-
କଳାହାଣ୍ଡି ଜିଲ୍ଲାରୁ ଯୋଜନାର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ
-
ପିଏମ୍ ଆବାସ ସର୍ଭେରେ ନାମ ପଞ୍ଜିକରଣ କଲେଣି ୧୯ଲକ୍ଷ ଲୋକ
ଭୁବନେଶ୍ୱର(ଓଡ଼ିଶା ୱେୟାର): ରାଜ୍ୟର ବିଜେପି ସରକାରଙ୍କ ଆବାସିକ ଯୋଜନା ‘ଅନ୍ତ୍ୟୋଦୟ ଗୃହ ଯୋଜନା’ର ଶୁଭାରମ୍ଭ ଆସନ୍ତା ୩୦ତାରିଖରେ ହେବ । ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କଳାହାଣ୍ଡି ଜିଲ୍ଲାରୁ ଏହି ଆବାସିକ ଯୋଜନାର ଶୁଭାରମ୍ଭ କରିବେ । ଏହାସହିତ ଏବେ ଜାରି ରହିଥିବା ‘ପିଏମଆବାସ’ ଯୋଜନାର ସର୍ଭେ କାର୍ଯ୍ୟ ମାର୍ଚ୍ଚ ୩୧ତାରିଖ ପର୍ଯ୍ୟନ୍ତ ଚାଲିବ ।
ରାଜ୍ୟ ପଂଚାୟତିରାଜ ମନ୍ତ୍ରୀ ରବିନାରାୟଣ ନାଏକ ଆଜି ଏ ସମ୍ପର୍କରେ ସୂଚନା ଦେଇ କହିଛନ୍ତି ଯେ, ଆସନ୍ତା ୩୦ତାରିଖରେ କଳାହାଣ୍ଡି ଜିଲ୍ଲାରେ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଅନ୍ତ୍ୟୋଦୟ ଗୃହ ଯୋଜନାର ଶୁଭାରମ୍ଭ କରିବେ । ୫୦ହଜାର ଲୋକଙ୍କୁ ଏହି ଯୋଜନା ଯୋଡ଼ିବାକୁ ସରକାର ଲକ୍ଷ୍ୟ ରଖିଛନ୍ତି । ଗରିବ ଲୋକମାନଙ୍କୁ ଅନ୍ତ୍ୟୋଦୟ ଗୃହ ଯୋଜନାରେ ସାମିଲ କରାଯିବ । ବିଶେଷକରି ଭିନ୍ନକ୍ଷମ, ବିଧବା, ଦୂରାରୋଗ୍ୟରେ ପୀଡ଼ିତ ବ୍ୟକ୍ତିମାନଙ୍କ ସମେତ ଶହୀଦ ପରିବାର, ପଦ୍ମଶ୍ରୀ ପରିବାର, ବନ୍ୟା-ବାତ୍ୟା ଓ ଘରପୋଡ଼ି ଥିବା ବ୍ୟକ୍ତିମାନଙ୍କୁ ଏହି ଯୋଜନାରେ ସାମିଲ କରାଯିବ । ସରକାରଙ୍କ ପକ୍ଷରୁ ଅନଲାଇନ୍ ଆବେଦନ ନିମନ୍ତେ ପ୍ରକ୍ରିୟା ଆରମ୍ଭ ହେବ । ଏହି ଯୋଜନାରେ ସାମିଲ ହେବା ପାଇଁ ଫୋନ୍ ନମ୍ବର- ୦୬୭୪୬୮୧୭୭୭୭କୁ କଲ୍ କରି କିମ୍ବା ୱେବପୋର୍ଟାଲ ମାଧ୍ୟମରେ ପଂଚାୟତ କାର୍ଯ୍ୟାଳୟରେ ବିଡିଓଙ୍କ ମାଧ୍ୟମରେ ପଞ୍ଜିକୃତ ହୋଇପାରିବେ । ଯେଉଁମାନେ ଏହି ଯୋଜନାରେ ସାମିଲ ହେବାକୁ ଯୋଗ୍ୟ, ସେମାନେ ପଂଚାୟତ ମାଧ୍ୟମରେ ବିଡିଓଙ୍କ ସହ ଯୋଗାଯୋଗ କରିବାକୁ ମଧ୍ୟ ସରକାରଙ୍କ ପକ୍ଷରୁ କୁହାଯାଇଛି ।
ସେହିପରି ମନ୍ତ୍ରୀ ଶ୍ରୀ ନାଏକ କହିଛନ୍ତି ଯେ, ମାର୍ଚ୍ଚ ୩୧ତାରିଖ ପର୍ଯ୍ୟନ୍ତ ପିଏମ୍ ଆବାସ ସର୍ଭେ କାର୍ଯ୍ୟ ଜାରି ରହିବ । ଏପର୍ଯ୍ୟନ୍ତ ୧୯ଲକ୍ଷ ଲୋକ ନିଜର ନାମ ପଞ୍ଜିକରଣ କରିସାରିଲେଣି । ଏବେ ପିଏମ୍ ଆବାସ ଯୋଜନାର ସର୍ଭେ ଜାରି ରହିଛି । ଆହୁରି ୧୭-୧୮ଦିନ ଥିବାରୁ ଅଧିକ ସଂଖ୍ୟକ ଲୋକେ ସାମିଲ ହେବେ ବୋଲି ସରକାର ଆଶା ରଖିଥିବା ଶ୍ରୀ ନାଏକ କହିଚନ୍ତି ।
