ଭୁବନେଶ୍ୱର : ତୈଳଦର ପ୍ରତିବାଦରେ ଓଡ଼ିଶା ପ୍ରଦେଶ କଂଗ୍ରେସ କମିଟି ପକ୍ଷରୁ କଟକ-ଭୁବନେଶ୍ୱର ସହରରେ ଦିଆଯାଇଥିବା ୬ଘଂଟିଆ ଚକାଜାମ୍ ଆନ୍ଦୋଳନ ଡାକରା ସଫଳ ହୋଇଛି । ଲୋକମାନେ ସ୍ୱତଃପ୍ରବୃତ ଭାବେ ଏହି ଡାକରାକୁ ସମର୍ଥନ ଦେଇଥିବାବେଳେ ସକାଳ ୬ଟାରୁ ୧୨ଟା ପର୍ଯ୍ୟନ୍ତ ଗାଡ଼ିମୋଟର ଚଳାଚଳ ବନ୍ଦ ରହିଥିଲା । କଟକର ମଧୁପାଟଣା ଛକରେ ଜଣେ ଆଇଟିଆଇ ଛାତ୍ରଙ୍କୁ ଆକ୍ରମଣ କରିବା ଘଟଣାକୁ ଛାଡ଼ିଦେଲେ ଅନ୍ୟ କେଉଁଠି ଅପ୍ରୀତିକର ପରିସ୍ଥିତି ସୃଷ୍ଟି ହୋଇନାହିଁ । କଂଗ୍ରେସ କର୍ମୀମାନେ ଉଭୟ ସହରକୁ ସଂଯୋଗ କରୁଥିବା ରାଜପଥ ଓ ସହର ଭିତରେ ପ୍ରମୁ଼ଖ ଛକମାନଙ୍କରେ ବ୍ୟାନର ଓ ପତାକା ଧରି ରାସ୍ତା ଅବରୋଧ କରିଥିଲେ । କେତେକ ସ୍ଥାନରେ ଟାୟାର ଜାଳି ମଧ୍ୟ ପ୍ରତିବାଦ ଜଣାଇଥିଲେ । କଂଗ୍ରେସର ଯୁବ ଓ ଛାତ୍ର କର୍ମୀଙ୍କ ପକ୍ଷରୁ ଏଭଳି ପିକେଟିଂକୁ ନେଇ କେତେକ ସ୍ଥାନରେ ଅସନ୍ତୋଷ ମଧ୍ୟ ପ୍ରକାଶ ପାଇଥିଲା । ରାମମନ୍ଦିର ଛକରେ କିଛି କଂଗ୍ରେସ କର୍ମୀ ଘଂଟ ବଜାଇ ପ୍ରତିବାଦ କରୁଥିବାବେଳେ ଏଜି ଛକରେ କିଛି ଯୁବକ ଏଲ୍ପିଜି ସିଲିଣ୍ଡର ମୁଣ୍ଡାଇ ପ୍ରତିବାଦ ଜଣାଇଥିଲେ । ରାଜଧାନୀ ଭୁବନେଶ୍ୱରରେ ଶତାଧିକ ଯୁବକ ବରମୁଣ୍ଡାରୁ ସାଇକେଲ ଶୋଭାଯାତ୍ରାରେ ବାହାରି ଜୟଦେବ ବିହାର, ଆଚାର୍ଯ୍ୟ ବିହାର, ବାଣୀବିହାର, ଶ୍ରୀୟା ଛକ ବାଟ ଦେଇ କଂଗ୍ରେସ ଭବନରେ ପହଂଚିଥିଲେ । ରାଜମହଲ ଛକରେ ଦଳର ଓଡ଼ିଶା ପ୍ରଭାରୀଙ୍କ ସମେତ ବରିଷ୍ଠ ନେତାମାନେ ମଧ୍ୟ ଆନ୍ଦୋଳନରେ ସାମିଲ ହୋଇଥିଲେ ।
ଏହି ଚକାଜାମ୍ ଯୋଗୁ କଟକ ଓ ଭୁବନେଶ୍ୱରକୁ ଆସିଥିବା ଟ୍ରେନ୍ ଓ ବସ୍ଗୁଡ଼ିକର ଯାତ୍ରୀମାନେ ନାହିଁନଥିବା ହଇରାଣ ହୋଇଥିବାବେଳେ ଅଫିସ୍ ଯିବାପାଇଁ ମଧ୍ୟ ଲୋକମାନଙ୍କୁ ଅସୁବିଧାର ସମ୍ମୁଖୀନ ହେବାକୁ ପଡ଼ିଛି । ଚକାଜାମରେ ଏହି ଦୁଇ ସହରର ସାଧାରଣ ଜନଜୀବନ ପ୍ରଭାବିତ ହୋଇଛନ୍ତି । ତେବେ କଂଗ୍ରେସର ଏହି ଚକାଜାମକୁ ଆଜି ଉଭୟ ବିଜେଡି ଓ ବିଜେପି ସମାଲୋଚନା କରିଛନ୍ତି ।
