ଭୁବନେଶ୍ୱର: ୨୦୧୮-୧୯ ଖରିଫ ଋତୁରେ ୫୫ଲକ୍ଷ ଟନ୍ ଧାନ ସଂଗ୍ରହ କରାଯିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଛି । ଧାନ ସଂଗ୍ରହବେଳେ ପୂର୍ବରୁ ମୁଣ୍ଡପିଛା କଟା ଯାଉଥିବା ୩ କ୍ୱିଂଟାଲ ଧାନକୁ ଚଳିତବର୍ଷଠୁ ଆଉ କଟାଯିବ ନାହିଁ । ଏହା ଦ୍ୱାରା ରାଜ୍ୟର କ୍ଷୁଦ୍ର ଓ ନାମମାତ୍ର ଚାଷୀ ଉପକୃତ ହେବେ ।
ଆଜି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ୍ ବୈଠକରେ ୨୦୧୮-୧୯ ଖରିଫ ନୀତିକୁ ଅନୁମୋଦନ ସମେତ ମୋଟ ୩ଟି ଏଜେଣ୍ଡାକୁ ମଞ୍ଜୁରୀ ମିଳିଛି ।
ଏ ସମ୍ପର୍କରେ ସାମ୍ବାଦିକମାନଙ୍କୁ ସୂଚନା ଦେଇ ମୁଖ୍ୟ ସଚିବ ଆଦିତ୍ୟ ପ୍ରସାଦ ପାଢ଼ୀ କହିଛନ୍ତି ଯେ ଚଳିତ ଖରିଫ ଋତୁରେ ମୋଟ ୩୭ଲକ୍ଷ ଟନ୍ ଚାଉଳ ସଂଗ୍ରହ ହେବ । ଏଥିରୁ ୨୩ଲକ୍ଷ ମେଟ୍ରିକ ଟନ୍ ଚାଉଳ ସାଧାରଣ ବଂଟନ ପାଇଁ ରହିବ । ବଳକା ଚାଉଳ ଏଫସିଆଇକୁ ଦିଆଯିବ । ଧାନ ଦେବାର ୩ଦିନ ମଧ୍ୟରେ ଚାଷୀ ସେମାନଙ୍କର ଟଙ୍କା ପାଇବେ । ୨୪ରୁ ୭୨ଘଂଟା ମଧ୍ୟରେ ପି-ପାସ୍ ବ୍ୟବସ୍ଥା ମାଧ୍ୟମରେ ଚାଷୀଙ୍କ ଆକାଂଉଟକୁ ଟଙ୍କା ଟ୍ରାନ୍ସଫର ହୋଇଯିବ । ପ୍ୟାକ୍ସ ଓ ଲ୍ୟାମ୍ପସ୍ ଜରିଆରେ ଧାନ ସଂଗ୍ରହ କରାଯିବ ।
ସେହିପରି ‘ ୨୦୧୮-୧୯ ଆର୍ଥିକ ବର୍ଷରେ ନୂତନ ଭାବେ ଆରମ୍ଭ ହୋଇଥିବା ୧୨୫୦କୋଟି ଟଙ୍କାର ଆମ ଗାଁ ଆମ ବିକାଶ କାର୍ଯ୍ୟକ୍ରମର ଗାଇଡଲାଇନକୁ କ୍ୟାବିନେଟ୍ ଅନୁମୋଦନ କରିଛନ୍ତି । ଏହି କାର୍ଯ୍ୟକ୍ରମରେ ୧ରୁ ୧୦ଲକ୍ଷ ଟଙ୍କା ମଧ୍ୟରେ ପ୍ରକଳ୍ପ କାର୍ଯ୍ୟ ହେବ । ଏସବୁ କାର୍ଯ୍ୟ କୌଣସି ଠିକାଦାର କିମ୍ବା ଠିକାଦାରୀ ସଂସ୍ଥା ମାଧ୍ୟମରେ କରାଯିବ ନାହିଁ । ବିଭାଗୀୟ ଅଧିକାରୀମାନେ ଏହି ପ୍ରକଳ୍ପ କାର୍ଯ୍ୟ କରିବେ । ସେହିପରି କୃଷି ବିଭାଗରେ କ୍ୟାଡ଼ର ପୁର୍ନଗଠନ ପ୍ରକ୍ରିୟାକୁ ମଧ୍ୟ କ୍ୟାବିନେଟ୍ ମଞ୍ଜୁର କରିଛନ୍ତି ।
