ଭୁବନେଶ୍ୱର : ଓଡ଼ିଶା ସମେତ ସମଗ୍ର ଦେଶରେ ନଭେମ୍ବର କିମ୍ବା ଡିସେମ୍ବର ମାସରେ ସାଧାରଣ ନିର୍ବାଚନ ହୋଇପାରେ । ରାଜସ୍ଥାନ, ମଧ୍ୟପ୍ରଦେଶ ଓ ଛତିଶଗଡ଼ର ବିଧାନସଭା ନିର୍ବାଚନ ସହ ଦେଶରେ ଲୋକସଭା ନିର୍ବାଚନ ଏବଂ ଓଡ଼ିଶାରେ ବିଧାନସଭା ନିର୍ବାଚନ ହେବାର ସମ୍ଭାବନା ରହିଛି । ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁରେନ୍ଦ୍ର କୁମାର ସମସ୍ତ ଜିଲ୍ଲାପାଳଙ୍କୁ ଚିଠି ଳେଖି ସାଧାରଣ ନିର୍ବାଚନରେ କେତେ ଖର୍ଚ୍ଚ ହେବ ତାହା ଜଣାଇବାକୁ କହିବା ପରେ ରାଜ୍ୟର ପ୍ରମୁଖ ରାଜନୀତିକ ଦଳଗୁଡ଼ିକ ମଧ୍ୟରେ ନିର୍ବାଚନକୁ ନେଇ ପ୍ରସ୍ତୁତି ଜୋରଦାର ହୋଇଛି । ପ୍ରଥମ ଥର ପାଇଁ ଆସନ୍ତା ସାଧାରଣ ନିର୍ବାଚନ ବେଳେ ଓଡ଼ିଶାରେ ଭିବିପ୍ୟାଟ୍ ବ୍ୟବହାର କରାଯିବ ।
ମିଳିଥିବା ସୂଚନା ଅନୁସାରେ ସୁରେନ୍ଦ୍ର କୁମାର ଜିଲ୍ଲାପାଳମାନଙ୍କୁ ଲେଖିଥିôବା ଚିଠି ଅନୁସାରେ ଚଳତବର୍ଷ ଶେଷ ଭାଗ ଆଡ଼କୁ କିମ୍ବା ୨୦୧୯ ମସିହା ପ୍ରଥମ ଭାଗରେ ସାଧାରଣ ନିର୍ବାଚନ ହେବାର ସମ୍ଭାବନା ରହିଛି ବୋଲି କହିଛନ୍ତି । ତେଣୁ ସାଧାରଣ ନିର୍ବାଚନରେ କେତେ ଟଙ୍କା ଖର୍ଚ୍ଚ ହେବ ସେ ନେଇ ଜିଲ୍ଲାପାଳମାନଙ୍କୁ ଏକ ନିର୍ଦ୍ଧାରିତ ଫର୍ମାଟରେ ବିବରଣୀ ଓ ହିସାବ ପଠାଇବାକୁ କୁହାଯାଇଛି । ନିର୍ବାଚନ ପରିଚାଳନା, ଭୋଟରଙ୍କ ସୁରକ୍ଷା, ଭିଡିଓଗ୍ରାଫି ଠାରୁ ଆରମ୍ଭ କରି ଇଭିଏମ୍ ପର୍ଯ୍ୟନ୍ତ ୨୪ଟି ବର୍ଗରେ କେତେ ଖର୍ଚ୍ଚ ହେବ ତା’ର ହିସାବ ମଗାଯାଇଛି । ଷ୍ଟ୍ରଙ୍ଗରୁମ୍ଗୁଡ଼ିକର ସ୍ଥିତି ସହ ପୁଲିଂଂ ପାର୍ଟିର ଯାତାୟାତ ଓ ବୁଥ୍ ଖର୍ଚ୍ଚର ହିସାବ ଦେବାକୁ କୁହାଯାଇଛି । ଚଳିତ ମାସ ୨୦ ତାରିଖ ସୁଦ୍ଧା ଉକ୍ତ ଫର୍ମାଟ୍ରେ ରିପୋର୍ଟ ଦେବାଲାଗି କୁହାଯାଇଥିଲା । ରାଜ୍ୟ ମୁଖ୍ୟ ନିର୍ବାଚନ ଅଧିକାରୀ ସୁରେନ୍ଦ୍ର କୁମାର ଦେଇଥିବା ସୂଚନା ଅନୁସାରେ ଇତି ମଧ୍ୟରେ ଅଧିକାଂଶ ଜିଲ୍ଲାରୁ ରିପୋର୍ଟ ଆସିସାରିଲାଣି । ଏହି ରିପୋର୍ଟକୁ ଦିଲ୍ଲୀସ୍ଥିତ ନିର୍ବାଚନ ଆୟୋଗଙ୍କ କାର୍ଯ୍ୟାଳୟକୁ ପଠାଯିବ । ସୂଚନାଯୋଗ୍ୟ ଯେ ଆସନ୍ତା ମାର୍ଚ୍ଚ ମାସରେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ କାର୍ଯ୍ୟକାଳ ଶେଷ ହେଉଛି । ଆସନ୍ତା ନଭେମ୍ବର ମାସରେ ଉଭୟ ବିଧାନସଭା ଏବଂ ଲୋକସଭା ପାଇଁ ନିର୍ବାଚନ ଅନୁଷ୍ଠିତ ହେବାର ସମ୍ଭାବନା ରହିଛି ବୋଲି ବିଜେଡି ଆଜି ନୁହେଁ ଦୁଇମାସ ପୂର୍ବରୁ ନିର୍ବାଚନ କମିଶନ ଏନେଇ ପ୍ରସ୍ତୁତି ଆରମ୍ଭ କରିସାରିଛନ୍ତି ବୋଲି ଦଳର ମୁଖପାତ୍ର ତଥା ରାଜ୍ୟ ସଭା ସାଂସଦ ପ୍ରତାପ ଦେବ କହିଛନ୍ତି । ତେବେ ଆଗୁଆ ନିର୍ବାଚନ ପାଇଁ ତାଙ୍କ ଦଳ ଆଦୌ ବିଚଳିତ ନୁହେଁ ଏବଂ ଏନେଇ ପ୍ରସ୍ତୁତି ଆରମ୍ଭ ହୋଇସାରିଛି ବୋଲି ସେ ସୂଚନା ଦେଇଛନ୍ତି ।
