ନୂଆଦିଲ୍ଲୀ : ଭାରତୀୟ ବଂଶୋଦ୍ଭବ ରିଷି ସୁନାକ ହୋଇପାରନ୍ତି ବ୍ରିଟେନ୍ର ପରବର୍ତ୍ତୀ ପ୍ରଧାନମନ୍ତ୍ରୀ। ବର୍ତ୍ତମାନର ପ୍ରଧାନମନ୍ତ୍ରୀ ବୋରିସ ଜନଶନ ଇସ୍ତଫା ଦେଇପାରନ୍ତି ବୋଲି ଚର୍ଚ୍ଚା ହେଉଛି। ଏନେଇ ତାଙ୍କ ଉପରେ ଚାପ ପଡୁଛି।
୨୦୨୦ ମସିହା ମେ’ ମାସରେ କରୋନା ପାଇଁ ବ୍ରିଟେନରେ ଲକ୍ଡାଉନ୍ ଚାଲିଥିବା ବେଳେ ଜନଶନ ନିଜେ ଏହାର ଉଲ୍ଲଂଘନ କରି ପାର୍ଟି କରିଥିଲେ। ଏପରିକି ଯିଏ ଏଥିରେ ଯୋଗ ଦେବ, ସେ ନିଜେ ଘରୁ ମଦ ଆଣନ୍ତୁ ବୋଲି ଜନଶନ କହିଥିଲେ। ଏହି କଥା ଜଣାପଡ଼ିବା ପରେ ଜନଶନ ଇସ୍ତଫା ଦିଅନ୍ତୁ ବୋଲି ବିରୋଧୀଙ୍କ ସମେତ ନିଜ ପାର୍ଟି ଭିତରୁ ମଧ୍ୟ ଜନଶନଙ୍କ ଉପରେ ଚାପ ପଡୁଛି। ଘଟଣାକୁ ନେଇ ଜନଶନ କ୍ଷମା ପ୍ରାର୍ଥନା କରିଥିଲେ। ଏହା ସତ୍ତ୍ୱେ ମଧ୍ୟ ଜନଶନ ଇସ୍ତଫା ଦିଅନ୍ତୁ ବୋଲି ଅନେକ ମହଲରେ ଦାବି ହେଉଛି।
ଯଦି ଜନଶନ ସତରେ ଇସ୍ତଫା ଦିଅନ୍ତି, ତା’ହେଲେ ଅର୍ଥମନ୍ତ୍ରୀ ଥିବା ଭାରତୀୟ ବଂଶୋଦ୍ଭବ ରିଷି ସୁନାକ ବ୍ରିଟେନର ପରବର୍ତ୍ତୀ ପ୍ରଧାନମନ୍ତ୍ରୀ ହୋଇପାରନ୍ତି ବୋଲି ଚର୍ଚ୍ଚା ହେଉଛି। ରିଷିଙ୍କ ବାପାମା’ ପଞ୍ଜାବର। ଇନ୍ଫୋସିସ୍ର ପ୍ରତିଷ୍ଠାତା ଏନ୍ ନାରାୟଣମୂର୍ତ୍ତିଙ୍କ ଜ୍ୱାଇଁ ହେଉଛନ୍ତି ରିଷି ସୁନାକ।
