ନୂଆଦିଲ୍ଲୀ: ସଂସଦରେ ସରକାରଙ୍କୁ ଘେରିବାକୁ ବିରୋଧୀ ଦଳର ନେତାଙ୍କ ସହିତ ଜଳପାନ ବୈଠକ କରିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ । ଏହି ବୈଠକରେ ରାହୁଲ ନେତୃତ୍ବ ନେଉଥିବା ବେଳେ ବିରୋଧୀ ଦଳର ନେତାମାନେ ଉପସ୍ଥିତ ଥିଲେ । ବୈଠକରେ ସରକାରଙ୍କୁ ଘେରିବାକୁ କଡ଼ା ରଣନୀତି ରାହୁଲ ପ୍ରସ୍ତୁତ କରିଥିବା ଜଣାପଡ଼ିଛି । ଏହି ବୈଠକରେ କଂଗ୍ରେସ, ଏନସିପି, ଶିବସେନା, ଆରଜେଡ଼ି, ସମାଜବାଦୀ ପାର୍ଟି, ମାକପା, ଭାକପା, ଆଇୟୁଏମଏଲ, ଆରଏସପି, କେସିଏମ, ଜେଏମଏମ, ନ୍ୟାସନାଲ କନଫ୍ରେସ, ତୃଣମୂଳ କଂଗ୍ରେସ ଓ ଏଲଜେଡ଼ିର ନେତାମାନେ ସାମିଲ ହୋଇଥିଲେ ।
ସେହିପରି ଆମ ଆଦମୀ ପାର୍ଟିର ନେତାଙ୍କୁ ରାହୁଲ ବୈଠକରେ ଯୋଗଦେବାକୁ ନିମନ୍ତ୍ରଣ ଦେଇଥିଲେ ମଧ୍ୟ ଆପର କୌଣସି ନେତା ଏହି ବୈଠକରେ ସାମିଲ ହୋଇନଥିଲେ । ଆପ ସାଂସଦ ସଞ୍ଜୟ ସିଂହ କହିଥିଲେ କି ବୈଠକରେ ସାମିଲ ହେବା ନ ହେବା ଗୁରୁତ୍ତ୍ବପୂର୍ଣ୍ଣ ନୁହେଁ । କିନ୍ତୁ ସଂସଦରେ ଯେବେ ଚର୍ଚ୍ଚା ହେବା, ଆମେ କୃଷକଙ୍କ ସପକ୍ଷରେ ଓ ପେଗାସସ ବିରୋଧରେ ଛିଡ଼ା ହେବୁ ଏବଂ ଚର୍ଚ୍ଚାରେ ସାମିଲ ହେବୁ ।
ସେହିପରି ପେଗାସସ ମୁଦ୍ଦାକୁ ନେଇ ସରକାରଙ୍କୁ ବାରମ୍ବାର ସଂସଦରେ ଘେରୁଛନ୍ତି ବିରୋଧୀ । ଫଳରେ ସଂସଦ କାର୍ୟ୍ୟ ସଠିକ ଭାବେ ପରିଚାଳନା ହୋଇ ପାରୁନାହିଁ । ଏହାକୁ ନେଇ ସରକାର ବିରୋଧୀଙ୍କୁ ଟାର୍ଗେଟ କରୁଥିବା ବେଳେ ବିରୋଧୀ ମଧ୍ୟ ସରକାରଙ୍କୁ କଡ଼ା ସମାଲୋଚନା କରି ଆସୁଛନ୍ତି । ବିରୋଧୀ କହିଛନ୍ତି କି ସରକାର ଲୋକଙ୍କ ସମସ୍ୟା ଉପରେ ଆଲୋଚନା କରିବାକୁ ପଛଘୁଞ୍ଚା ଦେଉଛନ୍ତି । ସେପଟେ ସଂସଦର ମୌସୂମୀ ଅଧିବେସନରେ ମଧ୍ୟ ଏନଡିଏର ସହଯୋଗୀ ଦଳର କିଛି ନେତା ପେଗାସସ ଜାସୁସୀ ପାଇଁ ତଦନ୍ତ ଦାବି କରି ଆସୁଛନ୍ତି ।
ସେହିପରି ଏନଡିଏ ସହଯୋଗୀ ତଥା ବିହାର ମୁଖ୍ୟମନ୍ତ୍ରୀ ନୀତୀଶ କୁମାର କହିଛନ୍ତି କି, ଏହି ପେଗାସସ ଜାସୁସୀର ତଦନ୍ତ ଦଳ ଦାବି କରୁଛି । ଦୀର୍ଘ ଦିନ ହେବ ଏହି ମାମଲା ଚାଲୁ ରହିଛି । ଏଥିପାଇଁ ଆମେ ଏହାର ତଦନ୍ତ ଦାବି କରୁଛୁ । ତଦନ୍ତ ପରେ ପ୍ରକୃତ ସତ୍ୟ ସାମ୍ନାକୁ ଆସିଯିବ ବୋଲି ସେ କହିଛନ୍ତି । ସେହିପରି ବିରୋଧୀ ମାନେ ସୁପ୍ରିମକୋର୍ଟ ପ୍ରତ୍ୟକ୍ଷ ତତ୍ତ୍ବାବଧାନରେ ପେଗାସସର ତଦନ୍ତ କରିବାକୁ ଦାବି କରି ଆସୁଛନ୍ତି ।
