ଭୁବନେଶ୍ୱର : ଶ୍ରୀଜଗନ୍ନାଥ ମନ୍ଦିର ରତ୍ନଭଣ୍ଡାର ଚାବି ହଜିବା ପ୍ରସଙ୍ଗରେ ଆସନ୍ତାକାଲି ସୁପ୍ରିମକୋର୍ଟରେ ଶୁଣାଣି ହେବ । ଶ୍ରୀମନ୍ଦିର ପରିଚାଳନାରେ ଅବ୍ୟବସ୍ଥା ଓ ଚାବି ହଜିବା ପ୍ରସଙ୍ଗରେ କଟକର ମୃଣାଳିନୀ ପାଢ଼ୀଙ୍କ ଆବେଦନକୁ ଗ୍ରହଣ କରି ସୁପ୍ରିମକୋର୍ଟ ଆସନ୍ତାକାଲି ଶୁଣାଣି କରିବେ ବୋଲି ସୂଚନା ମିଳିଛି । ଅନ୍ୟପକ୍ଷରେ ଚାବି ହଜିବା ପ୍ରସଙ୍ଗରେ ପୁରୀ ଗଜପତି ମହାରାଜା ଦିବ୍ୟସିଂହ ଦେବ ଆଜି ମୁହଁ ଖୋଲିଛନ୍ତି । ବିଦେଶରୁ ଗଣମାଧ୍ୟମକୁ ଲିଖିତ ବୟାନ ଦେଇ ଗଜପତି କହିଛନ୍ତି ଯେ, ରତ୍ନଭଣ୍ଡାରର ଚାବି ରଖିବା ଦାୟିତ୍ୱ ହେଉଛି ଶ୍ରୀମନ୍ଦିର ପ୍ରଶାସନ ଓ ଜିଲ୍ଲା ପ୍ରଶାସନର । ଏଥିରେ ଗଜପତିଙ୍କ କୌଣସି ଭୂମିକା ନାହିଁ ।
ଶ୍ରୀମତୀ ପାଢ଼ୀ ଏହି ମାମଲାରେ କେନ୍ଦ୍ର ସଂସ୍କୃତି ସଚିବ, ରାଜ୍ୟ ମୁଖ୍ୟ ସଚିବ, ଶ୍ରୀଜଗନ୍ନାଥ ମୁଖ୍ୟ ପ୍ରଶାସକ, ଶ୍ରୀମନ୍ଦିର ପରିଚାଳନା କମିଟି ଓ ପୁରୀ ଜିଲ୍ଲାପାଳଙ୍କୁ ପକ୍ଷଭୁକ୍ତ କରିଛନ୍ତି । ଆସନ୍ତାକାଲି ସୁପ୍ରିମକୋର୍ଟଙ୍କ କୋର୍ଟ ନମ୍ବର-୪ରେ ଏହି ମାମଲା ଶୁଣାଣି ହେବ । ଆବେଦନକାରିଣୀ ତାଙ୍କ ଆବେଦନରେ ମୁଖ୍ୟତଃ ଶ୍ରୀମନ୍ଦିର ଚାବି ହଜିବା ପ୍ରସଙ୍ଗ, ଦର୍ଶନରେ ଅବ୍ୟବସ୍ଥା, ବ୍ୟବସାୟିକ ମନୋବୃତ୍ତି ରଖି ସେବାୟତମାନେ ଭକ୍ତଙ୍କୁ ଶୋଷଣ କରିବା, ଶ୍ରୀମନ୍ଦିରର ମହାପ୍ରସାଦ ପ୍ରସ୍ତୁତିରେ ସ୍ୱଚ୍ଛତା ରଖାନଯିବା ଓ ଶ୍ରୀମନ୍ଦିରରେ ପରିସରରେ ପରିଚ୍ଛନ୍ନତା ଆଦି ଦିଗ ଉପରେ ସୁପ୍ରିମକୋର୍ଟଙ୍କ ତ୍ୱରିତ୍ ହସ୍ତକ୍ଷେପ ଦାବି କରିଛନ୍ତି । ଶ୍ରୀମତୀ ପାଢ଼ୀ ୬ତାରିଖରେ ସୁପ୍ରିମକୋର୍ଟରେ ଆବେଦନ କରିଥିବାବେଳେ ଆଜି ତାଙ୍କର ଆବେଦନକୁ କୋର୍ଟ ସ୍ୱୀକାର କରି ଆସନ୍ତାକାଲି ଶୁଣାଣି ପାଇଁ ତାରିଖ ଧାର୍ଯ୍ୟ କରିଥିବା ସୂଚନା ମିଳିଛି । ସୂଚନାଯୋଗ୍ୟ ଶ୍ରୀମନ୍ଦିର ଚାବି ହଜିବା ପ୍ରସଙ୍ଗରେ ଗତ ଦୁଇଦିନ ପୂର୍ବରୁ ଓଡ଼ିଶା ହାଇକୋର୍ଟରେ ମଧ୍ୟ ଏକ ମାମଲା ରୁଜୁ ହୋଇଛି ।
ଗଜପତି ଏହି ପ୍ରସଙ୍ଗରେ ଇ-ମେଲ୍ ବାର୍ତ୍ତାରେ କହିଛନ୍ତି ଯେ,. ୧୯୬୦ ମସିହା ଶ୍ରୀମନ୍ଦିର ଟେମ୍ପଲ ଆକ୍ଟ ହେବା ପରଠାରୁ ଶ୍ରୀମନ୍ଦିରର ସମସ୍ତ ଦାୟିତ୍ୱ ସରକାରଙ୍କ ହାତକୁ ଚାଲିଯାଇଛି । ଏଣୁ ଏହି କ୍ରମରେ ଦେଖିବାକୁ ଗଲେ ଭିତର ରତ୍ନଭଣ୍ଡାରର ଚାବି କେବଳ ସରକାରଙ୍କ ଅଧୀନରେ ରହିଥାଏ । ତାଙ୍କ ପାଖରେ କେବଳ ବାହାର ଭଣ୍ଡାରର ଗୋଟିଏ ଚାବି ରହିଛି ବୋଲି ସେ ସ୍ପଷ୍ଟ କରିଛନ୍ତି । ଏଣୁ ମୁରବୀ ବୋଲି ତାଙ୍କ ଉପରେ ଯେଉଁ ଆକ୍ଷେପ ରହିଛି ସେ ଆଶ୍ଚର୍ଯ୍ୟ ପ୍ରକଟ କରିଛନ୍ତି । ସେହିପରି ୧୯୬୦ ମସିହା ପରଠାରୁ ଯେତେଥର ରତ୍ନଭଣ୍ଡାର ଖୋଲାଯାଇଛି ସବୁଥର ଶ୍ରୀମନ୍ଦିର ପ୍ରଶାସକ ଓ ଜିଳ୍ଲାପାଳଙ୍କ ନେତୃତ୍ୱରେ ଖୋଲାଯାଇଛି । ଯେତେବେଳେ ବାହାର ରତ୍ନଭଣ୍ଡାର ଖୋଲାଯାଇଛି ଗଜପତିଙ୍କ ପ୍ରତିନିଧି ହିଁ ଉପସ୍ଥିତ ରହିଥାନ୍ତି ।
