କାବୁଲ: ଆଫଗାନିସ୍ତାନର ରାଜଧାନୀ କାବୁଲରେ ବିଗତ ଏକ ସପ୍ତାହ ଧରି ଆତଙ୍କ ଜାରି ରହିଛି । ଆତ୍ମଘାତି ବିସ୍ଫୋରଣ ପରେ ଆମେରିକା କଡ଼ା ପଦକ୍ଷେପ ଗ୍ରହଣ କରିଛି । ଆଇଏସଆଇଏସର ମୁଖ୍ୟଙ୍କୁ ରକେଟ ମାଡ଼ କରି ହତ୍ୟା କରିଥିବା ନେଇ ଆମେରିକା ପକ୍ଷରୁ ଦାବି କରାଯାଇଛି । ତେବେ ଏହାରି ମଧ୍ୟରେ ଆମେରୀକିୟ ନାଗରିକମାନଙ୍କୁ ଆମେରିକା ଚଳାଇଥିବା ଉଦ୍ଧାର କାର୍ଯ୍ୟ ଶେଷ ପର୍ଯ୍ୟାୟରେ ପହଞ୍ଚିଛି ।
ସେପଟେ ଆଫଗାନିସ୍ତାନରେ ସ୍ଥିତି ବେଶ ସଂଗୀନ ରହିଛି । କାବୁଲରେ ରବିବାର ପୁଣି ଥରେ ଏକ ବଡ଼ଧରଣର ବିସ୍ଫୋରଣ ଘଟିଥିଲା । ଆମେରିକା ସେନା କାବୁଲ ବିମାନବନ୍ଦରର ଉତ୍ତର-ପଶ୍ଚିମ ଭାଗରେ ରକେଟ ମାଡ଼ କରିଥିବା ନେଇ ଜଣାପଡ଼ିଛି । ଏଥିରେ ଜଣେ ଆତ୍ମଘାତୀକୁ ଟାର୍ଗେଟ କରାଯାଇଥିଲା ବୋଲି ସୂଚନା ରହିଛି । ଆମେରିକା ନିଜ ସେନା ଓ ନାଗରିକଙ୍କୁ ୩୧ ଅଗଷ୍ଟ ସୁଦ୍ଧା ଉଦ୍ଧାର କରିବା ପରେ ଦେଶ ଛାଡ଼ିବ ବୋଲି ସୂଚନା ରହିଛି । ତେବେ ଏକ ରକେଟ ଭର୍ତ୍ତି ଏକ କାର ଜବତ ହୋଇଥିବା ସୂଚନା ରହିଛି।
ଆଫଗାନିସ୍ତାରେ ଆହୁରି ୩୦୦ ନାଗରିକଙ୍କୁ ଆଜି ରାତି ସୁଦ୍ଧା ଉଦ୍ଧାର କରାଯିବା ନେଇ ଆମେରିକାର ବୈଦେଶିକ ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି । ରାଷ୍ଟ୍ରପତି ଜୋ ବିଡେନ ସରକାରର ଶୀର୍ଷ ନେତୃତ୍ବଙ୍କ ପକ୍ଷରୁ ମିଳିଥିବା ସୂଚନା ଅନୁଯାୟୀ ଆଫଗାନିସ୍ତାରେ ଆହୁରି ୩୦୦ ଆମେରିକୀୟ ନାଗରିକ ରହିଛନ୍ତି । ତାଙ୍କୁ ଆଜି ରାତି ସୁଦ୍ଧା ଦେଶକୁ ଫେରାଇ ଅଣାଯିବ । ଏହା ସହିତ ଉଦ୍ଧାର ଅଭିଯାନକୁ ଶେଷ କରାଯିବ । ଧାର୍ଯ୍ୟ ସମୟ ପୂର୍ବରୁ ଏହା ଶେଷ ହେବ । ବିଡେନଙ୍କ ରାଷ୍ଟ୍ରୀୟ ସୁରକ୍ଷା ପରାମର୍ଶଦାତା ଜେକ ସୁଲିଓ୍ୱନ କହିଛନ୍ତି ସେନା ଓ ନାଗରିକ ସ୍ବଦେଶ ପ୍ରତ୍ୟାବର୍ତ୍ତନ ପରେ ଆଫଗାନିସ୍ତାରେ ଆମେରିକା ଦୂତାବାସକୁ ବନ୍ଦ କରି ଦିଆଯିବ ।
