ଭୁବନେଶ୍ୱର : ବହୁଚର୍ଚ୍ଚିତ କୁନ୍ଦୁଲି ନାବାଳିକା ଦୁଷ୍କର୍ମ ମାମଲାରେ ଏକ ନୂଆ ମୋଡ ଆସିଛି । ପୀଡ଼ିତାର ଅନ୍ତବସ୍ତ୍ରରେ ‘ ସିମେନ ’ ଦାଗ ନାହିଁ ବୋଲି କୋଲକାତାସ୍ଥିତ କେନ୍ଦ୍ରୀୟ ଫରେନ୍ସିକ ଲ୍ୟାବ ସ୍ପଷ୍ଟ କରିଛି । ପୂର୍ବରୁ ରାଜ୍ୟ ଫରେନ୍ସିକ ଲ୍ୟାବ ମଧ୍ୟ ପୀଡ଼ିତାର ଅନ୍ତବସ୍ତ୍ରରେ ସିମେନ ଦାଗ ନଥିବା କହିଥିଲା । କିନ୍ତୁ ଗଣମାଧ୍ୟମ ରିପୋର୍ଟରେ ପୀଡ଼ିତାର ଅନ୍ତବସ୍ତ୍ରରେ ସିମେନ ଦାଗ ରହିଥିବା ପ୍ରାରମ୍ଭିକ ତଦନ୍ତବେଳେ ଉଲ୍ଲେଖ ଥିବା ଦର୍ଶାଯାଇଥିଲା । ଯାହାକୁ ନେଇ ବିବାଦୀୟ ପରିସ୍ଥିତି ସୃଷ୍ଟି ହୋଇଥିଲା ଓ ଘଟଣାର କ୍ରାଇମବ୍ରାଞ୍ଚ ତଦନ୍ତ ନିର୍ଦ୍ଦେଶ ଦିଆଯାଇଥିଲା ।
କଟକସ୍ଥିତ ରାଜ୍ୟ କ୍ରାଇମବ୍ରାଞ୍ଚ କାର୍ଯ୍ୟାଳୟର ଏସପି ରାଧା ବିନୋଦ ପାଣିଗ୍ରାହୀ ଆଜି ଏକ ସାମ୍ବାଦିକ ସମ୍ମିଳନୀ କରି କହିଛନ୍ତି ଯେ, କୋଲକାତାସ୍ଥିତ କେନ୍ଦ୍ରୀୟ ଫରୋନ୍ସିକ ସାଇନ୍ସ ଲ୍ୟାବରୁ ଆସିଥିବା ରିପୋର୍ଟରେ ପୀଡ଼ିତାଙ୍କ ଅନ୍ତବସ୍ତ୍ରରେ କୌଣସି ସିମେନ ନଥିବା ସ୍ପଷ୍ଟ ହୋଇଛି । ଏହି ରିପୋର୍ଟକୁ କେନ୍ଦ୍ରୀୟ ଫରୋନ୍ସିକ ଲ୍ୟାବ ପକ୍ଷରୁ କୋର୍ଟରେ ଦାଖଲ କରାଯାଇଥିଲା । ଏହି ରିପୋର୍ଟରେ ସ୍ପଷ୍ଟ ଭାବେ ଦର୍ଶାଯାଇଛି ଯେ ପୀଡ଼ିତାର ଅନ୍ତ୍ରବସ୍ତ୍ରରେ କେବଳ ମଣିଷର ରକ୍ତ ଦାଗ ମିଳିଛି । କୌଣସି ସ୍ଥାନରେ ସିମେନ୍ ମିଳିନାହିଁ । ଯାହା ରାଜ୍ୟ ଫରେନ୍ସିକ ଲ୍ୟାବର ନିରପେକ୍ଷତାକୁ ପ୍ରମାଣିତ କରୁଛି । ରାଜ୍ୟ ଫରେନ୍ସିକ ଲ୍ୟାବ ପକ୍ଷରୁ ୨୦୧୭ ସେପ୍ଟେମ୍ବର ୨୩ତାରିଖରେ ହାଇକୋର୍ଟରେ ପୀଡ଼ିତାର ଅନ୍ତଃବସ୍ତ୍ରର ଫରେନ୍ସିକ ରିପୋର୍ଟ ଦାଖଲ କରାଯାଇଥିଲା । ଯେଉଁଥିରେ କୁନ୍ଦୁଲି ପୀଡ଼ିତାଙ୍କ ଅନ୍ତ୍ରଃବସ୍ତ୍ରରେ କୌଣସି ସିମେନ୍ ଦାଗ ନଥିବା ସ୍ପଷ୍ଟ କରାଯାଇଥିଲା । କ୍ରାଇମବ୍ରାଞ୍ଚ ଏସ୍ପି ଆହୁରି ମଧ୍ୟ କହିଛନ୍ତି ଯେ ୨୦୧୮ ଜାନୁୟାରୀ ୨୫ତାରିଖରେ ଏକ ନିର୍ଦ୍ଦିଷ୍ଟ ଘରୋଇ ଚ୍ୟାନେଲ୍ ଦ୍ୱାରା ଫରେନ୍ସିକ ରିପୋର୍ଟରେ ସିମେନ ଦାଗ ଥିବା ଖବର ପ୍ରସାରଣ ହୋଇଥିଲା । ସୂଚନାଯୋଗ୍ୟ ୨୦୧୭ ସେପ୍ଟେମ୍ବର ୧୦ତାରିଖରେ ପଟ୍ଟାଙ୍ଗି ଥାନାରେ ଜଣେ ନାବାଳିକା ଗଣଦୁଷ୍କର୍ମର ଶିକାର ହୋଇଥିବାର ଅଭିଯୋଗ ହୋଇଥିଲା । ପୀଡ଼ିତା ଜାନୁଆରୀ ୧୮ ତାରିଖରେ ଆତ୍ମହତ୍ୟା କରିବା ପରେ ଏହାକୁ ନେଇ ରାଜନୀତିକ ବିବାଦ ସୃଷ୍ଟି ହୋଇଥିଲା ।
