କଟକ(ଓଡବ୍ଲ୍ୟୁ):ଦୀର୍ଘ ଅଢ଼େଇ ମାସ ହେଲା କାର୍ଯ୍ୟବନ୍ଦ ଆନ୍ଦୋଳନ ଚଳାଇଥିବା ଓକିଲମାନେ ରାଜ୍ୟ ପୁଲିସ ଡିଜିଙ୍କ ସହ ଆଲୋଚନା ପାଇଁ ସମ୍ମତି ଜଣାଇଛନ୍ତି।ଆଜି ମୁଖ୍ୟ ବିଚାରପତିଙ୍କ କୋର୍ଟରେ ଏହି ମାମଲାର ଶୁଣାଣି ହୋଇଥିଲା।ମାମଲା ଚାଲିଥିବାବେଳେ ପୁଲିସଙ୍କ ଉପରୁ ନିଲମ୍ବନ କିଭଳି ପ୍ରତ୍ୟାହାର କରାଗଲା ସେ ବିଷୟରେ ସରକାରଙ୍କୁ ରିପୋର୍ଟ ମଗାଯାଇଛି।
ଆଜି ହାଇକୋର୍ଟରେ ପୁଲିସ-ଓକିଲ ବିବାଦର ଶୁଣାଣି ସୋମବାର ପର୍ଯ୍ୟନ୍ତ ଘୁଂଚିବା ପରେ ବାର ଆସୋସିଏସନ୍ କର୍ମକର୍ତାଙ୍କ ଏକ ବୈଠକ ଅନୁଷ୍ଠିତ ହୋଇଥିଲା । ବୈଠକରେ ରାଜ୍ୟ ପୁଲିସ ଡିଜି ଗତକାଲି ସନ୍ଧ୍ୟାରେ ପଠାଇଥିବା ଚିଠି ସମ୍ପର୍କରେ ଆଲୋଚନା ହୋଇଥିଲା।ସେ ରାଜ୍ୟ ପୁଲିସ ମୁଖ୍ୟାଳୟରେ ଆଲୋଚନା ପାଇଁ ଆସିବା ନିମନ୍ତେ ଓକିଲମାନଙ୍କୁ ଅନୁରୋଧ କରିଥିଲେ।କିନ୍ତୁ ଓକିଲମାନେ ଏଥିରେ ରାଜି ହୋଇନାହାନ୍ତି।ତେବେ ତୃତୀୟ ସ୍ଥାନରେ ଆଲୋଚନା ପାଇଁ ଡିଜିପି ଡାକିଲେ ସେଠାକୁ ବାର୍ ଆସୋସିଏସନ୍ କର୍ମକର୍ତାମାନେ ଯାଇ ଆଲୋଚନା କରିବାରେ କୌଣସି ଅସୁବିଧା ନାହିଁ ବୋଲି ହାଇକୋର୍ଟ ବାର ଆସୋସିଏସନ୍ ସଭାପତି ଶ୍ରୀକାନ୍ତ କୁମାର ନାୟକ କହିଛନ୍ତି ।
ଡିଜିପି ଯେତେବେଳେ ଚାହିଁବେ ଆଲୋଚନା କରିବାରେ ଅସୁବିଧା ନାହିଁ କିନ୍ତୁ ତାହା ତୃତୀୟ ସ୍ଥାନରେ ହେବା ଆବଶ୍ୟକ।ଆଜି ମୁଖ୍ୟ ବିଚାରପତିଙ୍କ କୋର୍ଟରେ ଏହି ମାମଲାର ଶୁଣାଣି ହୋଇଥିଲା।ମାମଲା ଚାଲିଥିବାବେଳେ ପୁଲିସଙ୍କ ଉପରୁ ନିଲମ୍ବନ କିଭଳି ପ୍ରତ୍ୟାହାର କରାଗଲା ସେ ବିଷୟରେ ସରକାରଙ୍କୁ ରିପୋର୍ଟ ମଗାଯାଇଛି।ମୁଖ୍ୟ ବିଚାରପତି ମଧ୍ୟ ସରକାରଙ୍କ ଏଭଳି ଆଭିମୁଖ୍ୟକୁ ନେଇ କ୍ଷୁବ୍ଧ ହୋଇଥିଲେ ବୋଲି ଶ୍ରୀ ନାୟକ କହିଛନ୍ତି।ସୋମବାର ଶୁଣାଣି ପର୍ଯ୍ୟନ୍ତ କାର୍ଯ୍ୟବନ୍ଦ ଆନ୍ଦୋଳନ ଜାରି ରହିବ ବୋଲି ଆଜିର ବେଠକରେ ନିଷ୍ପତି ହୋଇଥିବା ଶ୍ରୀ ନାୟକ ସାମ୍ବାଦିକମାନଙ୍କୁ ସୂଚନା ଦେଇଛନ୍ତି।
