ଭୁବନେଶ୍ୱର : ୨୦୧୯ ସାଧାରଣ ନିର୍ବାଚନ ପାଇଁ ଜୋରଦାର ପ୍ରସ୍ତୁତି କରୁଥିବା ରାଜ୍ୟ କଂଗ୍ରେସ ଆସନ୍ତା ଅଗଷ୍ଟ ମାସ ସୁଦ୍ଧା ୫୦ଟି ବିଧାନସଭା ଆସନରେ ଚୂଡ଼ାନ୍ତ ପ୍ରାର୍ଥୀଙ୍କ ନାଁ ଘୋଷଣା କରିବ । ଜାତୀୟ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧି ଗତକାଲି ଓଡ଼ିଶା ପାଇଁ ୩ଜଣିଆ ସ୍କ୍ରନିଂ କମିଟି ଘୋଷଣା କରିବା ପରେ ଆଜି ଓଡ଼ିଶା ପ୍ରଦେଶ କଂଗ୍ରେସ କମିଟି ସଭାପତି ନିରଞ୍ଜନ ପଟ୍ଟନାୟକ ଏହି ସୂଚନା ଦେଇଛନ୍ତି ।
ଶ୍ରୀ ପଟ୍ଟନାୟକ କହିଛନ୍ତି ଯେ, ବିଜୟ ସମ୍ଭାବନା ଥିବା ପ୍ରାର୍ଥୀଙ୍କୁ ନିଜ ନିର୍ବାଚନମଣ୍ଡଳୀରେ ଭଲ ଭାବେ ପ୍ରସ୍ତୁତି ଓ ସାଂଗଠନିକ କାର୍ଯ୍ୟ କରିବାକୁ ସୁଯୋଗ ଦେବା ପାଇଁ ଓଡ଼ିଶା ପିସିସି ପକ୍ଷରୁ ୫୦ଜଣ ପ୍ରାର୍ଥୀଙ୍କ ନାଁ ଆଗୁଆ ଘୋଷଣା କରାଯିବ । ରାଜ୍ୟର ଏକ ନମ୍ବର ଦଳ ହେବା ପାଇଁ କଂଗ୍ରେସ ଏଥର ନିର୍ବାଚନ ଲଢ଼ିବ । ଓଡ଼ିଶାବାସୀ ପୁଣିଥରେ ଭୁଲ୍ କରିବେ ନାହିଁ ବୋଲି ସେ ଆଶାବାଦୀ ଅଛନ୍ତି । ଆଗୁଆ ପ୍ରାର୍ଥୀ ଘୋଷଣା ସମେତ କଂଗ୍ରେସ ସମସ୍ତ ୩୩ଟି ସାଂଗଠନିକ ଜିଲ୍ଲାରେ ଜୁଲାଇ ୧୫ତାରିଖ ସୁଦ୍ଧା ବୁଥ୍ କମିଟି ଗଠନ କରିବ । ଆଗୁଆ ପ୍ରାର୍ଥୀ ଘୋଷଣା ପଦକ୍ଷେପ ୨୦୧୮ ମାର୍ଚ୍ଚ ୩୦ ତାରିଖରେ ଓଡ଼ିଶା ପିସିସି କାର୍ଯ୍ୟକାରୀ ସଭାପତି ପ୍ରଦୀପ ମାଝୀ ଦ୍ୱାରା ନିଆଯାଇଥିଲା । ଶ୍ରୀ ମାଝୀ ମାଲକାନଗିରି ଜିଲ୍ଲାରେ କର୍ମୀମାନଙ୍କ ସହ ବୈଠକବେଳେ କୋରାପୁଟ ଜିଲ୍ଲାର ସମସ୍ତ ୭ଟି ବିଧାନସଭା ନିର୍ବାଚନମଣ୍ଡଳୀରେ ଆଗୁଆ ପ୍ରାର୍ଥୀ ଚୟନ ଘୋଷଣା ଖୁବଶୀଘ୍ର ହେବ ବୋଲି ସୂଚନା ଦେଇଥିଲେ ।
