ବଲାଙ୍ଗିର: ବଲାଙ୍ଗିର ଓ ନୂଆପଡ଼ା ଜିଲ୍ଲାରେ ଦାଦନ ଚାଲାଣ ରୋକିବା ପାଇଁ ରାଜ୍ୟ ସରକାର ବୁଧବାର ୧୩୪ କୋଟି ଟଙ୍କାର ସ୍ୱତନ୍ତ୍ର ପ୍ୟାକେଜ୍ ଘୋଷଣା କରିଛନ୍ତି । ରାଜ୍ୟ ଶ୍ରମ ମନ୍ତ୍ରୀ ସୁଶାନ୍ତ କୁମାର ସିଂହ ଏହି ସୂଚନା ଦେଇଛନ୍ତି । ବଲାଙ୍ଗିରରେ ଡିଆରଡିଏ ସମ୍ମିଳନୀ କକ୍ଷରେ ଏକ ସ୍ୱତନ୍ତ୍ର ବୈଠକ ପରେ ଶ୍ରୀ ସିଂ କହିଛନ୍ତି ଯେ ବଲାଙ୍ଗିର,ନୂଆପଡ଼ା, ସୋନପୁର, ବରଗଡ଼ ଓ କଳାହାଣ୍ଡି ଜିଲ୍ଲାରେ ଚଳିତବର୍ଷ ମରୁଡ଼ି ଦେଖାଦେଇଛି । ତେଣୁ ଏସବୁ ଜିଲ୍ଲାର ଲୋକ ବାହାରକୁ ଦାଦନ ଖଟିବାକୁ ଯିବାର ସମ୍ଭାବନା ରହିଛି । ଏହାକୁ ଦୃଷ୍ଟିରେ ରଖି ରାଜ୍ୟ ସରକାର ବଲାଙ୍ଗିର ଓ ନୂଆପଡ଼ା ଜିଲ୍ଲାର ୩୦ଟି ପଂଚାୟତରେ କର୍ମନିଯୁକ୍ତି ସୁଯୋଗ ସୃଷ୍ଟି ପାଇଁ ସ୍ୱତନ୍ତ୍ର ପ୍ୟାକେଜ୍ ଘୋଷଣା କରିବାକୁ ନିଷ୍ପତି ନେଇଛନ୍ତି । ଅନ୍ୟ ପ୍ରଭାବିତ ଜିଲ୍ଲା ଓ ପଂଚାୟତ ପାଇଁ ପରବର୍ତୀ ସମୟରେ ପ୍ୟାକେଜ୍ ଘୋଷଣା କରାଯିବ । ଏହି ବୈଠକରେ ଶ୍ରମ ସଚିବ ଅନୁ ଗର୍ଗ, କମିଶନର ସଚିନ ରାମଚନ୍ଦ୍ର ଯାଦବ, ଉପରୋକ୍ତ ୫ଟି ଜିଲ୍ଲାର ବରିଷ୍ଠ ଶ୍ରମ ଓ ପୁଲିସ୍ ଅଧିକାରୀମାନେ ଉପସ୍ଥିତ ଥିଲେ ।
