ସେଞ୍ଚୁରିୟନ : ଏଠାରେ ଚାଲିଥିବା ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ବକ୍ସିଂ ଡେ ଟେଷ୍ଟର ପ୍ରଥମ ଇନିଂସରେ ୩୨୭ ରନରେ ଅଲଆଉଟ ହୋଇଯାଇଛି ଭାରତ । ଦ୍ୱିତୀୟ ଦିନ ଟେଷ୍ଟକୁ ବର୍ଷା ଧୋଇ ଦେଇଥଲା । ପ୍ରଥମ ଦିନ ଖେଳ ଶେଷ ବେଳକୁ ଭାରତ ୩ ଓ୍ବିକେଟ ହରାଇ ୨୭୧ରନ କରିଥଲା । ତୃତୀୟ ଦିନ ଖେଳ ସେହିଠାରୁ ଆରମ୍ଭ କରି ଭାରତ ବ୍ୟାଟିଂ ବିପର୍ୟ୍ୟୟର ସମ୍ମୁଖୀନ ହୋଇଥଲା ମାତ୍ର ୫୬ ରନରେ ଅ।ଉ ୭ ଓ୍ବିକେଟ ହରାଇଥଲା ଭାରତ ଶତକୀୟ ଇନିଂସ ଖେଳି ବ୍ୟାଟିଂ କରୁଥିବା ଲୋକେସ ରାହୁଲ ଆରମ୍ଭରୁ ଓ୍ବିକେଟ ହରାଇଥିଲେ ଏହାପରେ ଦଳର ଜଣେ ପରେ ଜଣେ ବ୍ୟାଟ୍ସମ୍ୟାନ୍ ପ୍ୟାଭିଲିୟନ ଫେରିଥିଲେ ୨୭୧ ରନରେ ୩ ଓ୍ବିକେଟ ହରାଇଥିବା ଦଳ ତୃତୀୟ ଦିନରେ ମାତ୍ର ୫୬ରନରେ ୭ଟି ଓ୍ବିକେଟ ହରାଇଛି ।
ଦଳ ପକ୍ଷରୁ ଲୋକେସ ରାହୁଲ ସର୍ବାଧିକ ୧୨୩ରନ କରିଥିବା ବେଳେ ମୟଙ୍କ ଅଗ୍ରଓ୍ବାଲ ୬୦ରନ କରିଛନ୍ତି । ଫର୍ମ ପାଇଁ ସଂଘର୍ଷ କରୁଥିବା ପୁଜାରା ପୁଣି ଫେଲ ମାରିଛନ୍ତି । ଖାତା ଖୋଲିବା ପୂର୍ବରୁ ଆଉଟ ହୋଇଛନ୍ତି ପୁଜାରା । ଅନ୍ୟମାନଙ୍କ ମଧ୍ୟରେ ଅଧିନାୟକ ବିରାଟ କୋହଲି ୩୫ରନ କରିଥିବା ବେଳେ, ଅଜିଙ୍କ୍ୟ ରାହାଣେ ୪୮ରନ, ଋଷଭ ପନ୍ତ ୮ରନ, ରବିଚନ୍ଦ୍ରନ ଅଶ୍ବିନ ୪ରନ, ଶାର୍ଦ୍ଦୁଳ ଠାକୁର ୪ରନ, ମହମ୍ମଦ ସାମୀ ୮ରନ, ବୁମରାହ ୧୪ରନ କରି ଆଉଟ ହୋଇଛନ୍ତି । ମହମ୍ମଦ ସିରାଜ ୪ ରନ କରି ଅପରାଜିତ ଅଛନ୍ତି ।
ଦକ୍ଷିଣ ଆଫ୍ରିକା ପକ୍ଷରୁ ଲୁଙ୍ଗି ଏନ୍ଗିଡି ଏବଂ କାଗିସୋ ରାବାଡା ଚମତ୍କାର ବୋଲିଂ କରିଛନ୍ତି । ଏନ୍ଗିଡି ୨୪ ଓଭରରେ ୭୧ରନ ଦେଇ ୬ଓ୍ବିକେଟ ନେଇଥିବା ବେଳେ, କାଗିସୋ ରାବାଡା ୨୬ ଓଭରରେ ୭୨ରନ ଦେଇ ୩ ଓ୍ବିକେଟ ନେଇଛନ୍ତି । ସେହିଭଳି ମାର୍କୋ ଜନସେନ୍ ୧୮.୩ ଓଭରରେ ୬୯ରନଦେଇ ଗୋଟିଏ ଓ୍ବିକେଟ ନେଇଛନ୍ତି । ଓ୍ବୟାନ୍ ମଲ୍ଡର ୧୯ ଓଭରରେ ୪୯ରନ ଏବଂ କେଶବ ମହାରାଜ ୧୮ ଓଭରରେ ୫୮ରନ ଦେଇଛନ୍ତି ।
ରିପୋର୍ଟ ଶେଷ ବେଳକୁ ଦକ୍ଷିଣ ଆଫ୍ରିକା ପ୍ରଥମ ଇନିଂସ ବ୍ୟାଟିଂ ଜାରି ରଖିଛି । ଦଳ ୩ ଓଭରରେ ୧୦ରନଦେଇ ଗୋଟିଏ ଓ୍ବିକେଟ ହରାଇଛି । ଡିନ୍ ଏଲଗାର ମାତ୍ର ୧ ରନକରି ଆଉଟ ହୋଇଛନ୍ତି ।
