ଭୁବନେଶ୍ୱର : ରାଜ୍ୟର ୧୫ଟି ଜିଲ୍ଲାର ୭୦ଟି ବ୍ଲକ୍ ଅନ୍ତର୍ଗତ ୧୧୨୫ଟି ପଂଚାୟତ ମରୁଡ଼ି ପ୍ରଭାବିତ ବୋଲି ରାଜସ୍ୱ ଓ ବିପର୍ଯ୍ୟୟ ମନ୍ତ୍ରୀ ମହେଶ୍ୱର ମହାନ୍ତି କହିଛନ୍ତି । ଜିଲ୍ଲାପାଳମାନେ ଦେଇଥିବା ମରୁଡ଼ିଜନିତ କ୍ଷୟକ୍ଷତି ରିପୋର୍ଟ ଆଧାରରେ ମନ୍ତ୍ରୀ ଶ୍ରୀ ମହାନ୍ତି କହିଛନ୍ତି ଯେ ୭୦ ବ୍ଲକ୍ରେ ପ୍ରାୟ ୩ଲକ୍ଷ ୧୫ହଜାର ହେକ୍ଟର ଜମି ମରୁଡ଼ି ଯୋଗୁ ପ୍ରଭାବିତ ହୋଇଛି । ଆସନ୍ତା ୨୭ତାରିଖରେ ବିଭିନ୍ନ ବିଭାଗ ସହ ମରୁଡ଼ି ସଂକ୍ରାନ୍ତରେ ଆଲୋଚନା ହେବ ଓ ୩୦ ତାରିଖରେ ମୁଖ୍ୟମନ୍ତ୍ରୀଙ୍କୁ ଚୂଡ଼ାନ୍ତ ରିପୋର୍ଟ ପ୍ରଦାନ କରାଯିବ । ଅନ୍ୟପକ୍ଷରେ ରାଜ୍ୟ ସ୍ୱତନ୍ତ୍ର ରିଲିଫ କମିଶନର ବିଷ୍ଣୁପଦ ସେଠୀ କହିଛନ୍ତି ଯେ, ଜିଲ୍ଲାପାଳମାନେ ଦେଇଥିବା ମରୁଡ଼ି ରିପୋର୍ଟକୁ ଏବେ ତର୍ଜମା କରାଯାଉଛି । କେଉଁଠି କ’ଣ ତ୍ରୁଟିବିଚ୍ୟୁତି ରହିଛି ତାକୁ ଅନୁଧ୍ୟାନ କରାଯାଉଛି । ୩୦ ତାରିଖ ସୁଦ୍ଧା ଚୂଡ଼ାନ୍ତ ରିପୋର୍ଟ ପ୍ରସ୍ତୁତ କରାଯିବ ଓ ସରକାର ଏହି ଅବଧି ମଧ୍ୟରେ ରାଜ୍ୟରେ ବିଧିବଦ୍ଧ ମରୁଡ଼ି ଘୋଷଣା କରିବେ ।
