ଭୁବନେଶ୍ୱର(ଓଡ଼ିଶା ୱେୟାର): ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ନିଜ ଜିଲ୍ଲା ଗଞ୍ଜାମରେ ବିଜେଡି ବିପର୍ଯ୍ୟସ୍ତ ହେବାରେ ଲାଗିଛି । ଦଳର ଦୁଇ ଗୋଷ୍ଠୀଙ୍କ ମଧ୍ୟରେ ଛକାପଞ୍ଝା ଓ ବିବାଦ ଏତେ ତୀବ୍ର ହୋଇଛି ଯେ ଆଜି ନବୀନଙ୍କ ହସ୍ତକ୍ଷେପ ସତ୍ତ୍ୱେ ଥମିବାର ନାଁ ଧରିନି । ଓଲଟା ଗୋଟିଏ ଗୋଷ୍ଠୀ ଆବଶ୍ୟକ ପଡ଼ିଲେ ବିଜେପି ସହ ସାମିଲ ହେବ ବୋଲି ଆଜି ରୋକଠୋକ୍ ଜଣାଇ ଦେଇଛି । ଶଙ୍ଖ ଭବନରେ ବିଜେଡି ସମନ୍ୱୟ କମିଟି ଅଧ୍ୟକ୍ଷ ଦେବୀପ୍ରସାଦ ମିଶ୍ରଙ୍କ ତାଳିପକା ଉଦ୍ୟମ, ନବୀନ ନିବାସରେ ନବୀନଙ୍କ ଦୁଇଧାଡ଼ିଆ ଆଶ୍ୱାସନା କିଛି କାମ ଦେଇନି ଓ ଉଭୟ ଗୋଷ୍ଠୀ ପରସ୍ପର ଜିଦରେ ଅଟଳ ରହିଥିବା ଜଣାପଡ଼ିଛି ।
ମିଳିଥିବା ସୂଚନା ଅନୁସାରେ, ଗଞ୍ଜାମରେ ବିଜେଡି ଜିଲ୍ଲା ସଭାପତି ରମେଶଚନ୍ଦ୍ର ଚ୍ୟାଉପଟ୍ଟନାୟକ ଓ ବ୍ରହ୍ମପୁରର ପୂର୍ବତନ ବିଧାୟକ ବିକ୍ରମ ପଣ୍ଡାଙ୍କ ମଧ୍ୟରେ ଚାଲିଥିବା ଗୋଷ୍ଠୀକନ୍ଦଳର ସମାଧାନ ପାଇଁ ଆଜି ସମସ୍ତଙ୍କୁ ଭୁବନେଶ୍ୱର ଡକାଯାଇଥିଲା । ସମନ୍ୱୟ କମିଟି ଅଧ୍ୟକ୍ଷ ଦେବୀ ମିଶ୍ରଙ୍କ ଉପସ୍ଥିତିରେ ଉଭୟ ଗୋଷ୍ଠୀ ପରସ୍ପରକୁ ଦୋଷାରୋପ କରିବା ସହ ଦଳୀୟ ସଂଗଠନକୁ ଦୁର୍ବଳ କରୁଥିବାର ଅଭିଯୋଗ ଆଣିଥିଲେ । ଏପରିକି ପରସ୍ପର ଗୋଷ୍ଠୀ ମଧ୍ୟରେ ଯୁକ୍ତିତର୍କ ଏଭଳି ସ୍ତରକୁ ଯାଇଥିଲା ଯେ, ଦେବୀଙ୍କ ତାଳିପକା ଉଦ୍ୟମ ଫେଲ୍ ମାରିଥିଲା । ପରେ ଉଭୟ ପକ୍ଷକୁ ବୁଝାସୁଝା କରି ନବୀନ ନିବାସ ନିଆଯାଇଥିଲା । ସେଠାରେ ନବୀନ ଏସବୁ ବିଶେଷକିଛି ନଶୁଣି ସଂଗଠନ ପାଇଁ ସମସ୍ତେ ମିଳିମିଶି କାମ କରିବାକୁ ପରାମର୍ଶ ଦେଇଥିଲେ । ସଭ୍ୟ ସଂଗ୍ରହ ଅଭିଯାନକୁ ତ୍ୱରାନ୍ୱିତ କରିବାକୁ କହିବା ସହ ଲୋକଙ୍କ ସମସ୍ୟା ପ୍ରତି ସଚେତନ ହେବାକୁ କହିଥିଲେ । ଏହାସହିତ ସେ ଖୁବଶୀଘ୍ର ଗଞ୍ଜାମ ଗସ୍ତରେ ଯିବେ ବୋଲି ସୂଚନା ଦେଇଥିବା ଜଣାପଡ଼ିଛି ।
