ଭୁବନେଶ୍ୱର(ଓଡ଼ିଶା ୱେୟାର): ବିଜେଡି ବିଧାୟକ ପ୍ରାର୍ଥୀ ବେଦପ୍ରକାଶ ଅଗ୍ରୱାଲଙ୍କ ମୃତ୍ୟୁ ଓ ‘ଫୋନି’ ବାତ୍ୟା ଯୋଗୁ ସ୍ଥଗିତ ଥିବା ପାଟକୁରା ବିଧାନସଭା ନିର୍ବାଚନ ପାଇଁ ଉଭୟ ବିଜେଡି ଓ ବିଜେପି ପକ୍ଷରୁ ଜୋରଦାର ପ୍ରସ୍ତୁତି ଆରମ୍ଭ ହୋଇଛି। ନିର୍ବାଚନ କମିଶନ ଦୁଇତିନିଦିନ ମଧ୍ୟରେ ପାଟକୁରା ବିଧାନସଭା ନିର୍ବାଚନ ପାଇଁ ତାରିଖ ଘୋଷଣା କରିବାର ସମ୍ଭାବନା ଥିବାରୁ ଦୁଇ ପ୍ରମୁଖ ରାଜନୀତିକ ଦଳ ବିଜେଡି ଓ ବିଜେପି ନିଜର ରଣନୀତିକୁ ଚୂଡ଼ାନ୍ତ କରିବାରେ ଲାଗିଛନ୍ତି। ବିଜେଡି ଇତିମଧ୍ୟରେ ନିଜର ବିଧାୟକମାନଙ୍କୁ ପାଟକୁରାର ମୋଟ ୫୧ଟି ପଞ୍ଚାୟତର ଦାୟିତ୍ୱ ବଣ୍ଟନ କରିବାରେ ଲାଗିଥିବାବେଳେ ବିଜେପିର ଚୂଡ଼ାନ୍ତ ରଣନୀତି ପାଇଁ ଆସନ୍ତାକାଲି ଗୁରୁତ୍ୱପୂର୍ଣ୍ଣ ବୈଠକ ବସୁଥିବା ଜଣାପଡ଼ିଛି।
ମିଳିଥିବା ସୂଚନା ଅନୁସାରେ, ସାଧାରଣ ନିର୍ବାଚନ ପରେ ପାଟକୁରା ବିଧାନସଭା ଆସନକୁ ହାତେଇବା ଏବେ ଉଭୟ ବିଜେଡି ଓ ବିଜେପି ପାଇଁ ସମ୍ମାନର ପ୍ରଶ୍ନ ପାଲଟିଛି। ବିଜେଡି ନିଜର ଦିବଂଗତ ପ୍ରାର୍ଥୀ ବେଦପ୍ରକାଶ ଅଗ୍ରୱାଲଙ୍କ ପତ୍ନୀ ସାବିତ୍ରୀ ଅଗ୍ରୱାଲଙ୍କୁ ଦଳର ପ୍ରାର୍ଥୀ ଭାବେ ମଇଦାନକୁ ଓହ୍ଲାଇଥିବାବେଳେ ବିଜେପି ନିଜର ହେଭିୱେଟ୍ ତଥା ଅଭିଜ୍ଞ ନେତା ବିଜୟ ମହାପାତ୍ରଙ୍କୁ ପ୍ରାର୍ଥୀ କରିଛି। ସାବିତ୍ରୀଙ୍କୁ ପ୍ରାର୍ଥୀ କରି ବିଜେଡି ଚଳିତ ନିର୍ବାଚନରେ ସମବେଦନା ସାଉଁଟିବାକୁ ଲକ୍ଷ୍ୟ ରଖିଥିବାବେଳେ ତାଙ୍କ ପ୍ରାୟତଃ ବିଫଳ ହୋଇଛି। ଓଲଟା ଦୀର୍ଘବର୍ଷ ଧରି କ୍ଷମତା ରାଜନୀତିରୁ ଦୂରେଇ ଥିବା ବିଜୟଙ୍କ ପାଇଁ ସ୍ଥାନୀୟ ଅଞ୍ଚଳରେ ଲୋକଙ୍କ ମଧ୍ୟରେ ସମବେଦନା ବୃଦ୍ଧି ପାଇବାରେ ଲାଗିଛି । କେନ୍ଦ୍ରାପଡ଼ା ରାଜନୀତିର ଭୀଷ୍ମ ପିତାମହ ଭାବେ ବିଜୟ ପରିଚିତ ଥିବାରୁ ତାଙ୍କୁ ପରାଜିତ କରିବା ନିମନ୍ତେ ଶାସକ ବିଜେଡି ଏବେ ପୁରା ଦମ୍ ଲଗାଇ ଦେଇଛି। ପ୍ରଶାସନ ମାଧ୍ୟମରେ ଭୋଟ୍ ହାର ବୃଦ୍ଧି କରିବାକୁ ରଣନୀତି ପ୍ରସ୍ତୁତ କରିଥିବା ବିଜେଡି ଗତ ଦୁଇଦିନ ତଳେ ଦଳୀୟ ନେତାମାନଙ୍କ ବୈଠକ ଡାକି ପାଟକୁରା ନିର୍ବାଚନମଣ୍ଡଳୀର ୩ଟି ବ୍ଲକ( ଡେରାବିଶ,ଗରଦପୁର ଓ ମାର୍ଶାଘାଇ)ର ଦାୟିତ୍ୱ ବଣ୍ଟନ କରିଛି। ସୂଚନା ଅନୁସାରେ ଡେରାବିଶ ବ୍ଲକ ଦାୟିତ୍ୱରେ ମନ୍ତ୍ରୀ ଅରୁଣ ସାହୁ ଓ ବରିଷ୍ଠ ନେତା ସଞ୍ଜୟ ଦାସବର୍ମା ଥିବାବେଳେ ତଦାରଖ ଦାୟିତ୍ୱ ପ୍ରତାପ କେଶରୀ ଦେବଙ୍କୁ ନ୍ୟସ୍ତ ହୋଇଛି। ଡେରାବିଶର ସମସ୍ତ ୨୬ଟି ବ୍ଲକ ଦାୟିତ୍ୱ ଜଣେ ଲେଖାଏ ବିଜେଡି ବିଧାୟକଙ୍କୁ ଦିଆଯାଇଛି। ସେହିପରି ଗରଦପୁର ଓ ମାର୍ଶାଘାଇ ବ୍ଲକ ଦାୟିତ୍ୱ ବରିଷ୍ଠ ନେତା ତଥା ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ(ରାଜା) ଓ ଅତନୁ ସବ୍ୟସାଚୀ ନାୟକଙ୍କୁ ନ୍ୟସ୍ତ ହୋଇଛି। ଏହି ଦୁଇ ବ୍ଲକର ୨୫ଟି ପଞ୍ଚାୟତ ଦାୟିତ୍ୱରେ ମଧ୍ୟ ୨୫ଜଣ ବିଧାୟକ ରହିଛନ୍ତି। ଏମାନଙ୍କ ବ୍ୟତୀତ ଦଳର ଅନ୍ୟ ଛାମୁଆ ସଂଗଠନର କର୍ମକର୍ତ୍ତାମାନେ ସେଠାରେ ଦଳ ପାଇଁ ପ୍ରଚାର କାର୍ଯ୍ୟକୁ ତ୍ୱରାନ୍ୱିତ କରିବେ।
ଏପଟେ ବିଜେପି ପକ୍ଷରୁ ଆସନ୍ତାକାଲି ବସିବାକୁ ଥିବା ବୈଠକରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ଦଳର ରାଜ୍ୟ ପ୍ରଭାରୀ ଅରୁଣ ସିଂ, ରାଷ୍ଟ୍ରୀୟ ଉପସଭାପତି ବୈଜୟନ୍ତ ପଣ୍ଡା, ବରିଷ୍ଠ ନେତା ବିଜୟ ମହାପାତ୍ର, ଡାକ୍ତର ଦାମୋଦର ରାଉତଙ୍କ ସମେତ ରାଜ୍ୟ ବିଜେପି ସଭାପତି ବସନ୍ତ ପଣ୍ଡା ଓ ଦଳୀୟ ପଦାଧିକାରୀମାନେ ଯୋଗ ଦେବାର କାର୍ଯ୍ୟକ୍ରମ ରହିଛି। ଆସନ୍ତାକାଲି ବୈଠକ ପରେ ଦଳ ପାଟକୁରାରେ ଆନୁଷ୍ଠାନିକ ଭାବେ ପ୍ରଚାର ମଇଦାନକୁ ଓହ୍ଲାଇବ ବୋଲି ଜଣାପଡ଼ିଛି।
