ପୁରୀ : ଶ୍ରୀଜଗନ୍ନାଥ ମହାପ୍ରଭୁଙ୍କ ରତ୍ନଭଣ୍ଡାରର ସ୍ଥିତି ପରଖିବା ପାଇଁ ରାଜ୍ୟ ସରକାର ଅନୁମତି ଦେଇଛନ୍ତି । ମାତ୍ର କେଉଁ କାର୍ଯ୍ୟ ହେବ, କିଭଳି କରାଯିବ ସେ ସମ୍ପର୍କରେ ଯେଉଁ ତଥ୍ୟ ଉଲ୍ଲେଖ କରିଛନ୍ତି ତାହା ସାର୍ବଜନୀନ ହୋଇନାହିଁ । ଆସନ୍ତାକାଲି ପରିଚାଳନା କମିଟି ବୈଠକ ଏବଂ ଗୁରୁବାରଦିନ ଛତିଶା ନିଯୋଗ ବୈଠକ ବସିବ । ସରକାରଙ୍କ ଅନୁମତି ପତ୍ରର ରୂପରେଖ କ’ଣ ରହିଛି ତାହା ଏହି ବୈଠକରୁ ଜଣାପଡିବ ।
ଅନ୍ୟପକ୍ଷରେ ରତ୍ନଭଣ୍ଡାର ଯାଞ୍ଚ ପାଇଁ କରାଯାଇଥିବା ସବକମିଟିର ନିଷ୍ପତ୍ତିକୁ ସେବାୟତମାନେ ସ୍ୱାଗତ କରିଛନ୍ତି । ତେବେ ରତ୍ନଭଣ୍ଡାର ଯାଞ୍ଚଞ୍ଚ ସମୟରେ ମହାପ୍ରଭୁଙ୍କ ମୂଲ୍ୟବାନ ଅଳଙ୍କାର ଓ ଆଭୂଷଣର ସୁରକ୍ଷା କିଭଳି କରାଯିବ ତାହା ପ୍ରଶ୍ନବାଚୀ ହୋଇରହିଛି । ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ପଷ୍ଟ କୁହାଯାଇଛି ଯେ ରତ୍ନ ଭଣ୍ଡାରର କାନ୍ଥ, ଛାତ ଓ ଚଟାଣର କେବଳ ଯାଞ୍ଚ କରାଯିବ । କୌଣସି ଅଳଙ୍କାରକୁ କେହି ସ୍ପର୍ଶ କରିପାରିବେ ନାହିଁ । ରତ୍ନଭଣ୍ଡାର ଭିତରକୁ ଯେଉଁମାନଙ୍କୁ ଛଡ଼ାଯିବ ସେମାନଙ୍କୁ ମଧ୍ୟ ସୁରକ୍ଷା ବଳୟ ଦେଇ ଯିବାକୁ ପଡିବ । ଯାଞ୍ଚ କାର୍ଯ୍ୟରେ ସମ୍ପୂୂର୍ଣ୍ଣ ସ୍ୱଚ୍ଛତା ରଖାଯିବ । ଏଥିନେଇ ମଧ୍ୟ ଛତିଶା ନିଯୋଗ ସହିତ ଶ୍ରୀମନ୍ଦିର ପ୍ରଶାସନ ଆଲୋଚନା କରି ନିଷ୍ପତ୍ତି ନେବ । ମାର୍ଚ୍ଚ ୨୬,୨୭ ଦୁଇଦିନ ରତ୍ନଭଣ୍ଡାର ଯାଞ୍ଚ ପାଇଁ ହାଇକୋର୍ଟ ଅନୁମତି ପ୍ରଦାନ କରିଥିଲେ ମଧ୍ୟ ରାଜ୍ୟ ସରକାରଙ୍କ ଅନୁମତି ମିଳିନଥିବାରୁ ତାହା ହୋଇପାରିନଥିଲା । ସରକାରଙ୍କ ଏହି ଅନୁମତି ପତ୍ର ଶ୍ରୀମନ୍ଦିର ମୁଖ୍ୟ ପ୍ରଶାସକଙ୍କ ପାଖରେ ରହିଛି ।