ସେହିପରି ଆମେରିକା ଓ ଅନ୍ୟ କିଛି ପ୍ରମୁଖ ୟୁରୋପିୟ ରାଷ୍ଟ୍ର ସହିତ ୯୦ରୁ ଅଧିକ ରାଷ୍ଟ୍ର ବିଦେଶୀ ଓ ଆଫଗାନୀ ନାଗରିକଙ୍କୁ ଉଦ୍ଧାର କରିବା ସଂକ୍ରାନ୍ତରେ ଏକ ମିଳିତ ବୟାନ ଜାରି କରିଛନ୍ତି । ଏହି ରାଷ୍ଟ୍ରମାନେ କହିଛନ୍ତି କି ତାଲିବାନ ପକ୍ଷରୁ ଆଶ୍ବାସନା ଦିଆଯାଇଛି କି ସମସ୍ତ ବିଦେଶୀ ନାଗରିକ ଓ ଆଫଗାନୀ ନାଗରିକ (ଯେଉଁମାନେ ଦେଶ ଛାଡିବାକୁ ଇଚ୍ଛା ପ୍ରକାଶ କରିବେ)ଙ୍କୁ ବିଦେଶ ଯିବା ପାଇଁ ସମସ୍ତ ଅନୁମତି ପ୍ରଦାନ କରାଯିବ । ଏଥିପାଇଁ ସମସ୍ତ ପ୍ରକାର ବ୍ୟବସ୍ଥା କରିବାକୁ ତାଲିବାନ ପ୍ରତିଶୃତି ଦେଇଛି ।
ସେପଟେ ଶିରୋମଣି ଅକାଳି ଦଳର ପ୍ରବକ୍ତା ଓ ଦିଲ୍ଲୀ ଶିଖ ଗୁରୁଦ୍ବାରା ପ୍ରବନ୍ଧନ ସମିତିର ଅଧ୍ୟକ୍ଷ ମନଜିନ୍ଦର ସିଂ ସିର୍ସା କହିଛନ୍ତି କି କାବୁଲରେ ଥିବା ଗୁରୁଦ୍ବାରେ ଶରଣ ନେଇଥିବା ଲୋକମାନେ ସେଠାରୁ ଚାଲିଯାଇଛନ୍ତି । ଦୁଇଟି ପରିବାରର ୮ ଜଣ ଲୋକ ଗଜନୀ ଅଭିମୁଖେ ଯାତ୍ରା କରିଛନ୍ତି । ସେହିପରି ୬୦ ଜଣ ଲୋକ ଜଲାଲାବାଦ ଯାଇଛନ୍ତି । ଦୁଇଟି ପରିବାର ଏବେ ବି ଗୁରୁଦ୍ବାରରେ ଶରଣ ନେଇଛନ୍ତି । ସେ ଆହୁରି ମଧ୍ୟ କହିଛନ୍ତି କି ଗତକାଲି ତାଲିବାନୀ କମାଣ୍ଡର୍ସ ଆମକୁ ଦେଖା କରିବାକୁ ଆସିଥିଲେ । ସେଠାରେ ରହୁଥିବା ପରିବାରର ଉକ୍ତ କମାଣ୍ଡର୍ସଙ୍କୁ ଅନୁରୋଧ କରିଥିଲେ କି ସେମାନେ ଭାରତ ଯାଇ ତେଗ ବାହାଦୁର ସାହିବ ଜୀଙ୍କ ୪୦୦ ପ୍ରକାଶ ପର୍ବରେ ସାମିଲ ହେବା ପାଇଁ ଅନୁରୋଧ କରିଥିଲେ । ତେବେ ତାଙ୍କର ଏହି ଇଚ୍ଛାକୁ ହାଇ କମାଣ୍ଡର୍ସଙ୍କ ନିକଟରେ ପହଞ୍ଚାଇବା ସହିତ ସକରତ୍ମାତ ବାର୍ତ୍ତା ଆଣିବାକୁ କମାଣ୍ଡର୍ସ ମାନେ ଭରସା ଦେଇଛନ୍ତି ବୋଲି ମନଜିନ୍ଦର ସିଂ କହିଛନ୍ତି ।
