ଭୁବନେଶ୍ୱର : ବିଶ୍ୱପ୍ରସିଦ୍ଧ ଶ୍ରୀଜଗନ୍ନାଥ ମନ୍ଦିର ପରିଚାଳନାରେ ସଂସ୍କାର ଆଣିବା ପାଇଁ ରାଜ୍ୟ ସରକାର ଜୁନ୍ ୧୨ ତାରିଖରେ ୩ଜଣିଆ ବିଶେଷଜ୍ଞ କମିଟି ଗଠନ କରିଛନ୍ତି । ଅତିରିକ୍ତ ମୁଖ୍ୟ ସଚିବ ସୁରେଶ ମହାପାତ୍ରଙ୍କ ଅଧ୍ୟକ୍ଷତାରେ ଗଠିତ ଏହି କମିଟି ଦେଶର ପ୍ରମୁଖ ମନ୍ଦିରର ପରିଚାଳନାକୁ ଅନୁଧ୍ୟାନ କରି ରାଜ୍ୟ ସରକାରଙ୍କୁ ରିପୋର୍ଟ ଦେବେ । ଏପଟେ ରତ୍ନଭଣ୍ଡାର ଚାବି ହଜିବା ଘଟଣାର ତଦନ୍ତ ପାଇଁ ଗଠିତ ଜଷ୍ଟିସ ରଘୁବୀର ଦାଶ କମିଶନଙ୍କ ପାଇଁ ରାଜ୍ୟ ସରକାର ଟର୍ମ ଅଫ୍ ରେଫରେନ୍ସ ଜାରି କରିଛନ୍ତି ।
ଆଇନ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁସାରେ ଏହି କମିଟିରେ କେନ୍ଦ୍ରାଞ୍ଚଳ ପୁଲିସ ଆଇଜି ସୌମେନ୍ଦ୍ର ପ୍ରିୟଦର୍ଶୀ ଓ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ମହିମୋହନ ତ୍ରିପାଠୀ ସଦସ୍ୟ ଅଛନ୍ତି । ଏହି ୩ଜଣିଆ ଟିମ୍ ବୈଷ୍ଣୋଦେବୀ ମନ୍ଦିର, ସୋମନାଥ ମନ୍ଦିର, ଅମୃତସରର ସ୍ୱର୍ଣ୍ଣ ମନ୍ଦିର ଓ ତିରୁପତି ମନ୍ଦିରକୁ ଯାଇ ସେଠାରେ ପରିଚାଳନା ବ୍ୟବସ୍ଥାର ଅନୁଧ୍ୟାନ କରିବେ । ଶ୍ରୀଜଗନ୍ନାଥ ମନ୍ଦିର ପରିଚାଳନା ପାଇଁ ଯାହା ସଂଶୋଧନ ଆବଶ୍ୟକ ପଡ଼ିବ ସେ ନେଇ ସରକାରଙ୍କୁ ସୁପାରିସ କରିବେ । ସୂଚନାଯୋଗ୍ୟ, ପୂର୍ବରୁ ସୁପ୍ରିମକୋର୍ଟ କଠୋର ଆଭିମୁଖ୍ୟ ପୋଷଣ କରି ଦେଶର ପ୍ରମୁଖ ମନ୍ଦିରଗୁଡ଼ିକର ପରିଚାଳନାକୁ ଅନୁଧ୍ୟାନ ପାଇଁ ବିଶେଷଜ୍ଞ କମିଟି ଗଠନ କରି ଏକ ରିପୋର୍ଟ ଦାଖଲ କରିବାକୁ ଓଡ଼ିଶା ସରକାରଙ୍କୁ ନିର୍ଦ୍ଦେଶ ଦେଇଥିଲେ । ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ ଏହି କମିଟି ଜୁନ୍ ୩୦ତାରିଖ ସୁଦ୍ଧା ନିଜର ଆଭ୍ୟନ୍ତରୀଣ ରିପୋର୍ଟ ଦାଖଲ କରିବେ ବୋଲି ଆଇନ ବିଭାଗ ସୂତ୍ରରୁ ଜଣାପଡ଼ିଛି । ଟର୍ମ ଅଫ୍ ରେଫରେନ୍ସରେ ମୁଖ୍ୟତଃ ୩ଟି ଦିଗ ଉପରେ ତଦନ୍ତ କରିବାକୁ କମିଶନଙ୍କୁ କୁହାଯାଇଛି । ପ୍ରଥମତଃ କେଉଁ ପରିସ୍ଥିତିରେ ଭିତର ରତ୍ନଭଣ୍ଡାର ଚାବି ଉପଲବ୍ଧ ହେଉନି ତାହା ଯାଞ୍ଚ କରିବେ । ଦ୍ୱିତୀୟତଃ ଚାବି ନମିଳିବା ପାଇଁ କିଏ ଦାୟୀ ତାହା ମଧ୍ୟ ଖୋଜିବେ । ତୃତୀୟତଃ ଏଭଳି ପରିସ୍ଥିତି ଭବିଷ୍ୟତରେ ଏଡ଼ାଇବା ପାଇଁ କମିଶନ ତାଙ୍କର ପରାମର୍ଶ ଦେବେ ।