ନବୀନଙ୍କ ଏଭଳି ଆଶ୍ୱାସନା କିନ୍ତୁ ଦୁଇ ଗୋଷ୍ଠୀ ମଧ୍ୟରେ ବଢ଼ୁଥିବା ବିବାଦରେ ପୂର୍ଣ୍ଣଚ୍ଛେଦ ପକାଇ ପାରିନାହିଁ । ଓଲଟା ବ୍ରହ୍ମପୁର ମହାନଗର ନିଗମର ଅଧିକାଂଶ କର୍ପୋରେଟର ଏବେ ବିଜେପି ସହ ଲିଙ୍କରେ ରହିଥିବା ଆଜିର ବୈଠକରୁ ସ୍ପଷ୍ଟ ହୋଇଯାଇଛି ।
ଏହି ବୈଠକ ପରେ ସମନ୍ୱୟ କମିଟି ଅଧ୍ୟକ୍ଷ ଦେବୀପ୍ରସାଦ ମିଶ୍ର ଗଣମାଧ୍ୟମକୁ ସୂଚନା ଦେଇ କହିଥିଲେ ଯେ, ନବୀନ ନିବାସରେ ଗଞ୍ଜାମ ନେତାମାନେ ନବୀନଙ୍କୁ ଭେଟିଲେ । ବ୍ରହ୍ମପୁର ମହାନଗର ନିଗମର ମେୟର, ୩୪ଜଣ କର୍ପୋରେଟର, ପୂର୍ବତନ ବିଧାୟକ ବିକ୍ରମ ପଣ୍ଡା ଓ ରମେଶ ଚନ୍ଦ୍ର ଚ୍ୟାଉପଟ୍ଟନାୟକଙ୍କ ସହ ସାଂଗଠନିକ ପ୍ରସଙ୍ଗରେ ଆଲୋଚନା ହୋଇଛି । ବରିଷ୍ଠ ବିଜେଡି ନେତା ପ୍ରଦୀପ ଅମାତ୍ ମଧ୍ୟ ଉପସ୍ଥିତ ଥିଲେ । ପରସ୍ପର ମଧ୍ୟରେ ସମନ୍ୱୟ ରଖି ସଭ୍ୟ ସଂଗ୍ରହ କାର୍ଯ୍ୟକୁ ତ୍ୱରାନ୍ୱିତ କରିବା ସହ ବିକାଶମୂଳକ କାର୍ଯ୍ୟକୁ ଆଗେଇ ନେବା ଉପରେ ଆଲୋଚନା ହୋଇଛି । ଏନେଇ ନବୀନ ପଟ୍ଟନାୟକଙ୍କୁ ଅବଗତ କରାଗଲା ବୋଲି ଶ୍ରୀ ମିଶ୍ର କହିଛନ୍ତି ।
ସେହିପରି ପୂର୍ବତନ ବିଧାୟକ ବିକ୍ରମ ପଣ୍ଡା ଗଣମାଧ୍ୟମକୁ ପ୍ରତିକ୍ରିୟାରେ କହିଛନ୍ତି ଯେ, ମହାନଗର ନିଗମରେ ଯେଉଁ ବିବାଦ ଅଛି ତାହା ମହାନଗରରେ ତୁଟିବ । ସେସବୁ ଆଭ୍ୟନ୍ତରୀଣ ମତପାର୍ଥକ୍ୟ । କିନ୍ତୁ ସମସ୍ତେ ଏକ ହୋଇ କାମ କରିବେ ବୋଲି ସହମତି ହୋଇଛନ୍ତି । ରାମଲିଙ୍ଗମ ଟ୍ୟାଙ୍କକୁ ନେଇ ସମସ୍ୟା ଥିଲା । ନବୀନ ପଟ୍ଟନାୟକଙ୍କ କଥା ଆସିଲେ ସମସ୍ତେ ଏକଜୁଟ ବୋଲି ଶ୍ରୀ ପଣ୍ଡା କହିଛନ୍ତି ।
ଅନ୍ୟପକ୍ଷରେ ବିଜେଡି ସୂତ୍ରରୁ ମିଳିଥିବା ସୂଚନା ଅନୁସାରେ, ଆଜିର ବୈଠକ ପରେ ୧୦ରୁ ଅଧିକ କର୍ପୋରେଟର ଖୋଲାଖୋଲି ଭାବେ ଅସନ୍ତୋଷ ବ୍ୟକ୍ତ କରିବା ସହ ସେମାନେ ଆଉ ଦଳୀୟ ନେତାଙ୍କ ଭରସାରେ ରହିବେ ନାହିଁ ବୋଲି ରୋକଠୋକ୍ ଶୁଣାଇ ଦେଇଥିବା ଜଣାପଡ଼ିଛି ।
