ଭୁବନେଶ୍ୱର : ମହାନଦୀ ଜଳକୁ ନେଇ ଛତିଶଗଡ଼ ଓ ଓଡ଼ିଶା ମଧ୍ୟରେ ବିବାଦର ସମାଧାନ ପାଇଁ କେନ୍ଦ୍ର କ୍ୟାବିନେଟ ଦ୍ୱାରା ଟ୍ରିବ୍ୟୁନାଲ ଗଠନକୁ ସବୁଜ ସଙ୍କେତ ମିଳିବାର ୩ସପ୍ତାହ ପରେ କେନ୍ଦ୍ର ସରକାର ୩ଜଣିଆ ସଦସ୍ୟ ବିଶିଷ୍ଟ ଟ୍ରିବ୍ୟୁନାଲ ଗଠନ କରିଛନ୍ତି । ଆନ୍ତଃ ରାଜ୍ୟ ନଦୀ ଜଳ ବିବାଦ ଆଇନ-୧୯୫୬ ଅନ୍ତର୍ଗତ ଏହି ଟ୍ରିବ୍ୟୁନାଲ ଗଠନ ହୋଇଛି ।
କେନ୍ଦ୍ର ଜଳ ସମ୍ପଦ ମନ୍ତ୍ରଣାଳୟ ପକ୍ଷରୁ ଆଜି ଏହି ଟ୍ରିବ୍ୟୁନାଲ ଗଠନ ବିଜ୍ଞପ୍ତି ପ୍ରକାଶ ପାଇଛି । ୩ଜଣିଆ ଟ୍ରିବ୍ୟୁନାଲର ଅଧ୍ୟକ୍ଷ ଭାବେ ସୁପ୍ରିମକୋର୍ଟ ଜଷ୍ଟିସ ଏଏମ ଖାନୱାଲିକର ଥିବାବେଳେ ପାଟନା ହାଇକୋର୍ଟର ଜଷ୍ଟିସ ଡଃ ରବି ରଞ୍ଜନ ଓ ଦିଲ୍ଲୀ ହାଇକୋର୍ଟର ଜଷ୍ଟିସ ଇନ୍ଦରମିତ କୌର ସଦସ୍ୟ ଅଛନ୍ତି । ପ୍ରଚଳିତ ଆଇନ ଅନୁସାରେ ଟ୍ରିବ୍ୟୁନାଲ ୩ବର୍ଷ ମଧ୍ୟରେ ନିଜର ରିପୋର୍ଟ ଦାଖଲ କରିବେ । ଆବଶ୍ୟକ ପଡ଼ିଲେ ଟ୍ରିବ୍ୟୁନାଲର କାର୍ଯ୍ୟକାଳ ଆଉ ୨ବର୍ଷ ବୃଦ୍ଧି କରାଯାଇପାରିବ । ସୂଚନାଯୋଗ୍ୟ ଓଡ଼ିଶା ସରକାରଙ୍କ ଆବେଦନ ଆଧାରରେ ସୁପ୍ରିମକୋର୍ଟ ମହାନଦୀ ଜଳ ବିବାଦର ସମାଧାନ ପାଇଁ ୨୦୧୮ ଜାନୁୟାରୀ ୨୩ ତାରିଖରେ ଟ୍ରିବ୍ୟୁନାଲ ଗଠନ ନିମନ୍ତେ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଥିଲେ ।
