ନୂଆଦିଲ୍ଲୀ: କଂଗ୍ରେସର ବରିଷ୍ଠ ନେତା ଗୁଲାମ ନବୀ ଆଜାଦ ରାଜନୀତିରୁ ସନ୍ନ୍ୟାସ ନେବେ । ଏନେଇ ସେ ସଙ୍କେତ ଦେଇଛନ୍ତି । ଏକ ଭିଡିଓରେ ଗୁଲାମଙ୍କ ଏପରି କିଛି ସଙ୍କେତ ଦେଖିବାକୁ ମିଳିଛି । ଯେଉଁଥିରେ ସେ ହଠାତ କେଉଁଦିନ ରାଜନୀତିରୁ ଅବସର ନେଇ ସମାଜ ସେବା କରୁଥିବା ଲୋକେ ଦେଖିବାକୁ ପାଇବେ ବୋଲି କହୁଥିବା ନଜର ଆସିଛି ।
ଦେଶର ସର୍ବପୁରାତନ ଦଳ କଂଗ୍ରେସର ବରିଷ୍ଠ ନେତା ତଥା ଜି୨୩ ଗ୍ରୁପର ସଦସ୍ୟ ଗୁଲାମନବୀ ଆଜାଦ ଦଳର ୫ ରାଜ୍ୟରେ ପରାଜୟ ପରେ ଲଗାତର ଚର୍ଚ୍ଚାରେ ରହିଛନ୍ତି । ସେ ଦୁଇ ଦିନ ତଳେ ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ସାକ୍ଷାତ କରିଥିଲେ । ତେବେ ସୋନିଆଙ୍କୁ ଦେଖା କରିବା କିଛି ବଡ ଖବର ନୁହେଁ, ସେ ଲଗାତର ଭାବେ ସୋନିଆଙ୍କୁ ଦେଖା କରିବେ ବୋଲି କହିଥିଲେ ।
ସେ ଆହୁରି କହିଥିଲେ ଯେ, ଏବେ ଦଳର ସଭାପତି ପଦବୀ ଖାଲି ନାହିଁ । ନିର୍ବାଚନ ହେଲେ ଦଳର କାର୍ଯ୍ୟକର୍ତ୍ତା କଂଗ୍ରେସର ସଭାପତି କିଏ ହେବ ସେନେଇ ନିଷ୍ପତ୍ତି ନେବେ । ସେହିପରି ରବିବାର ଜମ୍ମୁ-କାଶ୍ମୀରରେ ଏକ କାର୍ଯ୍ୟକ୍ରମରେ ସେ କହିଥିଲେ ଯେ, ପୀର ପଞ୍ଜାଲରେ ହିନ୍ଦୁ, ମୁସଲିମ, ଶିଖ ସମସ୍ତେ ରହିବା ଦରକାର । ଏହାସହ ସେ ଧର୍ମ ଆଧାରରେ ଘୃଣା ସୃଷ୍ଟି କରୁଥିବା ରାଜନୈତିକ ଦଳ ଉପରେ ବର୍ଷିଥିଲେ ।ଯଦି ତାଙ୍କ ଦଳ ଏପରି କରେ ତେବେ ସେ ନିଜ ଦଳକୁ ମଧ୍ୟ କ୍ଷମା କରିବେ ନାହିଁ ବୋଲି କହିଥିଲେ ।
