ଭୁବନେଶ୍ୱର : ଶେଷରେ ବିଜେଡି ନିଜର ରାଜ୍ୟସଭା ପ୍ରାର୍ଥୀଙ୍କ ନାମ ଘୋଷଣା କରିଛି । ଆଜି ବିଜେଡିରେ ଆନୁଷ୍ଠାନିକ ଭାବେ ସାମିଲ ହୋଇଥିବା ଆମ ଓଡ଼ିଶା ପାର୍ଟି ଅଧ୍ୟକ୍ଷ ସୌମ୍ୟ ରଞ୍ଜନ ପଟ୍ଟନାୟକ, ଶିକ୍ଷାବିତ୍ ଅଚ୍ୟୁତ ସାମନ୍ତଙ୍କୁ ଦଳ ରାଜ୍ୟସଭା ପାଇଁ ପ୍ରାର୍ଥୀ କରିଛି । ସେହିପରି ଦଳର ବରିଷ୍ଠ ନେତା ପ୍ରଶାନ୍ତ ନନ୍ଦଙ୍କୁ ମଧ୍ୟ ପ୍ରାର୍ଥୀ ହୋଇଛନ୍ତି । ମୁଖ୍ୟମନ୍ତ୍ରୀ ତଥା ବିଜେଡି ସୁପ୍ରିମୋ ନବୀନ ପଟ୍ଟନାୟକ ଅପରାହ୍ନରେ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ ପ୍ରଶାନ୍ତ ନନ୍ଦ, ସୌମ୍ୟରଞ୍ଜନ ପଟ୍ଟନାୟକ ଓ ଅଚ୍ୟୁତ ସାମନ୍ତ ରାଜ୍ୟସଭା ପାଇଁ ବିଜେଡି ପ୍ରାର୍ଥୀ ହେବେ । ଆସନ୍ତା ୧୨ତାରିଖ ରାଜ୍ୟସଭା ପ୍ରାର୍ଥୀପତ୍ର ଦାଖଲର ଶେଷଦିନ ଥିବାରୁ ବିଜେଡି ଆଜି ତା’ର ପ୍ରାର୍ଥୀଙ୍କ ନାମ ଚୂଡ଼ାନ୍ତ କରିଛି । ଉଲ୍ଲେଖନୀୟ ଘଟଣାକ୍ରମରେ ଆଜି ପୂର୍ବାହ୍ନରେ ସୌମ୍ୟ ଓ ଅଚ୍ୟୁତ ବିଜେଡିରେ ସାମିଲ ହୋଇଥିଲେ । ସୌମ୍ୟଙ୍କ ବିଜେଡିରେ ମିଶିବା ନେଇ ଚର୍ଚ୍ଚା ଦୀର୍ଘଦିନ ଧରି ଲାଗି ରହିଥିଲେ ମଧ୍ୟ ଅଚ୍ୟୁତଙ୍କ ବିଜେଡିରେ ମିଶ୍ରଣ ଅପ୍ରତ୍ୟାଶିତ ଥିଲା । ଉଭୟ ଦଳରେ ମିଶିବାର ମାତ୍ର କିଛି ଘଂଟା ମଧ୍ୟରେ ସେମାନଙ୍କୁ ରାଜ୍ୟସଭା ପ୍ରାର୍ଥୀ କରି ବିଜେଡି ସୁପ୍ରିମୋ ପୁରସ୍କୃତ କରିଛନ୍ତି । ସେହିପରି ପ୍ରଶାନ୍ତ ନନ୍ଦ ବିଜେପୁର ଉପନିର୍ବାଚନରେ ଗାଇସିଲେଟ୍ ବ୍ଲକ୍ ଦାୟିତ୍ୱରେ ରହିଥିବାରୁ ତାଙ୍କୁ ମଧ୍ୟ ରାଜ୍ୟସଭା ପ୍ରାର୍ଥୀ କରି ଦଳ ପୁରସ୍କୃତ କରିଛି । ବିଧାନସଭାରେ ସଂଖ୍ୟା ଦୃଷ୍ଟିରୁ ବିଜେଡିର ଏହି ୩ ପ୍ରାର୍ଥୀଙ୍କ ବିଜୟ ସୁନିଶ୍ଚିତ । କଂଗ୍ରେସ ଓ ବିଜେପି ପ୍ରାର୍ଥୀ ଦେବା ସ୍ଥିତିରେ ନଥିବାରୁ ଏମାନଙ୍କ ବିଜୟ ସୁନିଶ୍ଚିତ ବୋଲି କୁହାଯାଉଛି । ଆବଶ୍ୟକ ପଡ଼ିଲେ ମାର୍ଚ୍ଚ ୨୩ତାରିଖରେ ନିର୍ବାଚନ ହୋଇପାରେ । ସୂଚନାଯୋଗ୍ୟ ଏପ୍ରିଲ ୩ ତାରିଖରେ ବିଜେଡି ସାଂସଦ ଏୟୁ ସିଂହଦେଓ ଓ ଦିଲ୍ଲୀପ ତିର୍କୀଙ୍କ ସମେତ ସ୍ୱାଧୀନ ସାଂସଦ ଏ.ଭି.ସ୍ୱାମୀଙ୍କ ରାଜ୍ୟସଭାରେ କାର୍ଯ୍ୟକାଳ ଶେଷ ହେଉଛି । ଦଳବଦଳ କରି ଆସୁଥିବା ବ୍ୟକ୍ତିଙ୍କୁ ବିଜେଡିରେ ଗୁରୁତ୍ୱ ମିଳୁଥିବାରୁ ପୁରୁଣା କର୍ମୀ ଓ ନେତାଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି ।
