ଭୁବନେଶ୍ୱର : ଓଡ଼ିଶା ପ୍ରଦେଶ କଂଗ୍ରେସ କମିଟିର ନବକଳେବର ଖୁବଶୀଘ୍ର ହେବ ବୋଲି ପିସିସି ସଭାପତି ପ୍ରସାଦ ହରିଚନ୍ଦନ ବୟାନ ଦେବାର ୨୪ଘଣ୍ଟା ନପୁରୁଣୁ ଓଡ଼ିଶାର ସାଂଗଠନିକ ଦାୟିତ୍ୱ ତୁଲାଇବା ପାଇଁ ୩ଜଣ ସମ୍ପାଦକ ଓ ଜଣେ ଯୁଗ୍ମ ସମ୍ପାଦକଙ୍କୁ କଂଗ୍ରେସ ହାଇକମାଣ୍ଡ ନିଯୁକ୍ତି ଦେଇଛନ୍ତି ।
ଏଆଇସିସି ପକ୍ଷରୁ ଜାରି ଏକ ପ୍ରେସ୍ ରିଲିଜ୍ ଅନୁସାରେ ଆନ୍ଧ୍ରପ୍ରଦେଶର ପୂର୍ବତନ ବିଧାୟକ ରୁଦ୍ର ରାଜୁ, ଦିଲ୍ଲୀର ଅନୀଲ କୁମାର ଚୌଧୁରୀ ଓ ପୂର୍ବତନ ବିଧାୟକ ଶେଖ୍ ମସ୍ତାନ ଭାଲିଙ୍କୁ ନୂତନ ଭାବେ ସମ୍ପାଦକ ଭାବେ ନିଯୁକ୍ତି ମିଳିଛି । ଏହା ସହିତ ସେମାନଙ୍କୁ ଓଡ଼ିଶାରେ କଂଗ୍ରେସର ସାଂଗଠନିକ ଦାୟିତ୍ୱ ତକ୍ରାଳ ପ୍ରଭାବରୁ ନ୍ୟସ୍ତ କରାଯାଇଛି । ଏହି ୩ ନୂଆ ନେତାଙ୍କ ବ୍ୟତୀତ ଆଦିତ୍ୟ ଶର୍ମାଙ୍କୁ ଯୁଗ୍ମ ସମ୍ପାଦକ ଭାବେ ନିଯୁକ୍ତି ଦିଆଯାଇ ଓଡ଼ିଶା ସଂଗଠନ ବୁଝିବା ଦାୟିତ୍ୱ ଦିଆଯାଇଛି । ଏଆଇସିସି ସମ୍ପାଦକ ଶୁଭଙ୍କର ସରକାରଙ୍କୁ ଓଡ଼ିଶା ଦାୟିତ୍ୱରୁ ହଟାଇ ଦିଆଯାଇଛି । ପୂର୍ବରୁ ମାର୍ଚ୍ଚ ୩୧ତାରିଖରେ ଓଡ଼ିଶା ପ୍ରଭାରୀ ଥିବା ବି.କେ.ହରିପ୍ରସାଦଙ୍କୁ ହଟାଇ ତାଙ୍କ ସ୍ଥାନରେ ଜିତେନ୍ଦ୍ର କୁମାରଙ୍କୁ ନିଯୁକ୍ତି ଦିଆଯାଇଥିଲା । ଦଳର ବରିଷ୍ଠ ନେତା ଶରତ ରାଉତ କହିଚନ୍ତି ଯେ, କଂଗ୍ରେସ ସଭାପତି ରାହୁଲ ଗାନ୍ଧିଙ୍କ ଫୋକସ୍ରେ ଓଡ଼ିଶା ସ୍ୱତନ୍ତ୍ର ଭାବେ ରହିଥିବା ଆଜିର ନିଯୁକ୍ତିର ସ୍ପଷ୍ଟ ହୋଇଛି । ଦଳ ପକ୍ଷରୁ ନିଆଯାଇଥିବା ଏହି ନିଷ୍ପତ୍ତି ନିଶ୍ଚିତ ଭାବେ କର୍ମୀ ଓ ନେତାଙ୍କ ମଧ୍ୟରେ ଉତ୍ସାହ ବୃଦ୍ଧି କରିବ । ଓଡ଼ିଶା ଦାୟିତ୍ୱରେ ଏଆଇସିସି ପକ୍ଷରୁ ନୂଆ ଟିମ୍ ନିଯୁକ୍ତି ଦିଆଯାଇଥିଲେ ମଧ୍ୟ ପିସିସି ସଭାପତି ପଦରୁ ପ୍ରସାଦ ହଟିବେ କି ନାହିଁ ତାକୁ ନେଇ ଅନିଶ୍ଚିତତା ଲାଗି ରହିଛି । ଦଳର ଗୋଟିଏ ପ୍ରଭାବଶାଳୀ ଗୋଷ୍ଠୀ ପ୍ରସାଦ ହଟାଅ ଅଭିଯାନକୁ ଜୋରଦାର କରୁଛନ୍ତି ।
