ଭୁବନେଶ୍ୱର(ଓଡ଼ିଶା ୱେୟାର): ବିଜେଡିରେ ସାମିଲ ହେବା ପାଇଁ ଗୋଡ଼ ଟେକି ବସିଥିବା ସୁନ୍ଦରଗଡ଼ ବିଧାୟକ ଯୋଗେଶ ସିଂ କଂଗ୍ରେସରୁ ନିଲମ୍ବିତ ହୋଇଛନ୍ତି । ଦଳବିରୋଧୀ କାର୍ଯ୍ୟ ପାଇଁ ତାଙ୍କ ବିରୁଦ୍ଧରେ ଏଭଳି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି ପିସିସି ଶୃଙ୍ଖଳା କମିଟି ଆବାହକ ଅନନ୍ତ ପ୍ରସାଦ ସେଠୀ ସୂଚନା ଦେଇଛନ୍ତି । ଶ୍ରୀ ସିଂଙ୍କ ବିରୁଦ୍ଧରେ ଆଜି ସନ୍ଧ୍ୟା ସୁଦ୍ଧା ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ହେବ ବୋଲି ପିସିସି ଶୃଙ୍ଖଳା କମିଟି ଅଧ୍ୟକ୍ଷ ହେମାନନ୍ଦ ବିଶ୍ୱାଳ ସୂଚନା ଦେଇଥିଲେ ।
କଂଗ୍ରେସରୁ ନିଲମ୍ବିତ ହେବା ପରେ ଶ୍ରୀ ସିଂ ଘୋଷଣା କରିଛନ୍ତି ଯେ, ସେ ବିଧାୟକ ପଦ ଓ କଂଗ୍ରେସରୁ ଇସ୍ତଫା ଦେବେ ।
ସୂଚନା ଅନୁସାରେ, ବିଧାୟକ ଶ୍ରୀ ସିଂ ଗତ କିଛିଦିନ ଧରି ବିଜେଡିକୁ ସୁହାଇବା ଭଳି ବୟାନ ଦେବାରେ ଲାଗିଛନ୍ତି । ଏପରିକି ଆସନ୍ତା ୨୫ତାରିଖରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧିଙ୍କ ଓଡ଼ିଶା ଗସ୍ତ କାର୍ଯ୍ୟକ୍ରମରେ ସେ ଯୋଗଦେବେନି ବୋଲି ସେ ଘୋଷଣା କରିଥିଲେ । ନିଜ ନିର୍ବାଚନମଣ୍ଡଳୀରେ କିଛି ପୂର୍ବ ନିର୍ଦ୍ଧାରିତ କାର୍ଯ୍ୟ ଥିବାରୁ ସେ ଅନୁପସ୍ଥିତ ରହିବେ ବୋଲି କହିଥିଲେ । ଏହାସହିତ ନବୀନ ପଟ୍ଟନାୟକଙ୍କୁ ଜଣେ ବିଚକ୍ଷଣ ରାଜନେତା ଓ ଦକ୍ଷ ଶାସକ ବୋଲି ମଧ୍ୟ ମତ ଦେବାକୁ ପଛାଇ ନଥିଲେ । ଯୋଗେଶଙ୍କ ବିଜେଡିକୁ ସୁହାଇବା ଭଳି ବୟାନକୁ ଆଧାର କରି କଂଗ୍ରେସ ତାଙ୍କ ବିରୁଦ୍ଧରେ ଏଭଳି ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରିଛି । ଯଦିଓ ସାଲେପୁର ବିଧାୟକ ପ୍ରକାଶ ବେହେରା ମଧ୍ୟ ଏବେ ବିଜେଡିରେ ସାମିଲ ହେବାକୁ ପ୍ରୟାସ କରୁଥିବାର ଖବର ଗଣମାଧ୍ୟମରେ ପ୍ରକାଶ ପାଇଥିଲା । ଆଉ ତା’ଆଧାରରେ ଶ୍ରୀ ବେହେରାଙ୍କ ବିରୁଦ୍ଧରେ ମଧ୍ୟ ଅନୁରୂପ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ହେବାର ଆଶଙ୍କା କରାଯାଉଥିଲା, କିନ୍ତୁ ଶେଷ ମୁହୂର୍ତ୍ତରେ ପିସିସି ସଭାପତି ନିରଞ୍ଜନ ପଟ୍ଟନାୟକଙ୍କ ହସ୍ତକ୍ଷେପ ଯୋଗୁ ଶ୍ରୀ ବେହେରାଙ୍କ ଉପରେ ଦଳୀୟ କାର୍ଯ୍ୟାନୁଷ୍ଠାନକୁ ସାମୟିକ ସ୍ଥଗିତ ରଖାଯାଇଛି ।
ଶ୍ରୀ ବେହେରା ମଧ୍ୟ ଆଜି ଗଣମାଧ୍ୟମକୁ ପ୍ରତିକ୍ରିୟା ଦେଇ ସେଭଳି କୌଣସି ଦଳବିରୋଧୀ ମନ୍ତବ୍ୟ ଦେଇନଥିବା ସ୍ପଷ୍ଟ କରିଥିଲେ ।
ସୂଚନାଯୋଗ୍ୟ, କଂଗ୍ରେସ ବିଧାୟକ ନବ ଦାସ ଗତକାଲି କଂଗ୍ରେସରୁ ଇସ୍ତଫା ଦେଇଛନ୍ତି ଓ ୨୪ତାରିଖରେ ବିଜେଡିରେ ସାମିଲ ହେବାର କାର୍ଯ୍ୟକ୍ରମ ରହିଛି । ନବଙ୍କ ଭଳି ଯୋଗେଶ ଓ ପ୍ରକାଶ ବିଜେଡିରେ ସାମିଲ ହେବେ ବୋଲି ଚର୍ଚ୍ଚା ହେଉଛି ।
