ଭୁବନେଶ୍ୱର : ଓଡ଼ିଶାରୁ ରାଜ୍ୟସଭାକୁ ନିଦ୍ୱର୍ନ୍ଦ୍ୱରେ ନିର୍ବାଚିତ ବିଜେଡିର ୩ଜଣ ସାଂସଦ ଆଜି ଓଡ଼ିଆ ଭାଷାରେ ଶପଥ ନେଇଛନ୍ତି । ଉପରାଷ୍ଟ୍ରପତି ଭେଙ୍କୟା ନାଇଡୁ ଆଜି ବିଜେଡିର ୩ ସାଂସଦ ପ୍ରଶାନ୍ତ ନନ୍ଦ, ସୌମ୍ୟରଞ୍ଜନ ପଟ୍ଟନାୟକ ଓ ଡଃ ଅଚ୍ୟୁତ ସାମନ୍ତଙ୍କୁ ଶପଥ ପାଠ କରାଇଥିଲେ । ଶପଥ ଗ୍ରହଣ ପରେ ୩ ସାଂସଦ ଓଡ଼ିଶାର ସ୍ୱାର୍ଥ ପାଇଁ କାର୍ଯ୍ୟ କରିବେ ବୋଲି କହିଛନ୍ତି । ସାଂସଦ ଶ୍ରୀ ପଟ୍ଟନାୟକ ଗଣମାଧ୍ୟମକୁ ସୂଚନା ଦେଇ କହିଥିଲେ ଯେ, ସେ ରାଜ୍ୟସଭା ସାଂସଦ ଭାବେ ଯେଉଁ ଦରମା ପାଇବେ ତାକୁ ସେ ନିଜ ପାଇଁ ଖର୍ଚ୍ଚ କରିବେ ନାହିଁ । ସମସ୍ତ ଅର୍ଥକୁ ସେ ଚାଷୀ ପରିବାର ପାଇଁ ଖର୍ଚ୍ଚ କରିବେ । ଚାଷୀ ପରିବାରର ମେଧାବୀ ଛାତ୍ରଛାତ୍ରୀମାନଙ୍କୁ ସେ ତାଙ୍କ ଦରମା ଅର୍ଥରେ ମେଧାବୃତ୍ତି ପ୍ରଦାନ କରିବେ । ସେ ବିଜେଡିରେ ସାମିଲ ହୋଇଥିଲେ ମଧ୍ୟ ବିଜେଡି ସରକାରଙ୍କ ପାଖରେ ପ୍ରସଙ୍ଗଭିତ୍ତିକ ଦାବି ଉପସ୍ଥାପନ କରିବେ । ଓଡ଼ିଆ ଭାଷା ସାହିତ୍ୟର ସୁରକ୍ଷା ଓ ଚାଷୀଙ୍କ ହକ୍ ପାଇଁ ସେ ଲଢ଼େଇ ଜାରି ରଖିବେ ବୋଲି କହିଛନ୍ତି । ସୂଚନାଯୋଗ୍ୟ ଏହି ୩ ସାଂସଦଙ୍କ ଶପଥ ଗ୍ରହଣ ପରେ ରାଜ୍ୟସଭାରେ ବିଜେଡି ସାଂସଦଙ୍କ ସଂଖ୍ୟା ୯ରେ ପହଞ୍ôଚଛି । ସାଂସଦ ଏୟୁ ସିଂହଦେଓ, ଦିଲ୍ଲୀପ ତିର୍କୀ ଓ ଏ.ଭି.ସ୍ୱାମୀଙ୍କ ଅବସର ପରେ ସେମାନଙ୍କ ସ୍ଥାନରେ ଏହି ୩ ସାଂସଦ ରାଜ୍ୟସଭାକୁ ନିର୍ବାଚିତ ହୋଇଛନ୍ତି ।
