ଭୁବନେଶ୍ୱର: ରାଜ୍ୟ ସରକାର ୨୦୧୮-୧୯ ଆର୍ଥିକ ବର୍ଷର ଚତୁର୍ଥ ଥର ପାଇଁ ଖୋଲା ବଜାରରୁ ପୁଣି ୫୦୦କୋଟି ଟଙ୍କା ଋଣ ଆଣିବାକୁ ନିଷ୍ପତ୍ତି ନେଇଛନ୍ତି । ରାଜ୍ୟ ଅର୍ଥ ବିଭାଗର ବିଜ୍ଞପ୍ତି ଅନୁସାରେ, ରାଜ୍ୟ ସରକାର ଏହି ୫୦୦କୋଟି ଟଙ୍କାର ଋଣକୁ ରିଜର୍ଭ ବ୍ୟାଙ୍କ ମାଧ୍ୟମରେ ଆଣିବେ ଓ ୫ବର୍ଷ ମଧ୍ୟରେ ପରିଶୋଧ କରିବେ । ଏହି ଅର୍ଥକୁ ରାଜ୍ୟର ବିକାଶମୂଳକ କାର୍ଯ୍ୟ ଓ ଯୋଜନାରେ ବ୍ୟୟ କରାଯିବ । ସୂଚନାଯୋଗ୍ୟ ରାଜ୍ୟ ସରକାର ୨୦୧୮-୧୯ ଆର୍ଥିକ ବର୍ଷରେ ଏପ୍ରିଲ ୯ ଓ ୨୪ତାରିଖ ଏବଂ ମେ’ ୪ ରେ ୫୦୦କୋଟି ଟଙ୍କା ଲେଖାଏଁ ଋଣ ଆଣିଥିଲେ । ଉଲ୍ଲେଖଯୋଗ୍ୟ ୨୦୧୮-୧୯ ଆର୍ଥିକ ବର୍ଷରେ ରାଜ୍ୟ ସରକାର ମୋଟ ୧୫,୪୬୦କୋଟି ଟଙ୍କା ଋଣ ଆଣିବେ ବୋଲି ବଜେଟ୍ରେ ପ୍ରାବଧାନ କରିଛନ୍ତି । ୨୦୧୭-୧୮ ଆର୍ଥିକ ବର୍ଷ ଶେଷ ସୁଦ୍ଧା ରାଜ୍ୟର ମୋଟ ଋଣବୋଝ ୭୬,୪୮୩କୋଟି ଟଙ୍କା ଥିବାବେଳେ ଚଳିତ ଆର୍ଥିକ ବର୍ଷ ଶେଷବେଳକୁ ଏହା ୯୧,୯୪୩ କୋଟି ଟଙ୍କା ହେବ ବୋଲି ଆକଳନ କରାଯାଇଛି ।
