ଭୁବନେଶ୍ୱର(ଓଡ଼ିଶା ୱେୟାର): ଜଳ ଜୀବନ ମିଶନ ଯୋଜନାରେ ରାଜ୍ୟର ଗ୍ରାମାଂଚଳରେ ଲୋକଙ୍କୁ ବିଶୁଦ୍ଧ ପାନୀୟ ଜଳ ଯୋଗାଣ ନିମନ୍ତେ ରାଜ୍ୟ କ୍ୟାବିନେଟ ଆଜି ମୋଟ ୧୪୯୫ କୋଟି ଟଙ୍କାର ୬ଟି ଟେଣ୍ଡରକୁ ୨ଟି ଠିକା ସଂସ୍ଥାକୁ ପ୍ରଦାନ କରିଛନ୍ତି । ହାଇଦ୍ରାବାଦସ୍ଥିତ ମେଘା ଇଞ୍ଜିନିୟରିଂ ଆଣ୍ଡ ଇନଫ୍ରାଷ୍ଟକର ସଂସ୍ଥାକୁ ଯାଜପୁର, ଢେଙ୍କାନାଳ, ସମ୍ବଲପୁର ଓ କଳାହାଣ୍ଡିରେ ୪ଟି ପାନୀୟ ଜଳ ପ୍ରକଳ୍ପ ନିମନ୍ତେ ୯୧୯କୋଟି ଟଙ୍କାର ଠିକା ଦିଆଯାଇଥିବାବେଳେ ଚେନ୍ନାଇସ୍ଥିତ ଏଲଆଣ୍ଡଟି ସଂସ୍ଥାକୁ କେନ୍ଦ୍ରାପଡ଼ା ଓ ଖୋର୍ଦ୍ଧାରେ ୫୭୬କୋଟି ଟଙ୍କାର ୨ଟି ପାନୀୟ ଜଳ ପ୍ରକଳ୍ପର ଟେଣ୍ଡର ଦେବାକୁ ରାଜ୍ୟ କ୍ୟାବିନେଟ ଅନୁମତି ଦେଇଛନ୍ତି ।
ରାଜ୍ୟ କ୍ୟାବିନେଟ ବୈଠକ ପରେ ଗଣମାଧ୍ୟମକୁ ଦିଆଯାଇଥିବା ସୂଚନା ଅନୁସାରେ କେନ୍ଦ୍ରାପଡ଼ା ଜିଲ୍ଲାର ୪ଟି ବ୍ଲକ ଆଳି,ରାଜନଗର,ପଟ୍ଟାମୁଣ୍ଡାଇ ଓ ରାଜକନିକାର ମୋଟ ୬୫ଟି ପଂଚାୟତର ୨୭୪ଟି ଗାଁରେ ଏହି ପାନୀୟ ଜଳ ସୁବିଧା ମିଳିବ । ଏଥିଯୋଗୁ ୨.୭୪ଲକ୍ଷ ଲୋକ ଉପକୃତ ହେବେ । ଏଥିରେ ୨୨୭.୯୧କୋଟି ଟଙ୍କା ବ୍ୟୟ ହେବ ଓ ଠିକା ସଂସ୍ଥା ଏଲଆଣ୍ଡଟି ଏହି କାର୍ଯ୍ୟକୁ ୨୪ମାସ ମଧ୍ୟରେ ଶେଷ କରିବ ।
ସେହିପରି ଖୋର୍ଦ୍ଧାର ୬ଟି ବ୍ଲକ ଟାଙ୍ଗୀ,ବାଣପୁର,ଚିଲିକା, ଜଟଣୀ, ଖୋର୍ଦ୍ଧା ଓ ବେଗୁନିଆର ମୋଟ ୭୭ଟି ପଂଚାୟତର ୫୦୫ଟି ଗାଁର ୪.୯୭ଲକ୍ଷ ଲୋକଙ୍କୁ ବିଶୁଦ୍ଧ ପାନୀୟ ଜଳ ମିଳିବ । ଏଥିପାଇଁ ୩୪୮.୧୦କୋଟି ଟଙ୍କା ଖର୍ଚ୍ଚ ହେବ ଓ ଠିକା ସଂସ୍ଥା ଏଲଆଣ୍ଡଟି ଏହାକୁ ୨୪ମାସ ମଧ୍ୟରେ ଶେଷ କରିବ ।
ଯାଜପୁରର ୪ଟି ବ୍ଲକ ର ୫୩ଟି ପଂଚାୟତର ୨୮୦ଟି ଗାଁର ୩.୨୩ଲକ୍ଷ ଲୋକଙ୍କୁ ପାନୀୟ ଜଳ ସୁବିଧା ଦେବା ପାଇଁ ୨୪୫.୯୮କୋଟି ଟଙ୍କାର ପ୍ରକଳ୍ପ କାର୍ଯ୍ୟ ଆରମ୍ଭ ହେବ । ଏଥିପାଇଁ ଠିକା ସଂସ୍ଥା ମେଘା ଇଞ୍ଜିନିୟରିଂକୁ ଟେଣ୍ଡର ଦିଆଯାଇଛି ଓ ସେ ଏହାକୁ ୨୪ମାସ ମଧ୍ୟରେ ସାରିବ ବୋଲି କ୍ୟାବିନେଟ ବୈଠକରେ କୁହାଯାଇଛି ।
ସେହିପରି ଯାଜପୁରର ୪ଟି ବ୍ଲକ ଭୁବନ,ଗଁଦିଆ,କାମାକ୍ଷାନଗର ଓ ସଦର ବ୍ଲକର ୬୮ଟି ପଂଚାୟତରେ ପ୍ରାୟ ସାଢ଼େ ୩ଲକ୍ଷ ଲୋକଙ୍କୁ ପାନୀୟ ଜଳ ଯୋଗାଣ ନିମନ୍ତେ ୨୯୬.୯୩କୋଟି ଟଙ୍କାର ଠିକା କାର୍ଯ୍ୟ ମେଘା ଇଞ୍ଜିନିୟରିଂକୁ ପ୍ରଦାନ କରାଯାଇଛି ।
କଳାହାଣ୍ଡିର ଗୋଲମୁଣ୍ଡା ବ୍ଲକରେ ୨୮ଟି ପଂଚାୟତକୁ ଜଳଯୋଗାଣ ନିମନ୍ତେର ୧୭୭.୮୩କୋଟି ଟଙ୍କାର ପ୍ରକଳ୍ପ କାର୍ଯ୍ୟ ଠିକା ସଂସ୍ଥା ମେଘା ଇଞ୍ଜିନିୟରିଂକୁ ଦିଆଯାଇଛି ।
ସହେିପରି ସମ୍ବଲପୁରର ୫ଟି ବ୍ଲକର ୨୬ଟି ପଂଚାୟତର ୧୩୮ଟି ଗାଁ ଏବଂ ଝାରସୁଗୁଡ଼ା ବ୍ଲକର ୨ଟି ପଂଚାୟତକୁ ଜଳଯୋଗାଣ ନିମନ୍ତେ ଠିକା ସଂସ୍ଥା ମେଘା ଇଞ୍ଜିନିୟରିଂକୁ ୧୯୮.୩୮କୋଟି ଟଙ୍କାର ଟେଣ୍ଡର ଦିଆଯାଇଛି ।
