ଭୁବନେଶ୍ୱର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନିଜର ମନ୍ତ୍ରିମଣ୍ଡଳ ସହଯୋଗୀଙ୍କ ବିଭାଗରେ ଅଦଳବଦଳ କରିଛନ୍ତି । ମୁଖ୍ୟମନ୍ତ୍ରୀ ଶ୍ରୀ ପଟ୍ଟନାୟକ ଦୀର୍ଘ ଏକ ଦଶନ୍ଧିରୁ ଊଦ୍ଧ୍ୱର୍ ସମୟ ଧରି ନିଜ ପାଖରେ ରଖିଥିବା ୨ଟି ବିଭାଗ ପୂର୍ତ ଓ ଜଳସମ୍ପଦ ବିଭାଗକୁ ଛାଡ଼ିଥିବାବେଳେ ୫ଜଣ ମନ୍ତ୍ରୀଙ୍କ ଉପରେ ଅତିରିକ୍ତ ବିଭାଗର ଦାୟିତ୍ୱ ଦେଇଛନ୍ତି । ବିଜେପୁର ଉପନିର୍ବାଚନ ପରେ ଓ ଆଗାମୀ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ବିଭାଗରେ ଏହି ଅଦଳବଦଳ କରାଯାଇଥିବା ଚର୍ଚ୍ଚା ହେଉଛି ।
ମୁୂଖ୍ୟମନ୍ତ୍ରୀଙ୍କ ପାଖରେ ଥିବା ଜଳସମ୍ପଦ ବିଭାଗର ଦାୟିତ୍ୱ ଗୃହ ନିର୍ମାଣ ଓ ନଗର ଉନ୍ନୟନ ମନ୍ତ୍ରୀ ନିରଞ୍ଜନ ପୂଜାରୀ ଏବଂ ପୂର୍ତ ବିଭାଗର ଦାୟିତ୍ୱ ଅତିରିକ୍ତ ଭାବେ ଇସ୍ପାତ ଓ ଖଣି ମନ୍ତ୍ରୀ ପ୍ରଫୁଲ୍ଲ ମଲ୍ଲିକ ତୁଲାଇବେ । ଶ୍ରୀ ପୂଜାରୀଙ୍କ ପାଖରେ ଥିବା ଶିଳ୍ପ ବିଭାଗକୁ ତାଙ୍କଠୁ କାଢ଼ି ନିଆଯାଇ ଉଚ୍ଚଶିକ୍ଷା ମନ୍ତ୍ରୀ ଅନନ୍ତ ଦାସଙ୍କୁ ନ୍ୟସ୍ତ କରାଯାଇଛି । ସେହିପରି ଇସ୍ପାତ ଓ ଖଣି ମନ୍ତ୍ରୀ ପ୍ରଫୁଲ୍ଲ ମଲ୍ଲିକଙ୍କୁ ପୂର୍ତ ବିଭାଗର ଅତିରିକ୍ତ ଦାୟିତ୍ୱ ଦିଆଯାଇଛି । ଶ୍ରୀ ମଲ୍ଲିକଙ୍କ ପାଖରୁ ଶକ୍ତି ବିଭାଗକୁ କାଢ଼ି ନିଆଯାଇ ଶ୍ରମ ଓ ନିଯୁକ୍ତି ମନ୍ତ୍ରୀ ସୁଶାନ୍ତ ସିଂଙ୍କୁ ଅତିରିକ୍ତ ଭାବେ ଶକ୍ତି ବିଭାଗର ଦାୟିତ୍ୱ ଦିଆଯାଇଛି । ସେହିପରି ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ପ୍ରତାପ ଜେନାଙ୍କୁ ସୂଚନା ଓ ଲୋକସମ୍ପର୍କ ବିଭାଗର ଅତିରିକ୍ତ ଦାୟିତ୍ୱ ନ୍ୟସ୍ତ ହୋଇଛି । ଶ୍ରୀ ଜେନାଙ୍କ ପାଖରେ ଆଇନ ବିଭାଗ ମଧ୍ୟ ରହିଛି । ପୂର୍ବରୁ ଗ୍ରାମ୍ୟ ଉନ୍ନୟନ ମନ୍ତ୍ରୀ ବିକ୍ରମ କେଶରୀ ଆରୁଖ୍ଙ୍କ ପାଖରେ ଅତିରିକ୍ତ ଭାବେ ସୂଚନା ଓ ଲୋକସମ୍ପର୍କ ବିଭାଗ ରହିଥିଲା ।
ସୂଚନାଯୋଗ୍ୟ ବିଜେପୁର ଉପନିର୍ବାଚନରେ ବିଜେଡିର ବିଜୟରେ ପ୍ରମୁଖ ଭୂମିକା ଗ୍ରହଣ କରିଥିବାରୁ ପଶ୍ଚିମ ଓଡ଼ିଶାର ଦୁଇ ମନ୍ତ୍ରୀ ଶ୍ରୀ ସିଂ ଓ ଶ୍ରୀ ପୂଜାରୀଙ୍କୁ ହେଭିୱେଟ୍ ବିଭାଗ ପ୍ରଦାନ କରି ପୁରସ୍କୃତ କରିଛନ୍ତି । ସେହିପରି ବରଗଡ଼ ବିଜେଡି ପର୍ଯ୍ୟବେକ୍ଷକ ଭାବେ ମନ୍ତ୍ରୀ ଶ୍ରୀ ମଲ୍ଲିକଙ୍କୁ ମଧ୍ୟ ଗୁରୁତ୍ୱପୂର୍ଣ୍ଣ ବିଭାଗ ଦାୟିତ୍ୱ ଦିଆଯାଇଥିବାବେଳେ ମନ୍ତ୍ରୀ ଶ୍ରୀ ଜେନାଙ୍କୁ ମଧ୍ୟ ବିଜେପୁର ଉପନିର୍ବାଚନ ନିମନ୍ତେ ପୁରସ୍କୃତ କରାଯାଇଛି ।
