ଭୁବନେଶ୍ୱର : ହାଇସ୍ପିଡ୍ ଟ୍ରେନ୍ ନିମନ୍ତେ ଆଲୁମିନିୟମରେ ପ୍ରସ୍ତୁତ କୋଚ୍ ନିର୍ମାଣ ପାଇଁ ଓଡ଼ିଶା ଆଗ୍ରହ ପ୍ରକାଶ କରିଛି । ରାଜ୍ୟରେ ଆଲୁମିୟନିମ ଉତ୍ପାଦନକୁ ଦୃଷ୍ଟିରେ ରଖି ଓଡ଼ିଶା ସରକାର ଏହି ହାଇସ୍ପିଡ୍ ଟ୍ରେନ୍ ପାଇଁ ଇଣ୍ଟିଗ୍ରେଟେଡ୍ କୋଚ୍ ଫ୍ୟାକ୍ଟ୍ରି ସ୍ଥାପନ କରିବାକୁ କେନ୍ଦ୍ର ସରକାରଙ୍କୁ ପ୍ରସ୍ତାବ ଦେଇଛନ୍ତି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଆଜି କେନ୍ଦ୍ର ରେଳମନ୍ତ୍ରୀ ପୀୟୁଷ ଗୋଏଲଙ୍କୁ ଚିଠି ଲେଖି କହିଛନ୍ତି ଯେ, ୨୦୨୦ ମସିହା ସୁଦ୍ଧା ଆଲୁମିନିୟମ କୋଚ୍ ବିଶିଷ୍ଟ ହାଇସ୍ପିଡ୍ ଟ୍ରେନ୍ ‘ଟ୍ରେନ୍ ୨୦’କୁ କାର୍ଯ୍ୟକ୍ଷମ କରିବା ପାଇଁ ନିଷ୍ପତ୍ତି ନେଇଛି । ଓଡ଼ିଶା ଦେଶରେ ସର୍ବାଧିକ ଆଲୁମିନିୟମ୍ ଉତ୍ପାଦନକାରୀ ରାଜ୍ୟ ଓ ପ୍ରାୟ ୫୬% ସ୍ମେଲଟିଂ କ୍ଷମତା ରହିଛି । ରାଜ୍ୟ ସରକାର ଏକ ସମର୍ପିତ ଆଲୁମିନିୟମ ପାର୍କ ବିକଶିତ କରିବାକୁ ଯାଉଛନ୍ତି ଯେଉଁଠି ଏହି ଟ୍ରେନ୍ କୋଚ୍ ନିର୍ମାଣ ପାଇଁ ତରଳ ଆଲୁମିନିୟମକୁ ସିଧାସଳଖ ନାଲ୍କୋର ସ୍ମେଲଟରରୁ ଅଣାଯାଇପାରିବ । ରାଜ୍ୟରେ ଏହି ସୁବିଧା ଥିବାରୁ କୋଚ୍ ଉତ୍ପାଦନ ଖର୍ଚ୍ଚ ମଧ୍ୟ ବହୁ ପରିମାଣରେ ହ୍ରାସ ପାଇବ । ରାଜ୍ୟ ସରକାର ମଧ୍ୟ ନିର୍ମାଣ କ୍ଷେତ୍ରରେ ପୁଞ୍ଜିନିବେଶ ପାଇଁ ଚିହ୍ନଟ କରିଥିବା ୫ଟି ପ୍ରମୁଖ କ୍ଷେତ୍ର ମଧ୍ୟରେ ମେଟାଲ୍ ସେକ୍ଟର ରହିଛି । ତେଣୁ ଓଡ଼ିଶାରେ ହାଇସ୍ପିଡ୍ ଟ୍ରେନ୍ ନିମନ୍ତେ କୋଚ୍ ନିର୍ମାଣ ପାଇଁ ଏକ ଇଣ୍ଟିଗ୍ରେଟେଡ୍ କୋଚ୍ ଫ୍ୟାକ୍ଟ୍ରି ସ୍ଥାପନ ଦିଗରେ ବିଚାର କରିବାକୁ ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଚିଠି ଲେଖି ରେଳମନ୍ତ୍ରୀ ଶ୍ରୀ ଗୋଏଲଙ୍କୁ ଅନୁରୋଧ କରିଛନ୍ତି ।
