ଭୁବନେଶ୍ୱର୍ : ବନ୍ଦେ ଉକ୍ରଳ ଜନନୀ ସଙ୍ଗୀତରୁ ‘ଉକ୍ରଳ’ ଶବ୍ଦ ବାଦ୍ ଦେଇ ‘ଓଡ଼ିଶା’କୁ ସାମିଲ କରିବା ପାଇଁ ଶ୍ରମମନ୍ତ୍ରୀ ସୁଶାନ୍ତ ସିଂ ଦେଇଥିବା ବୟାନକୁ ବିଜେଡିର ବରିଷ୍ଠ ନେତା ଡାକ୍ତର ଦାମୋଦର ରାଉତ କଡ଼ା ଭାଷାରେ ନିନ୍ଦା କରିଛନ୍ତି । ଆଞ୍ଚଳିକବାଦ କଥା କହି ମନ୍ତ୍ରୀ ସୁଶାନ୍ତ ସିଂ ରାଜ୍ୟକୁ ଭାଗଭାଗ କରିବାକୁ ଉଦ୍ୟମ କରୁଛନ୍ତି ବୋଲି ଡାକ୍ତର ରାଉତ କହିଛନ୍ତି ।
ଆଜି ଗଣମାଧ୍ୟମକୁ ପ୍ରତିକ୍ରିୟା ଦେଇ ଡାକ୍ତର ରାଉତ କହିଛନ୍ତି ଯେ, ୨୦୧୨ ମେ’ ୨୯ରେ ନବୀନ ପଟ୍ଟନାୟକଙ୍କୁ ଗାଦିଚ୍ୟୁତ କରିବା ପାଇଁ ସେ ପ୍ୟାରୀମୋହନ ମହାପାତ୍ରଙ୍କ କଥାରେ ହୋଟେଲ୍ ସ୍ୱସ୍ତି ପ୍ଲାଜାରେ ଲୁଚି ରହିଥିଲେ । ସେତେବେଳେ ଏହା ଜାଣି ନିଜେ ପ୍ରସନ୍ନ ଆଚାର୍ଯ୍ୟଙ୍କୁ କହିବା ପରେ ସେ ତାଙ୍କୁ ସେଠାରୁ ବାହାର କରିଥିଲେ । ନବୀନ ପଟ୍ଟନାୟକଙ୍କ ଲୋକପ୍ରିୟତା ଯୋଗୁ ସେ ଆଉଥରେ ଜିତିକି ଆସି ମନ୍ତ୍ରୀ ହୋଇଛନ୍ତି । ସିଏ ମନ୍ତ୍ରୀ ହୁଅନ୍ତୁ, ମୋର ଇର୍ଷା କରିବାର ନାହିଁ । କିନ୍ତୁ ରାଜ୍ୟର ସ୍ୱାର୍ଥକୁ ତଳିତଳାନ୍ତ କରି କ୍ଷମତା ଉପଭୋଗ କରନ୍ତୁ ନାହିଁ ବୋଲି ଡାକ୍ତର ରାଉତ କହିଛନ୍ତି । ରାଜ୍ୟ ରାଜନୀତିରେ ମନ୍ତ୍ରୀ ସୁଶାନ୍ତ ସିଂହଙ୍କ ବିଶେଷ ଦଖଲ ନଥିବାବେଳେ ନବୀନଙ୍କ ହାୱାରେ ସେ ନିର୍ବାଚନ ଜିତିଛନ୍ତି । ରାଜ୍ୟକୁ ଭାଗ ଭାଗ କରିବା ପାଇଁ ମନ୍ତ୍ରୀଙ୍କ ଏଭଳି ମନ୍ତବ୍ୟ କଦାପି ସହି ହେବନାହିଁ । ସାଧାରଣ ଜ୍ଞାନ ନଥାଇ ମନ୍ତ୍ରୀମାନେ ବକ୍ତବ୍ୟ ଦେଉଛନ୍ତି ତଥା ମନ୍ତ୍ରୀଙ୍କ ଆଚରଣ ଓ ଉଚ୍ଚାରଣ ସମ୍ବିଧାନ ସମ୍ମତ ହେବା ଉଚିତ୍ । ଯେଉଁ ଗୀତକୁ ରାଜ୍ୟ ସଙ୍ଗୀତର ମାନ୍ୟତା ଦେବା ପାଇଁ ପ୍ରସ୍ତାବ ବିଧାନସଭାରେ ଗୃହୀତ ହୋଇସାରିଛି, ସେହି ସଙ୍ଗୀତକୁ ଜଣେ ଦାୟିତ୍ୱବାନ ମନ୍ତ୍ରୀ ବିରୋଧ କରିବାଠୁ ଦୁର୍ଭାଗ୍ୟ କ’ଣ ଅଛି ବୋଲି ଡାକ୍ତର ରାଉତ କହିଛନ୍ତି ।
