ଭୁବନେଶ୍ୱର: ବିଜେଡିରୁ ଇସ୍ତଫା ଦେଇଥିବା ବୈଜୟନ୍ତ ପଣ୍ଡାଙ୍କ ଲୋକସଭା ସାଂସଦ ପଦରୁ ଇସ୍ତଫା ପତ୍ରକୁ ଆଜି ବାଚସ୍ପତି ସୁମିତ୍ରା ମହାଜନ ସ୍ୱୀକାର କରିଛନ୍ତି । ଏନେଇ ଆସନ୍ତାକାଲି ଆନୁଷ୍ଠାନିକ ଘୋଷଣା ହେବ ବୋଲି ଜଣାପଡ଼ିଛି । ବୈଜୟନ୍ତଙ୍କ ଟ୍ୱିଟର ଆକାଉଂଟ୍ ଷ୍ଟାଟସରେ ସେ ନିଜକୁ ପୂର୍ବତନ ସାଂସଦ ଭାବେ ଉଲ୍ଲେଖ କରିଛନ୍ତି । ଆଜିଠୁ ସଂସଦର ମୌସୁମୀ ଅଧିବେଶନ ଆରମ୍ଭ ହୋଇଥିବାବେଳେ ତାଙ୍କର ଇସ୍ତଫା ପତ୍ରକୁ ଗ୍ରହଣ କରିବା ପାଇଁ ସେ ଟ୍ୱିଟ୍ ମାଧ୍ୟମରେ ଲୋକସଭା ବାଚସ୍ପତି ଶ୍ରୀମତୀ ମହାଜନଙ୍କୁ ଅନୁରୋଧ କରିଥିଲେ । ସୂଚନାଯୋଗ୍ୟ, ଶ୍ରୀ ପଣ୍ଡା ଚଳିତମାସ ପ୍ରଥମ ସପ୍ତାହରେ ବାଚସ୍ପତିଙ୍କୁ ଭେଟି ତାଙ୍କର ସାଂସଦ ପଦରୁ ଇସ୍ତଫା ପତ୍ରକୁ ମଞ୍ଜୁର କରିବା ନିମନ୍ତେ ଅନୁରୋଧ କରିଥିଲେ । ବିଜେଡିରେ ଚାଲିଥିବା ଅଫିସରରାଜକୁ ବିରୋଧ କରି ବୈଜୟନ୍ତ ଉଭୟ ବିଜେଡି ଓ କେନ୍ଦ୍ରାପଡ଼ା ସାଂସଦ ପଦରୁ ଇସ୍ତଫା ଦେଇଥିଲେ । ଗତ ସପ୍ତାହରେ ମଧ୍ୟ ବିଜେଡି ସଂସଦୀୟ ଦଳ ନେତା ଭର୍ତୃହରି ମହତାବ ବାଚସ୍ପତିଙ୍କୁ ଚିଠି ଲେଖି ସାଂସଦ ଶ୍ରୀ ପଣ୍ଡାଙ୍କ ଇସ୍ତଫାକୁ ସ୍ୱୀକାର କରିବା ପାଇଁ ଅନୁରୋଧ କରିଥିଲେ ।
