ଭୁବନେଶ୍ୱର : ପୁରୀ ଶ୍ରୀଜଗନ୍ନାଥ ମନ୍ଦିର ପରିଚାଳନାରେ ବିଶୃଙ୍ଖଳା ଓ ରତ୍ନଭଣ୍ଡାର ଚାବି ହଜିବା ପ୍ରସଙ୍ଗରେ ସୁପ୍ରିମକୋର୍ଟ ଆଜି କଡ଼ା ନିର୍ଦ୍ଦେଶ ଦେଇଛନ୍ତି । ସୁପ୍ରିମକୋର୍ଟ ବିଚାରପତି ଜଷ୍ଟିସ୍ ଆଦର୍ଶ କୁମାର ଗୋଏଲ ଓ ଜଷ୍ଟିସ ଅଶୋକ ଭୂଷଣଙ୍କ ଖଣ୍ଡପୀଠ ଆଜି କଟକର ମୃଣାଳିନୀ ପାଢ଼ୀଙ୍କ ଦ୍ୱାରା ଦାଏର ଜନସ୍ୱାର୍ଥ ସମ୍ବଳିତ ଆବେଦନର ଶୁଣାଣି କରି କେତେକ ଗୁରୁତ୍ୱପୂର୍ଣ୍ଣ ରାୟ ପ୍ରଦାନ କରିଛନ୍ତି । ଏହା ସହିତ ଜୁନ୍ ୩୦ ତାରିଖ ସୁଦ୍ଧା ଶ୍ରୀମନ୍ଦିର ପରିଚାଳନା ଓ ରତ୍ନଭଣ୍ଡାରର ଚାବି ହଜିବା ପ୍ରସଙ୍ଗରେ ଜବାବ ଦାଖଲ କରିବାକୁ କେନ୍ଦ୍ର ସଂସ୍କୃତି ମନ୍ତ୍ରଣାଳୟ, ରାଜ୍ୟ ମୁଖ୍ୟ ସଚିବ, ଶ୍ରୀଜଗନ୍ନାଥ ମନ୍ଦିର ପରିଚାଳନା କମିଟି, ଶ୍ରୀମନ୍ଦିର ମୁଖ୍ୟ ପ୍ରଶାସକ ଓ ପୁରୀ ଜିଲ୍ଲାପାଳଙ୍କୁ ନୋଟିସ୍ ଜାରି କରିଛନ୍ତି । ପରବର୍ତ୍ତୀ ଶୁଣାଣି ଜୁଲାଇ ୫ତାରିଖରେ କରିବା ପାଇଁ ଖଣ୍ଡପୀଠ ଦିନ ଧାର୍ଯ୍ୟ କରିଛନ୍ତି । ଖଣ୍ଡପୀଠ କହିଛନ୍ତି, ସେବାୟତଙ୍କ ଉପରେ ସୁପ୍ରିମକୋର୍ଟ କଟକଣା ଲଗାଇଛନ୍ତି । ପୁରୀ ଶ୍ରୀମନ୍ଦିର ଭିତରେ ଭକ୍ତଙ୍କ ଠାରୁ ଦାନ ନେଇ ପାରିବେ ନାହିଁ ସେବାୟତ । କୋର୍ଟ କହିଛନ୍ତି, ଭକ୍ତଙ୍କ ଦାନ ଅର୍ଥ ସିଧା ହୁଣ୍ଡିକୁ ଯିବ । ଏହାକୁ ନିଶ୍ଚିତ କରିବା ପାଇଁ ସିସିଟିଭିର ସହାୟତା ନିଆଯିବ । ଏଥିସହ ଭକ୍ତଙ୍କୁ ହଇରାଣ କରାଯାଉଥିବା ଅଭିଯୋଗର ଅନୁଧ୍ୟାନ କରି ଜିଲ୍ଲାକୋର୍ଟ ରିପୋର୍ଟ ଦେବେ । ଦେଶର ଅନ୍ୟ ପ୍ରସିଦ୍ଧ ମନ୍ଦିରଗୁଡିକରେ ଥିବା ବ୍ୟବସ୍ଥାକୁ ଅନୁଧ୍ୟାନ କରି ଭକ୍ତଙ୍କ ଦର୍ଶନ ସହ ମନ୍ଦିର ପରିଚାଳନାକୁ ଶୃଙ୍ଖଳତି କରିବାପାଇଁ ବ୍ୟବସ୍ଥା କରାଯିବ । ଏଥିପାଇଁ ସୁପ୍ରିମକୋର୍ଟର ଜଣେ ବରିଷ୍ଠ ଓକିଲ ଗୋପାଳ ସୁବ୍ରମଣ୍ୟମଙ୍କୁ ଆମିକସ କ୍ୟୁରୀ ଭାବେ ମଧ୍ୟ ନିଯୁକ୍ତ କରିଛନ୍ତି ।
