ଭୁବନେଶ୍ୱର(ଓଡ଼ିଶା ୱେୟାର):ସୋସିଆଲ ମିଡିଆରେ ତାଙ୍କ ନାଁରେ ଚାଲିଥିବା ଅପପ୍ରଚାର ବିରୁଦ୍ଧରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବା ପାଇଁ ରାଜ୍ୟ ବିଜେପି ସାଧାରଣ ସମ୍ପାଦିକା ଲେଖାଶ୍ରୀ ସାମନ୍ତସିଂହାର ଦାବି କରିଛନ୍ତି । ଏକ ନିର୍ଦ୍ଦିଷ୍ଟ ଫେସବୁକ ପେଜରେ ତାଙ୍କ ନାଁ ନେଇ ଏକ ମିଛ ଖବର ପ୍ରଚାର କରାଯାଉଥିବାରୁ ଶ୍ରୀମତୀ ସାମନ୍ତସିଂହାର ଟ୍ୱିଟର ମାଧ୍ୟମରେ ରାଜ୍ୟ ପୁଲିସ କର୍ତ୍ତୃପକ୍ଷଙ୍କୁ ଅବଗତ କରିବା ସହ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ଶ୍ରୀମତୀ ସାମନ୍ତସିଂହାର ଆଜି ଟ୍ୱିଟ୍ ମାଧ୍ୟମରେ ରାଜ୍ୟ ପୁଲିସ ଡିଜି, କ୍ରାଇମବ୍ରାଂଚ ଓ ପୁଲିସ କମିଶନରଙ୍କୁ ତାଙ୍କ ବିରୁଦ୍ଧରେ ଏକ ଫେସବୁକ ପେଜରେ ଚାଲିଥିବା ଅପପ୍ରଚାର ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବା ନିମନ୍ତେ ଦାବି କରିଛନ୍ତି । ଏକ ଫେସବୁକ ପେଜରେ ଗତକାଲି ଲେଖାଶ୍ରୀଙ୍କ ନାଁ ନେଇ ଗ୍ୟାସ୍ ଦର ବୃଦ୍ଧି ସମ୍ପର୍କିତ ଏକ ମିଛ ମନ୍ତବ୍ୟକୁ ପ୍ରଚାର କରାଯାଇଛି । “ମହିଳାମାନେ ଅଳ୍ପ ଆଇଟମ୍ କରନ୍ତୁ, ଅର୍ଥାତ୍ ଖାଲି ଭାତ ଓ ଡାଲି’ କରନ୍ତୁ ବୋଲି ଲେଖାଶ୍ରୀ କହିଥିବା ନେଇ ଏହି ଫେସବୁକ ପେଜରେ ଉଲ୍ଲେଖ ରହିଛି ।
ତେବେ ଶ୍ରୀମତୀ ସାମନ୍ତସିଂହାର ଏଭଳି କୌଣସି ମନ୍ତବ୍ୟ ଦେଇନାହାନ୍ତି ବୋଲି ଆଜି ଟ୍ୱିଟର ମାଧ୍ୟମରେ ସ୍ପଷ୍ଟ କରିବା ସହ ପୁଲିସ କାର୍ଯ୍ୟାନୁଷ୍ଠାନ ଦାବି କରିଛନ୍ତି । ଶ୍ରୀମତୀ ସାମନ୍ତସିଂହାର ଟ୍ୱିଟ୍ କରି କହିଛନ୍ତି ଯେ, “ସେ ଏଭଳି କୌଣସି ବୟାନ ଦେଇନାହାନ୍ତି । ତାଙ୍କୁ ବ୍ଲାକମେଲ୍ କରିବା ଓ ଚାନ୍ଦା ଆଦାୟ ଉଦ୍ଦେଶ୍ୟରେ ଏଭଳି ଫେକ୍ ନ୍ୟୁଜ ପ୍ରସାର କରାଯାଉଛି, ଯାହାକି ତାଙ୍କୁ ବ୍ୟଥିତ କରିଛି ।”
ପରେ ସେ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ତାଙ୍କର ମର୍ଯ୍ୟାଦା ହାନି ପାଇଁ ଏଭଳି ମିଛ କଥା ପ୍ରଚାର କରାଯାଉଛି । ଏଭଳି ପ୍ରୟାସକୁ ସେ କଡ଼ା ଭାଷାରେ ନିନ୍ଦା କରୁଛନ୍ତି । ସେ ଟ୍ୱିଟ୍ ମାଧ୍ୟମରେ ପୁଲିସ ଡିଜି, କ୍ରାଇମବ୍ରାଂଚ ସାଇବର ସେଲ୍ ଓ କମିଶନରେଟ ପୁଲିସକୁ ଅବଗତ କରିଛନ୍ତି । ଏହାକୁ ଏକ ଏଫଆଇଆର ଭାବେ ବିବେଚନା କରିବାକୁ ସେ ଅନୁରୋଧ କରୁଛନ୍ତି । ଏହାର ତଦନ୍ତ କରାଯାଇ ଏଭଳି କାର୍ଯ୍ୟ ପଛରେ ଥିବା ଲୋକମାନଙ୍କ ବିରୁଦ୍ଧରେ କଠୋର କାର୍ଯ୍ୟାନୁଷ୍ଠାନ କରାଯିବା ଉଚିତ୍ ବୋଲି ସେ କହିଛନ୍ତି ।
