ଭୁବନେଶ୍ୱର : ୨୦୧୯ ସାଧାରଣ ନିର୍ବାଚନ ପାଇଁ ପ୍ରଥମ ପର୍ଯ୍ୟାୟ ପ୍ରାର୍ଥୀ ତାଲିକା ଘୋଷଣା କରିବା ପୂର୍ବରୁ ରାଜ୍ୟ କଂଗ୍ରେସ ନିଜର ଆଭିମୁଖ୍ୟ ସ୍ପଷ୍ଟ କରିଛି । ତୃଣମୂଳସ୍ତରରେ ଦଳ ପାଇଁ କାର୍ଯ୍ୟ କରୁଥିବା ତଥା ବିଜୟ ସମ୍ଭାବନା ଥିବା ଦକ୍ଷ ପ୍ରାର୍ଥୀଙ୍କୁ ହିଁ କଂଗ୍ରେସ ଏଥର ଟିକେଟ୍ ଦେବ । ପରିବାରର ଏକାଧିକ ବ୍ୟକ୍ତିଙ୍କୁ କୌଣସି ପରିସ୍ଥିତିରେ ବି ଟିକେଟ୍ ଦିଆଯିବ ନାହିଁ ବୋଲି ଓଡ଼ିଶା ପିସିସି ପ୍ରଭାରୀ ଜିତେନ୍ଦ୍ର ସିଂହ ଘୋଷଣା କରିଛନ୍ତି ।
୨୦୧୯ ସାଧାରଣ ନିର୍ବାଚନ ପାଇଁ ଦଳକୁ ସୁଦୃଢ଼ କରିବା ନିମନ୍ତେ ୩ଦିନ ଧରି ଭୁବନେଶ୍ୱରରେ ମାନସମନ୍ଥନ ଚାଲିବା ପରେ ଗଣମାଧ୍ୟମକୁ ସୂଚନା ଦେଇ ଶ୍ରୀ ସିଂହ କହିଛନ୍ତି ଯେ, ରାଜ୍ୟ କଂଗ୍ରେସ ପାଇଁ ଟିକେଟ୍ ବଂଟନର ଫର୍ମୂଲା ଉପରେ ଚର୍ଚ୍ଚା ହୋଇଛି । ଏଥର କାହାରିକୁ କୋଟା କିମ୍ବା ସୁପାରିସରେ ଟିକେଟ୍ ଦିଆଯିବ ନାହିଁ । ଯେଉଁମାନେ ଦଳର ଆଭିମୁଖ୍ୟ ନେଇ ଲୋକଙ୍କ ପାଖକୁ ଯାଉଛନ୍ତି ସେମାନଙ୍କୁ ଏଥର ପ୍ରାଧାନ୍ୟ ମିଳିବ । ଏହାଛଡ଼ା ଜିଲ୍ଲା ଓ ରାଜ୍ୟସ୍ତରୀୟ ନେତାମାନଙ୍କୁ ମଧ୍ୟ ୩ମାସ ପାଇଁ ଟାର୍ଗେଟ୍ ଦିଆଯାଇଛି । ଅଗଷ୍ଟ ଶେଷ ସପ୍ତାହରେ ଦଳର ଅଧ୍ୟକ୍ଷ ରାହୁଲ ଗାନ୍ଧି ଓଡ଼ିଶା ଆସିବାର ଥିବାରୁ ସେ ସମ୍ପର୍କରେ ମଧ୍ୟ ଆଲୋଚନା ହୋଇଥିଲା ବୋଲି ଶ୍ରୀ ସିଂହ କହିଛନ୍ତି । ଅନ୍ୟପକ୍ଷରେ ଶ୍ରୀ ସିଂହଙ୍କ ବୟାନକୁ ପିସିସି ସଭାପତି ନିରଞ୍ଜନ ପଟ୍ଟନାୟକ ସ୍ୱାଗତ କରିଛନ୍ତି । ଓଡ଼ିଶା ପ୍ରଭାରୀ ଯେଉଁ ବୟାନ ଦେଇଛନ୍ତି ତାହା ହିଁ ଶିରୋଧାର୍ଯ୍ୟ ଓ ଆଗାମୀ ନିର୍ବାଚନରେ ସେୟା ହେବ । ସେହିପରି ଦଳର କାର୍ଯ୍ୟକାରୀ ସଭାପତି ପ୍ରଦୀପ ମାଝୀ କହିଛନ୍ତି ଯେ ପ୍ରଥମ ପର୍ଯ୍ୟାୟରେ ୫୦ରୁ ୭୫ଜଣ ପ୍ରାର୍ଥୀଙ୍କ ନାଁ ଘୋଷଣା କରାଯିବ । ଏହାବ୍ୟତୀତ ନିର୍ବାଚନ ପ୍ରସ୍ତୁତି ପାଇଁ ଦଳ ପକ୍ଷରୁ ଏକ ସ୍ୱତନ୍ତ୍ର ସେଲ୍ ଖୋଲାଯାଇ ବରିଷ୍ଠ ତଥା ଅଭିଜ୍ଞ ନେତାଙ୍କୁ ଦାୟିତ୍ୱ ନ୍ୟସ୍ତ କରାଯିବ । ୨୦୧୯ ସାଧାରଣ ନିର୍ବାଚନରେ ଦଳ ନିଜର ଦମ୍ ଦେଖାଇବ ।