କୋର୍ଟଙ୍କ ନିର୍ଦ୍ଦେଶ ପରେ ଶ୍ରୀମନ୍ଦିର ପ୍ରଶାସନ ଆଜି ସନ୍ଧ୍ୟାରେ ସେବାୟତମାନେ ଆଉ ଭକ୍ତଙ୍କଠୁ ଦାନ କିମ୍ବା ନୈବେଦ୍ୟ ଗ୍ରହଣ କରିପାରିବେ ନାହିଁ । ଭକ୍ତମାନେ ଯାହା ଦାନ ଦେବେ ତାହା ହୁଣ୍ଡିରେ ପକାଇବେ । ନଚେତ୍ ଶ୍ରୀମନ୍ଦିର କାର୍ଯ୍ୟାଳୟ, ଶ୍ରୀମନ୍ଦିର ପ୍ରଶାସନ ଅଫିସ୍ କିମ୍ବା ଶାଖା କାର୍ଯ୍ୟାଳୟରେ ଦେଇପାରିବେ । ମହାପ୍ରଭୁ ଶ୍ରୀଜଗନ୍ନାଥଙ୍କୁ ଦାନ ଆକାରରେ ମିଳୁଥିବା ସୁନା ରୂପା ଅଳଙ୍କାରକୁ ଏସବିଆଇ ଲକରରେ ରଖାଯିବ । ପ୍ରାୟ ୨୩ ବର୍ଷ ହେଲା ସୁନାରୂପା ଅଳଙ୍କାର ଗୁଡିକୁ ଲକରରେ ନରଖି ଶ୍ରୀମନ୍ଦିରର ନିଜସ୍ୱ ଟ୍ରେଜେରିରେ ରଖାଯାଇଛି ।ଶ୍ରୀମନ୍ଦିର ହୁଣ୍ଡକୁ ଦାନ ଆକାରରେ ଆସୁଥିବା ସମସ୍ତ ଅଳଙ୍କାରକୁ ପ୍ରତି ମାସେ ଦୁଇମାସରେ ଭାରତୀୟ ଷ୍ଟେଟ ବ୍ୟାଙ୍କ ଲକରରେ ରଖିବାକୁ ନିଷ୍ପତି ହୋଇଛି । ତେବେ ରତ୍ନ ଭଣ୍ଡାର ଚାବି ହଜିବା ପରେ ଯେଉଁ ହଟଚମଟ ଦେଖାଦେଇଛି ତାକୁ ଦୃଷ୍ଟିରେ ରଖି ମନ୍ଦିର ପ୍ରଶାସନ ଏଭଳି ନିଷ୍ପତି ନେଇଛି । ଦାନଟଙ୍କା ପାଇଁ ଶ୍ରୀମନ୍ଦିର ସେବାୟତ ଓ ପଣ୍ଡାମାନେ ଭକ୍ତଙ୍କୁ ହଇରାଣ କରୁଥିବା ନେଇ ବାରମ୍ବାର ଅଭିଯୋଗ ସାମ୍ନାକୁ ଆସିବା ପ୍ରସଙ୍ଗରେ ସୁପ୍ରିମକୋର୍ଟ କଡା ଆଭିମୁଖ୍ୟ ପ୍ରଦର୍ଶନ କରିଛନ୍ତି । ଶ୍ରୀମନ୍ଦିରକୁ ଆସୁଥିବା ଭକ୍ତମାନେ କିଭଳି ସୁରୁଖୁରୁରେ ଠାକୁରଙ୍କୁ ଦର୍ଶନ କରିପାରିବେ ଓ ଦାନଅର୍ଥ ସିଧା ଜଗନ୍ନାଥ ମନ୍ଦିରକୁ ଯିବ ସେ ବାବଦରେ ପ୍ରଶାସନ ପଦକ୍ଷେପ ନେଉ ବୋଲି ସୁପ୍ରିମକୋର୍ଟ କହିଛନ୍ତି । ତୀରୁପତି, ବୈଷ୍ଣୋଦେବୀ, ସୋମନାଥ ମନ୍ଦିର ଓ ସ୍ୱର୍ଣ୍ଣ ମନ୍ଦିର ପରି ଦେଶର ପ୍ରମୁଖ ମନ୍ଦିରଗୁଡିକରେ ଶୃଙ୍ଖଳିତ ପରିଚାଳନା ପାଇଁ ଗ୍ରହଣ କରିଯାଇଥିବା ବ୍ୟବସ୍ଥାକୁ ଅନୁଧ୍ୟାନ କରି ପୁରୀ ଶ୍ରୀମନ୍ଦିରରେ ଆବଶ୍ୟକ ସଂସ୍କାର ଆଣିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି । ରାଜ୍ୟ ସରକାର ମଧ୍ୟ କମିଟି ଗଠନ କରି କ’ଣ ସଂସ୍କାର ଦରକାର ପରାମର୍ଶ ଦେବେ ।
