୋଧାଭାସ ମଧ୍ୟରେ ଡାକ୍ତର ରାଉତ କାହା ଇସାରାରେ ଏହି ମେଂଟ ଅଫର୍ ଦେଲେ ତାହା ବିଜେଡି ମହଲରେ ଚର୍ଚ୍ଚାର ବିଷୟ ହୋଇଛି । ତୃତୀୟ ମହଲା ସୂତ୍ରରୁ ମିଳିଥିବା ସୂଚନା ଅନୁସାରେ ଡାକ୍ତର ରାଉତ ଆଜି କ୍ୟାବିନେଟ୍ ବୈଠକ ପୂର୍ବରୁ ମୁଖ୍ୟମନ୍ତ୍ରୀ ଓ ତାଙ୍କ ପରାମର୍ଶଦାତାଙ୍କୁ ସାକ୍ଷାତ କରିଥିଲେ । ଡାକ୍ତର ରାଉତଙ୍କୁ ଗଣମାଧ୍ୟମ ସମ୍ମୁଖରେ ଏଭଳି ପ୍ରତିକ୍ରିୟା ରଖିବା ପାଇଁ କୁହାଯାଇଥିଲା । ଏହାପଛରେ ଉଭୟ ଦଳ ଓ କଂଗ୍ରେସ ମଧ୍ୟରେ କ’ଣ ପ୍ରତିକ୍ରିୟା ଆସୁଛି ତାକୁ ପରଖିବା ସହ ଭବିଷ୍ୟତ ପାଇଁ ମାର୍ଗ ପ୍ରଶସ୍ତ କରିବା ମୁଖ୍ୟ ଉଦ୍ଦେଶ୍ୟ ଥିଲା ବୋଲି କୁହାଯାଉଛି ।
