ଭୁବନେଶ୍ୱର : ବିଧାନ ପରିଷଦ ଗଠନ ପ୍ରକ୍ରିୟା ଆଉ ପାଦେ ଆଗେଇଛି । ବିଧାନସଭାର ଆସନ୍ତା ମୌସୁମୀ ଅଧିବେଶନରେ ସରକାରଙ୍କ ପକ୍ଷରୁ ବିଧାନ ପରିଷଦ ଗଠନ ପାଇଁ ଏକ ସ୍ୱତନ୍ତ୍ର ସଂକଳ୍ପ ଅଣାଯିବ । ବାଣିଜ୍ୟ ଓ ପରିବହନ ମନ୍ତ୍ରୀ ଡଃ ନୃସିଂହ ସାହୁଙ୍କ ନେତୃତ୍ୱରେ ଗଠିତ ସ୍ୱତନ୍ତ୍ର କମିଟି ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ୭ପୃଷ୍ଠାର ସୁପାରିସ୍ ରିପୋର୍ଟ ଦେଇଛନ୍ତି ।
କମିଟି ଦେଇଥିବା ରିପୋର୍ଟ ଅନୁସାରେ, ବିଧାନ ପରିଷଦରେ ସର୍ବାଧିକ ୪୯ଜଣ ସଦସ୍ୟ ରହିବେ । ଏଥିରେ ୯ଜଣ ସଦସ୍ୟଙ୍କୁ ରାଜ୍ୟପାଳ ମନୋନୀତ କରିବେ । ୪ଜଣ ସଦସ୍ୟଙ୍କୁ ଶିକ୍ଷକ ସଂଗଠନ, ୪ଜଣ ସଦସ୍ୟଙ୍କୁ ରାଜ୍ୟର ଗ୍ରାଜୁଏଟସ୍ ଓ ୧୬ଜଣ ସଦସ୍ୟଙ୍କୁ ବିଧାୟକମାନେ ଚୟନ କରିବେ । ବାକି ୧୬ଜଣଙ୍କୁ ପଞ୍ଚାୟତ ଓ ପୌର ସଂସ୍ଥାର ନିର୍ବାଚିତ ପ୍ରତିନିଧିମାନେ ମନୋନୀତ କରିବେ ବୋଲି ଜଣାପଡ଼ିଛି । ଏଥିରେ ବିଧାନ ପରିଷଦର ସଦସ୍ୟଙ୍କୁ ବିଧାୟକ ଭଳି ସୁବିଧାସୁଯୋଗ ଓ ଦରମା ଦେବା ପାଇଁ ପ୍ରସ୍ତାବ ଦିଆଯାଇଛି ବୋଲି ସୂଚନା ମିଳିଛି । ବିଧାନ ପରିଷଦର ସଦସ୍ୟମାନଙ୍କୁ ମଧ୍ୟ ବାର୍ଷିକ ଲ୍ୟାଡ୍ ପାଣ୍ଠି ସହ ମନ୍ତ୍ରିମଣ୍ଡଳରେ ସାମିଲ ହେବାର ସୁଯୋଗ ମିଳିବ ।
ସୂଚନାଯୋଗ୍ୟ, ଡଃ ସାହୁଙ୍କ ଅଧ୍ୟକ୍ଷତାରେ ଗଠିତ କମିଟିକୁ ବିଜେପି ଓ କଂଗ୍ରେସ ସଭ୍ୟମାନେ ବର୍ଜନ କରିଥିବାବେଳେ ବିଜେଡିର ଦୁଇ ବିଧାୟକ ପ୍ରମିଳା ମଲ୍ଲିକ ଓ ମନୋହର ରନ୍ଧାରୀ ସଦସ୍ୟ ଭାବେ ପ୍ରଥମ ପର୍ଯ୍ୟାୟରେ ମହାରାଷ୍ଟ୍ର ଓ କର୍ଣ୍ଣାଟକ ଏବଂ ଦ୍ୱିତୀୟ ପର୍ଯ୍ୟାୟରେ ତେଲେଙ୍ଗାନା ଓ ବିହାର ଗସ୍ତରେ ଯାଇ ସେଠାରେ ବିଧାନ ପରିଷଦ ଗଠନ ପ୍ରକ୍ରିୟାର ଅନୁଧ୍ୟାନ କରିଥିଲେ ।
