ଭୁବନେଶ୍ୱର : କୋଇଲା ରୟାଲିଟି ସଂଶୋଧନ ପାଇଁ ଗତ ୫ବର୍ଷ ଧରି ଦାବି କରୁଥିବା ଓଡ଼ିଶା ସରକାରଙ୍କୁ ଆଜି ଶକ୍ତ ଧକ୍କା ଲାଗିଛି । କୋଇଲା ରୟାଲିଟିରେ ସଂଶୋଧନ କରିବାକୁ ସରକାର ବାଧ୍ୟ ନୁହଁନ୍ତି କିମ୍ବା ପ୍ରତି ୩ବର୍ଷରେ ଥରେ ରୟାଲିଟି ସଂଶୋଧନ ହେବା ପାଇଁ ଆଇନରେ କୌଣସି ପ୍ରାବଧାନ ନାହିଁ ବୋଲି କେନ୍ଦ୍ର କୋଇଲା ମନ୍ତ୍ରୀ ପୀୟୁଷ ଗୋଏଲ ସ୍ପଷ୍ଟ କରିଛନ୍ତି । ଏବେ ଜିଏସ୍ଟି ଲାଗୁ ହୋଇଥିବାରୁ ରୟାଲିଟି ନିର୍ଦ୍ଧାରଣର ଅଧିକ ତଜର୍ମା କରାଯାଉଛି ବୋଲି ସେ କହିଛନ୍ତି ।
ଆଜି ଲୋକସଭାରେ ସାଂସଦ ନଗେନ୍ଦ୍ର ପ୍ରଧାନଙ୍କ ଏକ ପ୍ରଶ୍ନର ଲିଖିତ ଉତରରେ କେନ୍ଦ୍ରମନ୍ତ୍ରୀ ଶ୍ରୀ ଗୋଏଲ କହିଛନ୍ତି ଯେ ଏମ୍ଏମ୍ଡିଆର ଆକ୍ଟ-୧୯୫୭ର ଧାରା-(୩)ରେ ଖଣିଜ ସାମଗ୍ରୀର ରୟାଲିଟି ଦର ବୃଦ୍ଧି ଅବା ହ୍ରାସ ନିମନ୍ତେ କେନ୍ଦ୍ର ସରକାର ବିଜ୍ଞପ୍ତି ଜାରି କରିବାର ପ୍ରାବଧାନ ରହିଛି । ଅତିକମ୍ରେ ୩ବର୍ଷରୁ କମ୍ ସମୟ ମଧ୍ୟରେ ଖଣିଜ ସାମଗ୍ରୀର କୌଣସି ପ୍ରକାରର ସଂଶୋଧନ କେନ୍ଦ୍ର ସରକାର କରିପାରିବେ ନାହିଁ । ଏହା ସହିତ ଆଇନରେ ମଧ୍ୟ ଖଣିଜ ସାମଗ୍ରୀର ରୟାଲିଟି ପ୍ରତି ୩ବର୍ଷରେ ବୃଦ୍ଧି କରିବାର ସେଭଳି କୌଣସି ବାଧ୍ୟତାମୂଳକ ପ୍ରାବଧାନ ନାହିଁ । କୋଇଲା ରୟାଲିଟିର ସଂଶୋଧନ ଶେଷଥର ପାଇଁ ଗତ ୨୦୧୨ ମସିହା ମେ’ ୧୦ତାରିଖରେ ହୋଇଥିଲା । କୋଇଲା ରୟାଲିଟିରେ ସଂଶୋଧନର ତଜର୍ମା ନିମନ୍ତେ ୨୦୧୪ ଜୁଲାଇ ୨୧ତାରିଖରେ କେନ୍ଦ୍ର ସରକାର ଏକ ଷ୍ଟଡି ଗ୍ରୁପ୍ ଗଠନ କରିଥିଲେ । ଉକ୍ତ ଷ୍ଟଡି ଗ୍ରୁପ୍ ୨୦୧୬ ଏପ୍ରିଲ ୨୭ତାରିଖରେ ତା’ର ରିପୋର୍ଟ କେନ୍ଦ୍ର ସରକାରଙ୍କୁ ଦେଇଥିଲା । କିନ୍ତୁ ଜିଏସ୍ଟି ଲାଗୁ ହେବା ଓ ଅନ୍ୟାନ୍ୟ କାରଣ ଯୋଗୁ ଦେଇଥିବା ରିପୋର୍ଟକୁ ପୁଣିଥରେ ସାମ୍ପ୍ରତିକ ସ୍ଥିତିକୁ ଦୃଷ୍ଟିରେ ରଖି ଅନୁଧ୍ୟାନ କରିବା ପାଇଁ କୁହାଯାଇଛି । ଷ୍ଟଡି ଗ୍ରୁପ୍ର ରିପୋର୍ଟକୁ ଅପେକ୍ଷା କରାଯାଇଛି ବୋଲି ଶ୍ରୀ ଗୋଏଲ କହିଛନ୍ତି ।
ସୂଚନାଯୋଗ୍ୟ ୨୦୧୮-୧୯ କେନ୍ଦ୍ର ବଜେଟ୍ରେ କୋଇଲା ରୟାଲିଟି ସଂଶୋଧନ ନିମନ୍ତେ ଓଡ଼ିଶା ପକ୍ଷରୁ ଦାବି କରାଯାଇଥିଲା । ଏପରିକି ଗତ ୫ବର୍ଷ ହେଲା ମୁଖ୍ୟମନ୍ତ୍ରୀ ଓ ରାଜ୍ୟ ସରକାର ବିଭିନ୍ନ ଫୋରମ୍ରେ କେନ୍ଦ୍ର ସରକାରଙ୍କ ନିକଟରେ କୋଇଲା ରୟାଲିଟି ସଂଶୋଧନ ଦାବି କରି ଆସୁଛନ୍ତି । କୋଇଲା ରୟାଲଟିରେ ଓଡ଼ିଶା ବର୍ଷକୁ ପ୍ରାୟ ୧୧୦୦ରୁ ୧୪୦୦କୋଟି ଟଙ୍କା ପାଉଛି । କିନ୍ତୁ ରୟାଲିଟି ହାରରେ ସଂଶୋଧନ ହେଲେ ଓଡ଼ିଶା ପ୍ରାୟ ଦ୍ୱିଗୁଣ ଅର୍ଥାତ ୨୨୦୦କୋଟି ଟଙ୍କା ପାଇବ ବୋଲି ଆକଳନ କରିଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏହି କୋଇଲା ରୟାଲିଟିରେ ସଂଶୋଧନ ପ୍ରସଙ୍ଗରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ କରିବା ଦାବି ଜଣାଇବା ସହ ୩ଥର ଚିଠି ଲେଖି ଅନୁରୋଧ ମଧ୍ୟ କରିଛନ୍ତି । ଓଡ଼ିଶା ଦେଶର ପ୍ରମୁଖ କୋଇଲା ଉତ୍ପାଦନକାରୀ ରାଜ୍ୟ । ଦେଶର ମୋଟ୍ କୋଇଲା ଉତ୍ପାଦନର ପ୍ରାୟ ୧୩.୪ ପ୍ରତିଶତ ଓଡ଼ିଶାରେ ଉତ୍ପାଦନ ହୁଏ ।
