ଜଗତସିଂହପୁର : ଦୀର୍ଘ ୪ଦଶନ୍ଧି ଧରି ରାଜ୍ୟ ରାଜନୀତିରେ ଥିବା ବରିଷ୍ଠ ନେତା ଡାକ୍ତର ଦାମୋଦର ରାଉତଙ୍କ ପାଇଁ ଏବେ ନିଜର ଅସ୍ତିତ୍ୱ ରକ୍ଷା କରିବା ଏକ ନୂଆ ଚ୍ୟାଲେଞ୍ଜ ହୋଇଛି।ବିଜେଡିରୁ ବହିଷ୍କାର ପରେ ତାଙ୍କର ଦୀର୍ଘବର୍ଷର ରାଜନୀତିକ ଅଭିଜ୍ଞତା ବି ନିଷ୍ପ୍ରଭ ହେବାରେ ଲାଗିଛି।
ବିଜୁ ପଟ୍ଟନାୟକଙ୍କ ନାଁ ନେଇ ସମବେଦନା ସାଉଁଟିବାକୁ ଚାହୁଁଥିବା ଦାମଙ୍କୁ ଆନ୍ତରିକ ସହଯୋଗ ଦେବାକୁ ଜଣେ ବି ବିଜୁ ଅନୁଗତ ବରିଷ୍ଠ ନେତା ଆଗ୍ରହ ଦେଖାଉନଥିବାବେଳେ ଦାମ ନିଜେ ଗଢ଼ିଥିବା ଅନୁଗତ ମଧ୍ୟ ତାଙ୍କର ପାଖ ମାଡ଼ୁନଥିବା ଜଣାପଡ଼ିଛି।
ବିଜେଡିରୁ ବହିଷ୍କାର ହେବାପରେ ପ୍ରଥମଥର ପାଇଁ ନିଜ ନିର୍ବାଚନମଣ୍ଡଳୀ ଗସ୍ତରେ ଯାଇ ପାରାଦୀପ ଓ କୁଜଙ୍ଗରେ କର୍ମୀମାନଙ୍କ ବୈଠକ କରିଥିଲେ ମଧ୍ୟ ତାଙ୍କର ଖାସ୍ ଅନୁଗତ ଭାବେ ପରିଚିତ ନଗର ବିଜେଡି ସଭାପତି ସୁମନ୍ତ ବିଶ୍ୱାଳ ଓ ପାରାଦୀପ ପୌରାଧ୍ୟକ୍ଷ ବସନ୍ତ ବିଶ୍ୱାଳଙ୍କ ସମେତ ବହୁ ବିଜେଡି ପଦାଧିକାରୀ ବୈଠକକୁ ଆସିନଥିଲେ।ଏପରିକି ଏହି ବୈଠକରେ ଡାକ୍ତର ରାଉତ ‘ଇମୋସନାଲ କାର୍ଡ’ ଖେଳିବା ପାଇଁ ଚେଷ୍ଟା କରିଥିଲେ ମଧ୍ୟ ଆଗଧାଡ଼ିର ବିଜେଡି ନେତାମାନେ ତାଙ୍କ ପାଖ ମାଡ଼ିନଥିଲେ।ଇତିମଧ୍ୟରେ ଆଜି ଡାକ୍ତର ରାଉତ ରାହାମାରେ ସମର୍ଥକଙ୍କ ମେଳି କରିବା ପାଇଁ ଯୋଜନା କରିଛନ୍ତି ଓ ଖୁବଶୀଘ୍ର କୁଜଙ୍ଗରେ ବଡ଼ଧରଣର ସମାବେଶ କରି ନିଜର ଦମ୍ ଦେଖାଇବେ ବୋଲି ଜଣାପଡ଼ିଛି । ତେବେ ଗତକାଲି ଦୁଇଟି ବୈଠକରେ ଦଳର ଆଗଧାଡ଼ିର ନେତାମାନେ ଅନୁପସ୍ଥିତ ରହିବା ଓ କେବଳ ତୃଣମୂଳସ୍ତରର ସମର୍ଥକମାନଙ୍କ ଉପସ୍ଥିତି ଦେଖିବା ପରେ ଡାକ୍ତର ରାଉତ ବ୍ୟତିବ୍ୟସ୍ତ ହୋଇପଡ଼ିଛନ୍ତି । ଏପରକିି ତାଙ୍କର ଫୋନ୍ ମଧ୍ୟ ପାରାଦୀପରେ ଥିବା ତାଙ୍କ ଖାସ୍ ଅନୁଗତ ଧରିବାକୁ କୁଣ୍ଠାବୋଧ କରୁଥିବା ସୂଚନା ମିଳିଛି।
ଏପଟେ ବିଜୁ ଅନୁଗତ ବିଜୟ ମହାପାତ୍ର, ଦିଲ୍ଲୀପ ରାୟ, ବୈଜୟନ୍ତ ପଣ୍ଡା, ରାମକୃଷ୍ଣ ପଟ୍ଟନାୟକ, ପଂଚାନନ କାନୁନଗୋ, ଜୟରାମ ପାଙ୍ଗୀ, ପ୍ରଫୁଲ୍ଲ ଘଡେଇ ଆଦିଙ୍କୁ ଏକଜୁଟ କରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଅଡ଼ୁଆରେ ପକାଇବା ପାଇଁ ଯେଉଁ ପ୍ରୟାସ କରୁଥିଲେ ତାହା ବି ଫସର ଫାଟିଛି।ଏହି ନେତାମାନେ ଦାମଙ୍କ ଭଳି ବରିଷ୍ଠ ସହଯୋଗୀଙ୍କ ଅସମୟରେ ସମବେଦନା ପ୍ରକଟ କରିଥିଲେ ମଧ୍ୟ ତାଙ୍କୁ ଭରସାକୁ ନେଇପାରୁନଥିବା ଜଣାପଡ଼ିଛି।ଦାମଙ୍କ ସୁବିଧାବାଦୀ ଆଚରଣକୁ ଅଙ୍ଗେ ନିଭାଇଥିବା ଏହି ବରିଷ୍ଠ ନେତାମାନେ ଖାସ୍ ଏହି କାରଣରୁ ନୂଆ ଦଳ ଗଠନ କରିବା ପାଇଁ ଦାମଙ୍କ ପ୍ରୟାସ ପ୍ରତି ବିଶେଷ ଆଗ୍ରହ ଦେଖାଉନାହାନ୍ତି।ନୂଆଦଳ ଗଢ଼ି ନବୀନଙ୍କୁ ଟକ୍କର ଦେବା ସହଜ ନୁହେଁ ଓ ଏହା ରାଜନୀତିକ ଆତ୍ମହତ୍ୟା ସଦୃଶ ବୋଲି ଏହି ଅଭିଜ୍ଞ ନେତାମାନେ ଅନୁଭବ କରିସାରିଛନ୍ତି।ତେଣୁ ବିଜୁ ଅନୁଗତମାନଙ୍କ ଏଭଳି ଆଚରଣକୁ ଅନୁଭବ କରିବା ପରେ ଡାକ୍ତର ରାଉତ ଅସହାୟ ହୋଇପଡ଼ିଛନ୍ତି। ଆଉ ସବୁଆଡ଼ୁ ବିଫଳ ହେବାପରେ ଦାମ ଏବେ କେବଳ ନିଜ ତୁଣ୍ଡ ଭରସାରେ ଗଣମାଧ୍ୟମରେ ତିଷ୍ଠି ରହିବାକୁ ଯୋଜନା କରୁଥିବା ଚର୍ଚ୍ଚା।
