ଭୁବନେଶ୍ୱର,: ବରିଷ୍ଠ ମନ୍ତ୍ରୀ ତଥା ବିଜେଡି ଉପସଭାପତି ଡାକ୍ତର ଦାମୋଦର ରାଉତ ‘ସ୍ୱାମୀ ଛାଡ଼ି ଅଙ୍ଗନୱାଡି’ ପ୍ରସଙ୍ଗରେ ଗତକାଲି ଦୁଃଖପ୍ରକାଶ କରିବା ପରେ ଆଜି ଗଣମାଧ୍ୟମ ସମ୍ମୁଖରେ କ୍ଷମା ମାଗିଛନ୍ତି । ତଥାପି ଏହି ପ୍ରସଙ୍ଗ ଥମିବାର ନାଁ ନେଉନି । ଏପଟେ ଦାମଙ୍କ ଏଭଳି ବୟାନକୁ ମଧ୍ୟ ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ନାପସନ୍ଦ କରିଛନ୍ତି ଓ ଗ୍ରହଣୀୟ ନୁହେଁ ବୋଲି କହିଛନ୍ତି । ସାମ୍ବାଦିକଙ୍କୁ ସୂଚନା ଦେଇ ଡାକ୍ତର ରାଉତ କହିଛନ୍ତି ଯେ, “ସେ କାହା ପ୍ରତି ଉଦ୍ଦେଶ୍ୟମୂଳକ ଭାବେ ଏଭଳି ମନ୍ତବ୍ୟ ଦେଇନାହାନ୍ତି । କେବଳ ଏକ ଉପଲକ୍ଷ୍ୟ ଦେଇ ଏହା କହିଥିଲି । ଗତକାଲି ଏଥିପାଇଁ ଦୁଃଖପ୍ରକାଶ କରିଥିଲି । ଯଦି ମୋ’ କଥା କାହା ମନରେ ବ୍ୟଥା ଦେଇଥିବ ସେଥିପାଇଁ କ୍ଷମା ମାଗୁଛି ।” ଏହା ସତ୍ତେ୍ୱ ଯଦି କିଏ ଏହାକୁ ଅନ୍ୟ ଅର୍ଥରେ ନେବ ତା’ହେଲେ ମୁଁ କିଛି କରିପାରିବି ନାହିଁ । ଲୋକ ଚାହିଁବା ଭଳି କଥା ସିଏ କୁହନ୍ତି । କିନ୍ତୁ ଆମ ଦଳରେ କିଛି ପରଶ୍ରୀକାତର ଲୋକ ଅଛନ୍ତି । କେହି କାହାର ଶିରି ଦେଖିପାରନ୍ତି ନାହିଁ । ସେମାନେ ଅନ୍ୟ ଦଳର କଥା କହି ସୁଖ ପାଉଛନ୍ତି । କିଏ କ’ଣ କରୁଛନ୍ତି ଓଡ଼ିଶାର ଲୋକ ଜାଣୁଛନ୍ତି । ଠିକଣା ସମୟରେ ସେମାନଙ୍କୁ ଉଚିତ୍ ଜବାବ ଦେବେ । ତେବେ ମୋ’ ଦଳ ଓ ନେତା ବିଷୟରେ କିଏ କହିଲେ ମୁଁ ତାକୁ କଡ଼ା ଜବାବ ଦେବି ଡାକ୍ତର ରାଉତ ସ୍ପଷ୍ଟ କରିଛନ୍ତି ।” ଅନ୍ୟପକ୍ଷରେ ଆଜି ଇଣ୍ଡିଆନ ଏକ୍ସପ୍ରେସ୍ର ଏକ କାର୍ଯ୍ୟକ୍ରମରେ ଯୋଗ ଦେଇ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ କହିଛନ୍ତି ଯେ, ରାଜନୀତିରେ ପରସ୍ପରକୁ ବ୍ୟକ୍ତିଗତ ଭାବେ ଆକ୍ଷେପକୁ ସେ ପସନ୍ଦ କରନ୍ତି ନାହିଁ । ଏଭଳି ଆଚରଣ ଖରାପ ଓ ଅଗ୍ରହଣୀୟ । ସେ ନିଜେ କେବେ ବି କାହା ନାଁ ନେଇ ବ୍ୟକ୍ତିଗତ ଭାବେ ଆକ୍ଷେପ କରନ୍ତି ନାହିଁ । ମନ୍ତ୍ରୀ ଡାକ୍ତର ରାଉତଙ୍କ ନା’ ନେଇ ଶ୍ରୀ ପଟ୍ଟନାୟକ କହିଥିଲେ ଯେ, ଏଭଳି ମନ୍ତବ୍ୟ ଦେଇଥିବା ଯୋଗୁ ସେ ତାଙ୍କ ସହ କଥା ହୋଇଛନ୍ତି । ଶାସକ ଦଳ ପକ୍ଷରୁ ମଧ୍ୟ ସେଭଳି ବ୍ୟକ୍ତିଗତ ଆକ୍ଷେପ କରାଯିବା କଥା ନୁହେଁ ବୋଲି ସେ ସ୍ୱୀକାର କରିଛନ୍ତି । ତେବେ ଦାମଙ୍କ କ୍ଷମା ମାଗିବା ସତ୍ତେ୍ୱ ବିଜେପି ଏହି ପ୍ରସଙ୍ଗକୁ ବଞ୍ଚାଇ ରଖିବାକୁ ଚାହୁଁଛି । ବିଜେପି ନେତ୍ରୀ ଡଃ ଲେଖାଶ୍ରୀ ସାମନ୍ତସିଂହାର କହିଛନ୍ତି ଯେ, ଆନ୍ତରିକତା ନଥିବା ଭଳି ଦାମବାବୁ କ୍ଷମା ମାଗିଛନ୍ତି । ମହିଳାଙ୍କ ପ୍ରତି ଯେଭଳି ଆଚରଣ ଦାମବାବୁ କରିଛନ୍ତି ସେଥିପାଇଁ ମୁଖ୍ୟମନ୍ତ୍ରୀ ନିଜେ ଗଣମାଧ୍ୟମ ସମ୍ମୁଖକୁ ଆସି ପ୍ରତିକ୍ରିୟା ରଖିବା ଜରୁରୀ ହୋଇପଡ଼ିଛି । ଆଜି ବିଜେପି ମହିଳା ମୋର୍ଚ୍ଚା ପକ୍ଷରୁ ପିଏମ୍ଜି ଛକରେ ବିକ୍ଷୋଭ ପ୍ରଦର୍ଶନ କରାଯିବା ସହ ତାଙ୍କର କୁଶପୁତ୍ତଳିକା ଦାହ ହୋଇଛି ।
