ନୂଆଦିଲ୍ଲୀ: ଓବିସି ସଂଶୋଧନ ବିଲକୁ ରାଷ୍ଟ୍ରପତି ରାମନାଥ କୋବିନ୍ଦ ସବୁଜ ସଂକେତ ଦେଇଛନ୍ତି। ରାଷ୍ଟ୍ରପତିଙ୍କ ଅନୁମୋଦନ ମିଳିବା ପରେ ବିଲ ବର୍ତ୍ତମାନ ଆଇନରେ ପରିଣତ ହୋଇଛି । ମୌସୂମି ଅଧିବେଶନରେ ଉଭୟ ରାଜ୍ୟସଭା ଓ ଲୋକସଭାରେ ପାରିତ ହେବା ପରେ ରାଷ୍ଟ୍ରପତିଙ୍କ ନିକଟକୁ ଅନୁମୋଦନ ପାଇଁ ଆସିଥିଲା । ତେବେ ଏହି ବିଲକୁ ସମସ୍ତେ ସମର୍ଥନ ଜଣାଇଥିଲେ । ତେବେ ଏହି ବିନ ଆଇନରେ ପରିଣତ ହେବା ପରେ ରାଜ୍ୟ ଗୁଡ଼ିକ ନିଜେ ଓବିସି ଲିଷ୍ଟ ପ୍ରସ୍ତୁତ କରିପାରିବେ ।
ସୂଚନାଯୋଗ୍ୟ ରାଜ୍ୟସଭାରେ ବିଲ ସପକ୍ଷରେ ୧୮୭ ଖଣ୍ଡ ଭୋଟ ପଡ଼ିଥିବା ବେଳେ ଲୋକସଭାରେ ଏହା ଗତ ୧୦ ତାରିଖ ପାରିତ ହୋଇଥିଲା । ସାମାଜିକ ନ୍ୟାୟ ଓ ଅଧିକାର ମନ୍ତ୍ରୀ ବିରେନ୍ଦ୍ର କୁମାର ଏହି ବିଲକୁ ବିଚାର ଓ ପାରିତ କରିବା ଉଦ୍ଦେଶ୍ୟରେ କହିଥିଲେ କି ଏହି ସଂଶୋଧନ ବିଧେୟକ ଏକ ଐତିହାସିକ କାନୁନରେ ପରିଣତ ହେବାକୁ ଯାଉଛି । କାରଣ ଏହି ଆଇନ ଆସିବା ପରେ ଦେଶରେ ଥିବା ୬୭୧ ଜନଜାତି ଲାଭ ପାଇବେ । ସେ ଆହୁରି ମଧ୍ୟ କହିଥିଲେ କି ଏହି ସଂଶୋଧନ ବିଲ ରାଜ୍ୟ ଗୁଡ଼ିକୁ ନିଜର ଓବିସି ସୂଚୀ ପ୍ରସ୍ତୁତ କରିବାର ଅଧିକାର ପାଇଁ ଅଣାଯାଇଛି । ତେବେ ଲୋକସଭାରେ ବିଲ ସପକ୍ଷରେ ୩୮୫ ଖଣ୍ଡ ଭୋଟ ପଡ଼ିଥିବା ଜଣାପଡ଼ିଛି ।
ସେପଟେ ଏହି ବିଲ ପାସ ହେବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଥିଲେ କି ସମ୍ବିଧାନ ସଂଶୋଧନ ବିଧେୟକ ଉଭୟ ସଦନରେ ପାରିତ ହେବା ଆମ ଦେଶ ପାଇଁ ଏକ ମହତ୍ତ୍ବପୂର୍ଣ୍ଣ ସମୟ । ଏହି ଆଇନ ବା ବିଧେୟକ ସାମାଜିକ ସଶକ୍ତିକରଣକୁ ଆଗକୁ ନେବାରେ ସାହାଯ୍ୟ କରିବ ବୋଲି ପ୍ରଧାନମନ୍ତ୍ରୀ କହିଛନ୍ତି।
