ମୁମ୍ବାଇ: ମହାରାଷ୍ଟ୍ରର ବୁଲଢାଣା ଜିଲ୍ଲାରେ ଆଜି ଏକ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଏହି ଦୁର୍ଘଟଣାରେ ପ୍ରାୟ ୧୫ ଜଣ ଶ୍ରମିକଙ୍କ ମୃତ୍ୟୁ ହୋଇଥିବା ଜଣାପଡ଼ିଛି । ଏହା ସହିତ ଅନ୍ୟ କିଛି ଶ୍ରମିକଙ୍କୁ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି ହୋଇଥିବା ସୂଚନା ରହିଛି ।
ମିଳିଥିବା ସୂଚନା ମୁତାବକ ସମୃଦ୍ଧି ରାଜମାର୍ଗ ପରିଯୋଜନାରେ ରାସ୍ତାକାମ ଜାରି ରହିଛି । ଏଥିପାଇଁ କିଛି ଶ୍ରମିକଙ୍କୁ ଧରି ଏକ ଲୁହାଛଡ଼ ବୋଝେଇ ଟ୍ରକ କାର୍ୟ୍ୟସ୍ଥଳକୁ ଯାଉଥିବା ଜଣାପଡ଼ିଛି । ତେବେ ପ୍ରବଳ ବର୍ଷା କାରଣରୁ ଟିପ୍ପରଟି ବୁଲଢାଣା ନିକଟରେ ଓଲଟି ପଡ଼ିଥିଲା । ଫଳରେ ଘଟଣାସ୍ଥଳରେ ହିଁ ୮ ଜଣ ଶ୍ରମିକଙ୍କର ମୃତ୍ୟୁ ହୋଇଯାଇଥିବା ବେଳେ ୭ ଜଣ ଶ୍ରମିକଙ୍କର ଡାକ୍ତରଖାନାରେ ମୃତ୍ୟୁ ହୋଇଥିବା ଜଣାପଡ଼ିଛି । ଡାକ୍ତରଖାନାରେ ୧୬ ଜଣ ଗୁରୁତର ଅବସ୍ଥାରେ ଚିକିତ୍ସିତ ହେଉଥିବା ସୂଚନା ରହିଛି । ସେପଟେ ଘଟଣା ସମ୍ପର୍କରେ ପୁଲିସ ସୂଚନା ପାଇ ଘଟଣାସ୍ଥଳରେ ପହଞ୍ଚି ମୃତାହତଙ୍କୁ ଉଦ୍ଧାର କରିଛି ।
